30 ޖޫން 2020 - 23:54
10 comments
ކޮވިޑް-19ގެ ސަބަބުން މާލެ ސަރަހައްދުގައި އިއުލާންކޮށްފައިވާ ލޮކްޑައުނަށް ދިން ލުއިތަކާ އެކު މާދަމާ އިން ފެށިގެން ރޭގަނޑު 11 ޖަހަންދެން ހުއްދަ ނެތި ބޭރުގައި އުޅެވޭ ގޮތަށް ހަމަޖައްސައިފި އެވެ.
ކޮވިޑް-19 މާލެ އިން ފެނުމާ އެކު މުޅި މާލެ ސަރަހައްދު ވަނީ ލޮކްޑައުންކޮށްފަ އެވެ. ދެ މަސް ދުވަހަށް ފަހު ލޮކްޑައުން އަށް ބޮޑެތި ލުއިތަކެއްދީ ހުޅުވައިލީ މި މަހުގެ 15 ވަނަ ދުވަހު އެވެ. އެ ލުއިތަކާ އެކު ބޭރުގައި އުޅުމުގެ ހުއްދަ އޮތީ ފަތިހު 5 އިން ރޭގަނޑު 10 އަކާ ހަމައަށެވެ. އޭގެ ފަހުން ބޭރުގައި އުޅެވެނީ އެންއީއޯސީން ހާއްސަ ހުއްދައެއް ދީފައިވާ މީހުންނަށް އެކަންޏެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19 އަށް ހާއްސަ ތަރުޖަމާން މަބްރޫކް އަޒީޒް ވިދާޅުވީ ލޮކްޑައުންއަށް ދޭން ނިންމާފައިވާ ލުއިތަކާ އެކު ރޭގަނޑު 11 އާ ހަމައަށް ހުއްދަ ނެތި ބޭރުގައި އުޅެވޭނެ ކަމަށެވެ. މަބްރޫކް ވިދާޅުވީ މި ގަޑިތަކުގައި ކޮންމެ މީހަކަށް ވެސް ނުކުމެ އުޅެވޭނެ ކަމަށެވެ.
މަބްރޫކް ވިދާޅުވީ މާދަމާ އިން ފެށިގެން 30 މީހުންނަށް އެއްކޮށް އެއްތަނެއްގައި އުޅެވިދާނެ ކަމަށެވެ. އެހެން އުޅޭ އިރު ވެސް އެޗްޕީއޭ އިން އަންގާފައިވާ ގައިދުރުކުރުމާއި މާސް އެޅުން ފަދަ ނިއުނޯމަލްގެ ގަވާއިދުތަކަށް އަމަލުކުރަން ޖެހޭނެ ކަމަށް ވިދާޅުވި އެވެ. ބަންދު އަދި ބަންދު ނޫން ތަންތަނުގައި ވެސް މިގޮތަށް އަމަލުކުރަން ޖެހޭނެ ކަމަށް ވެސް ވިދާޅުވި އެވެ.
މަބްރޫކް ވިދާޅުވީ މާލެ ސަރަހައްދުގައި ކުޅިވަރު ކުޅުމާއި ޓީމް ސްޕޯޓްސްތަކަށް ވެސް ހުއްދަދީފައިވާ ކަމަށެވެ. ނަމަވެސް ކުޑަކުދިންގެ ސްޕޯޓްސް އެކަޑަމީތަކުން ބާއްވަ ހަރަކާތްތަކަށް އަދި ހުއްދަ ދީފައި ނުވާ ކަމަށް ވިދާޅުވި އެވެ. ކުޅިވަރުތަކަށް ހުއްދަ ދީފައިވާއިރު އެކަމުގައި އަމަލުކުރަން ޖެހޭނެ ވަކި ހާއްސަ އުސޫލުތަކެއް ޔޫތު މިނިސްޓްރީން އާންމުކުރާނެ ކަމަށް ވެސް މަބްރޫކް ވިދާޅުވި އެވެ. މީގެ އިތުރަށް ޖިމްތަކާއި ފިޓްނަސް ސެންޓަރުތައް ވެސް އެތަނަށް ގަޑިއަކު ވަދެވޭނެ މީހުންގެ އަދަދު ފެންނަން ހުންނާނެހެން ބެހެއްޓުމަށް ފަހު، އާންމުކޮށް ހުޅުވުމަށް ހުއްދަ ދީފައިވާ ކަމަށް ވެސް ވިދާޅުވި އެވެ.
މީގެ އިތުރަށް މާދަމާ އިން ފެށިގެން މިސްކިތްތައްކުގައި ޖަމާއަތުގައި ނަމާދުކުރަން ފެށުމާއި އާދިއްތަ ދުވަހުން ފެށިގެން ސަރުކާރު އޮފީސްތައް ވެސް ހުޅުވަން ވަނީ ނިންމައިފަ އެވެ.
ރާއްޖެ އިން މިހާތަނަށް ކޮވިޑް-19ގެ 2،361 ކޭސް ފެނިފައިވާއިރު އޭގެ ތެރެއިން މިހާރު ފަރުވާދެމުން އަންނަނީ 403 މީހުންނަށެވެ. އަދި 1،944 މީހުން ރަނގަޅުވެފައި ވާއިރު ނުވަ މީހުން ވަނީ މަރުވެފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފިޓްފާޒިލްބެ
01 July 2020
މިއީ މީހުންނަށް ޖެއްސުން ކުރުން ފިހާރަ ހޮޓާ ރެސްޓޮރާންޓް ބަންދުކުރީމަ ދެން ކަމެއް ނެތި މީހުން ދަންވަރު މަގުތަކަށް ނުނުކުންނާނެ. ކޮންމެހެން މީހުން ނުކުތުން މަނާ ކުރާކަށް ނުޖެހޭ.
ޢިސްތިސްނާ
01 July 2020
ފުލުހުން މިފަހަކުން ކުރިކަމަކުން ހިތައް އަރަނީ ބޭރުގަ އުޅުން ނުހިމެނޭއޭ ސަފާރީއައް ދިއުމާ، މެމްބަރުންނާ މެމްބަރުންގެ އަނބިންނާ ފިރިންނާ ދަރިންނާ، އަދި އެމީހުން 'ބޭނުންކުރާން" ބޭނުންވާ އެހެން މީހުން. މިކަން އެހްޕީއޭއިން ޔަޤީންކުަރަން ބޭނޫން.
ޖަމާލާ
01 July 2020
މިހާރު މިދޭ ލުއިތަކާ ބަލާފައި 24 ގަޑިއިރަށް ހުޅުވާލަން އޮކޭ ހެން ހީވަނީ. ރޭގަނޑު 11 އިން 5 އަށް މަގުމައްޗައް އެހެން ނޫނަސް ނިކުންނާނީ މަދުބައެއް. ބޭކާރުކަމެއް. އެގަޑީގައި މަގުމަތީގައި ނުއުޅުނީމަ މިބަލި އެހެން ގަޑިތަކުގައި މީހުން މަގުމަތީގަޔާއި އެކި ތަންތަނުގައި މިއުޅެނީ ބަލި ނުފެތުރޭ ގޮތަށްތަ؟ މިގޮތަށް ނުނިކުމެވޭ ގޮތް ހަދަންވީ ދުވާލު ކޮންމެވެސް ގަޑިތަކެއްގައި. މަގުމަތީގައި މާގިނައިން ކީއްކުރަން އުޅެންވީކީ.
ޑެލްބޯއި
01 July 2020
1959 ވަނަ އަހަރުގެ ކުރިއަށް ރާއްޖެ ކޮވިޑޭ ކިޔާފައި ނުގެންދެވޭނެ. ރޭގަނޑު މީހުން ނުކުންނަ ގަޑިތަކެއް ކަނޑައެއް ނޭޅޭނެ. ނާސިރުގެ ބޮޑުވަޒީރު ކަމުގައި ދަންވަރު 12 ގެ ފަަހުން ނުކުމެވޭނެ ކަމަށް އިއުލާން ކުރި. ސޯލިހުގެ ވެރިކަމުގައި 11 އަށް ބަދަލު މިކުރީ. ބޮލާފޮށާ އޮޅައިގެން ގޭގެ ގިފިލިތެރޭގައި ހުންނަ ވަޅުން ފިރިހެނުން ނަގަންޖެހުމުގެ ބަދަލުގައި ދަންވަރު މިޖެހެނީ މޫދުން އަންހެން ކުދިންނަގަން؛ ދިވެހިން ވެއްޖެ ފިނޑި ނުވެ ގާނޫނު އަސާސީ ދަމަހައްޓަން.
ފާތާނިކެ
01 July 2020
މިރާއްޖޭގެ ގާނޫނު އަސާސީއާއި ހިލާފް އަމުރު ނެރެމުންދާއިރު ވެސް ފަޑިޔާރުގެ ހިމަހިމާންކަމުގައި. މަޖްލިހުގެ ރައީސްވެސް އަޅާނުލާ.
ޑިންގީ ކުއްޖާ
01 July 2020
ހުރިހާ ކުދިންވެސް ބަސް އަހައިގެން އުޅޭތި، އޭރުން ދެވަނަ ރާޅަކުން ސަލާމަތްވެ އިތުރު ލޮކްޑައުންއަކަށް ނުގޮސް މިކަމުން ސަލާމަތްވާނީ. ﷲގެ އިރާދަފުޅުން ދެރަ ގޮތެއް ނުވާނެ.
މިހާފީ
01 July 2020
11ގެ ފަހުންތޯ ކޮވިޑް-19 އެންމެ ބޮޑަށް އެކްޓިވް ވަނީ؟އެއީ ދަންވަރަށް ފޮޅޭ އެއްޗެއްތޯ؟ އެޗްޕީއޭއިން ދުވަސްވީ މީހުންނަށް ގަޑިއެއް ހަދާފައި-ކުޑަ ކުދިންނަށް ގަޑިއެއް ދީފައި-އެެހެން މީހުންނަށް ގަޑިއެއް ހަދާފައި- ދެން މިބުނަނީ ހުރިހާ ގަޑިއެއްވެސް އޯކޭއޭ-ވައިބަރުން މެސެޖް ކޮށްފަ މިކިޔަނީ ހެޔޮނުވާނޭ ގޭގައި ތިބޭށޭ- ނުރައްކަލޭ- އަނެއްކޮޅުން 30 އިން 30 ޓީމް ހަދަން.ކިޔާ އެކައްޗެއް ކިޔާބަލަ-ނޫސްވެރިންނަށްވެސް ދޭހަ ނުވަނީތަ؟ މިއަދު މީ ހުކުރޭ ބުނީމަ ހުކުރުވޭތަ؟
މުރީދު ފިކުރީ
01 July 2020
ގޭގަ އޮވެބަލަ!
އަހުމަދު333
01 July 2020
އަސްލުވެސް "މީހާފީ" ތިބުނީ ރަނގަޅުވާހަކައެއް.. ދައްކާ ވާހަކަ ދިމައެއްނުވެ.
އިޔައްޕެ
01 July 2020
އެމީހުން ކޮންމެވެސް ކަމެއް ކުރާ ކަމަށް ދައްކަން ކުރާ މޮޅުކަންތައް އެއީ. ރައްޔިތުންނަށް ހުރިހާ އުނދަގުލެއް. އެޗްޕީއޭގަ ތިބެގެން ނޫސް ކޮމެންޓްކޮށް ލައިކްދިނުން ނޫންކަމެއް އަސްލު ނުކުރޭ.