ހުޅުމާލެ މެޑިކަލް ފެސިލިޓީގައި މެޑިކަލް އިކުއިޕްމަންޓުތައް ބަހައްޓާފައި.-- ފޮޓޯ: އެސްޓީއޯ
14 ޖުލައި 2020 - 23:55
13 comments
ކޮވިޑް-19 އަށް ހާއްސަކޮށްގެން ހުޅުމާލޭގައި ހެދި މެޑިކަލް ފެސިލިޓީގައި މިހާރު ބާކީ ހުރީ 30 މީހުންގެ ޖާގަ ކަމަށް އައިޖީއެމްއެޗްއިން މިރޭ ބުނެފި އެވެ.
މިރޭގެ ނޫސްވެރިންގެ ބައްދަލުވުމުގައި ކޮވިޑް-19ގެ ބަލި މީހުންނަށް ފަރުވާ ދޭ ޓީމުގެ އިސް އެއް ޑޮކްޓަރު މުހައްމަދު އިސްމާއިލް ވިދާޅުވީ ހުޅުމާލޭ ފެސިލިޓީ ފުރެން ކައިރިވެފައިވާ ކަމަށެވެ. ނަމަވެސް އެ ތަނުގައި ތިބި އެންމެންނަކީ އެޑްމިޓްކޮށްގެން ފަރުވާ ދޭން ޖެހޭ މީހުން ނޫން ކަމަށް އޭނާ ވިދާޅުވި އެވެ.
"ކޮންމެހެން އެޑްމިޓް ކުރަން ނުޖެހޭ މީހުން ވެސް މިހާރު އެބަ ޖެހޭ ބައިތިއްބަން. މިސާލަކަށް ހަމައެކަނި އައިސޮލޭޓް ކުރަން ޖެހުނީ، އެހެންވީމާ ވަކި ތަނެއް ނެތީމާ އެތަނުގައި އައިސޮލޭޓް ކުރެވިފައި ތިބި މީހުން އެބަތިބި. ހަމައެކަނި ބަލި މީހުންނެއް ނޫން،" އިސްމާއިލް ވިދާޅުވި އެވެ.
ފަސް އިމާރާތް ހިމެނޭ އެ ފެސިލިޓީއަކީ އެއް ފަހަރާ 300 މީހުންނަށް ފަރުވާ ދެވޭ ތަނެކެވެ. ފަސް އިމާރާތުގެ ތެރެއިން ހަތަރު ބުރިއަށް ހަދާފައިވާ އިމާރާތުގައި ހިމެނެނީ 228 އެނދުގެ މެޑިކަލް ވޯޑެކެވެ. އެހެެން އިމާރާތެއްގައި 72 މީހުންނަށް ފަރުވާ ދެވޭނެ ވޯޑެއް ހަދާފައިވެ އެވެ. އެ ހުރިހާ ވޯޑެއް ވެސް ތައްޔާރުކޮށްފައި ވަނީ ވެންޓިލޭޓަރުގައި ވެސް ބަލި މީހުންނަށް ފަރުވާ ދެވޭނެ ގޮތަށެވެ.
ޑރ. އިސްމާއިލް ވިދާޅުވީ ހުޅުމާލޭ ފެސިލިޓީ ފުރެންވާއިރަށް އިތުރު ވަސީލަތްތަކެއް ގާއިމް ކުރާނެ ކަމަށެވެ. ނަމަވެސް އެކަމުގެ ތަފްސީލެއް ނުދެއްވަ އެވެ.
"މިހާރު ބާކީ ހުރި ކެޕޭސިޓީއަށް ބަލާއިރު އަޅުގަނޑުމެންނަށް އަދި ދުވަސް ކޮޅަކަށް މެނޭޖް ކުރެވޭނެ،" އިސްމާއިލް ވިދާޅުވި އެވެ.
އޭނާ ވިދާޅުވީ ލޮކްޑައުންއަށް ދިން ލުއިތަކާ އެކު ދިވެހިންނަށް ބަލި ޖެހޭ އަދަދު އިތުރުވާން ފަށާފައިވާ ކަމަށެވެ. އެއާއެކު އެޑްމިޓްކޮށްގެން ފަރުވާ ދޭން ޖެހޭ މީހުން ވެސް އިތުރުވާ ކަމަށް އޭނާ ވިދާޅުވި އެވެ. އެހެން ކަމުން ރައްކާތެރިކަމުގެ ފިޔަވަޅު އަޅައިގެން ބޭރުގައި އުޅުމަށް އިލްތިމާސް ކުރެއްވި އެވެ.
އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވީ ކޮވިޑް-19 އަށް ހާއްސަކޮށްގެން އަތޮޅުތެރޭގައި ތަރައްގީ ކުރާ ހަތް ފެސިލިޓީ ކުރިއަށް އޮތް ހަފްތާއެއްހާ ދުވަހުގެ ތެރޭގައި ބޭނުން ކުރަން ފެށޭނެ ކަމަށެވެ. އެ ތަންތަނުގައި އައިސީޔޫގެ އިތުރުން ވޯޑްތައް ހިމެނޭ ކަމަށް ވެސް ނަޒްލާ ވިދާޅުވި އެވެ.
"ވަރަށް ބައިވަރު މީހުންނަށް ޖެހި ވަރަށް ގިނަ މީހުން އައިސޮލޭޓް ކުރަން ޖެހޭ ހާލަތުގައި އެހެން ގޮތްގޮތަށް ވެސް އަޅުގަނޑުމެންނަށް އަމަލު ކުރަން ޖެހިދާނެ. އެގޮތަށް ވިސްނައިގެން އަޅުގަނޑުމެން ވެސް އެބަ ބަލަން އިތުރު އޮޕްޝަންސްތައް،" ނަޒްލާ ވިދާޅުވި އެވެ.
ދުނިޔޭގެ އެހެން ގައުމުތަކުގައި ވެސް ގިނަ ބަޔަކަށް ބަލި ޖެހިއްޖެ ނަމަ ގޭގައި އައިސޮލޭޓް ކުރާ ކަމަށް ނަޒްލާ ވިދާޅުވި އެވެ.
ގޭގައި ކަރަންޓީން ވާން އެޗްޕީއޭ އިން އަންގާފައިވާ މީހުން ބޭރަށް ނުކުންނަ މައްސަލަ ފެންމަތިވާ ކަމަށާއި އެހެން އެންމެންގެ ރައްކާތެރި ކަމަށްޓަކައި ވެސް އެފަދަ ކަންކަން ނުކުރަން އެދޭ ކަމަށް ވެސް ނަޒްލާ ވިދާޅުވި އެވެ.
ނަޒްލާ ވިދާޅުވީ ކޮވިޑް-19 އަށް ޕޮޒިޓިވްވި މީހުންގެ ތެރެއިން ގެއްލިގެން ހޯދި މީހަކު އިއްޔެ ވިލިމާލެ އިން ފެނުމުން އަމަލު ކުރެވުނު ގޮތުން، ރަނގަޅު ކުރަން ޖެހޭ ކަންތައްތަކެއް އެބަހުރި ކަމަށެވެ. އޭނާ ބަލާ ދަންދެން އާންމު ސަރަހައްދެއްގައި ކޯޑަންކޮށް ބެހެއްޓި ކަމަށާއި އެފަދަ ކަމެއް ތަކުރާރު ނުވާނެ ގޮތަށް ދެން އަމަލު ކުރައްވާނެ ކަމަށް ވެސް ނަޒްލާ ވިދާޅުވި އެވެ.
ރާއްޖެ އިން މިހާތަނަށް ވަނީ 2،801 މީހުން ކޮރޯނާވައިރަހަށް ޕޮޒިޓިވްވެފަ އެވެ. ރާއްޖެ އިން 2،302 މީހުން ބަލިން ރަނގަޅުވެފައިވާ އިރު ބަލި މީހުންގެ ގޮތުގައި މިހާރު ތިބީ 470 އެވެ. ކޮވިޑް-19 ޖެހިގެން ރާއްޖެ އިން ވަނީ 14 މީހުން މަރުވެފަ އެވެ. ކަރަންޓީނުގައި 47 މީހުން ތިބި އިރު އައިސޮލޭޝަނުގައި 410 މީހުން އެބަތިއްބެވެ. ރާއްޖެ އިން މިހާތަނަށް ވަނީ 63،559 ޓެސްޓްކޮށްފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ކޮވިޑް
15 July 2020
އެހެން ވީމަ 15 ޖުލައިގައި ޕޮޒިޓިވްވީ 30 މީހުން
ސޮބުރީ
15 July 2020
ފައިސާއެއްނެތޭ .. ދޯހަޅި ސިޔާސަތުން ގައުމު އިނދަޖައްސާލައިފޫ
ާގގގ23
15 July 2020
ހެލްތު އެޗްޕީއޭ މީހުން ކޮމެންޓްކުރަންތިބޭ ވާކަމެއް ހަރާމް..ކަމެއްދިމާވެގެން ގުޅީމައި ތިޔަމީހުންވާހަކަދައްކަނީ ވަރަށްރޫޑުކޮށް މީދޮގެއްނޫންކަން އާންމުނަށް އިނގޭނެ ..
ޑރ. ރާމީ ހަސަން ވައިނުޖެހޭގެއާގެ
15 July 2020
ހެލްތު މިނިސްޓަރ ޢަދާ ކުރައްވަން ޖެހޭ މައްސޫލިއްޔަތު މާ ގިނައީ. މިލިޔުމުގައިވާ ކަންކަމުގެ އިތުރުން މާލޭ ގެ ހޮސްޕިޓަލް އެއްގެ ޑޮކްޓަރަކަށް ދެއްކުމުގެ އުނދަގުލުގެ ވާހަކަ އަކީ ވެސް ދައްކާ ކޮޅުން ނުލާ ވާހަކަ އެއް. މިކަމުގެ ހައްލެއް ކަމަށް ދެކެނީ ކެބިނެޓުގައި މާލޭގެ ހޮސްޕިޓަލް ތަކަށް މިނިސްޓަރ އޮފް ހެލްްތް ފޮރ ސެންޓްރަލް ހޮސްޕިޓަލްސް ކިޔާ މިނިސްޓަރަކާއި ރާއްޖެތެރޭގެ ހޮސްޕިޓަލް ތަކަށް މިނިސްޓަރ އޮފް ހެލްތް ފޮރ ރީޖަނަލް ހޮސްޕިޓަލްސް ހުރުން. އޭރުން ނަންބަރުނުލިބުނީމާ،ޒިންމާވަނީކާކުކަންއިނގޭނެ.
މުބީނު
15 July 2020
ހެރިޓޭޖް އަކީ ބޭނުން މިނިސްޓްރީ އެއް ނޫން.
ސައްހަ މައުލޫމާތު
15 July 2020
މާލެ ހޮސްޕިޓަލްތައް މިހާރުވެސް ހެލްތު މިނިސްޓްރީ މެންޑޭޓުގައި ނުހިމެނޭ. އައިޖީއެމްއެޗް ހިންގަނީ ވަކި ގަވަނިން ބޯޑަކުން ސީދާ ރައީސް އޮފީހުގެ ބެލުމުގެ ދަށުން. ރައީސް އޮފީހުން މިކަމާ ހަވާލުވެ ހުރީ އެ އޮފީހުގެ މިނިސްޓަރު އަލީ ޝިޔާމް.
ޑރ. ރާމީ ހަސަން ނިއުޔޯކް/އެމެރިކާ
15 July 2020
ސައްހަ މަޢުލޫމާތު އަށް ވެދުން. ޤާނޫނީ ހަމަތަކުގެ މަތިން މާލޭ ގެ ހޮސްޕިޓަލް ތަކަށް ވަކި މިނިސްޓަރަކު، "ކެބިނެޓް" ގައި ހުރީމާ ނޫސްވެރިންނަށް ވެސް، ޢާއްމު ރައްޔިތުންނަށް ވެސް ޑޮކްޓަރަށް ދައްކަން ނަންބަރު ނުލިބުން ފަދަ ކަންކަމުގައި ޖަވާބުދާރީ ވާންޖެހޭ ފަރާތް ސާފުވާނެ. ރައީސް އޮފީހު ގައި މިނިސްޓަރަކު ހުރުމުން މާބޮޑު ހައިސިއްޔަތެއް ނެތް. މިދުވަސްކޮޅު މިކަން ނުކުރިޔަސް، މިއީ ކުރަންޖެހޭ ކަމެއް. ޝުކުރިއްޔާ.
ސައްހަ މައުލޫމާތު
15 July 2020
ޑރ.ރާމި ހަސަންއަށް ވެދުން. އިތުރު މަގާމެއް ނުއުފައްދާ އަލީ ޝިޔާމު އޭނާގެ ޒިންމާ ފުރިހަމައަށް އަދާކުރީމަ ހުންނާނީ ބަރާބަރަށް. އެއީ ސަރުކާރުގެ ބަލަދު އަރާ މީހަކީތަ ކަމެއް ނުކުރިއަސް ބޮޑު މަގާމު ދީފައި ބަހައްޓަން؟ އަޖައިބެއް!
ނިއު ނޯމަލް
15 July 2020
ބިޓާ ސުވީޓު ހަބަރެއް.. ބަލި މީހުން ގިނަވާތީ ދެރަވޭ.. އެކަމަކު ފެސިލިޓީތައް ގާއިމު ކުރެވުނީމަ އުފާވެއްޖެ..
ހަވާސާ
15 July 2020
ކޮބާ ކޮބާ ބޭކާރު ފެސިލިޓީއެކޭ ކިޔައިގެން ސިޔާސީ މެޑަލް ޖަހަން އުޅޭ ގްރޫޕު؟ ވާނުވާ ނޭނގުނަސް ކޮންމެ ގޮވެލިފައްޗެއްވެސް ގޮވާތި. ކޮންމެ އެއްޗެކޭ ކިޔަސް ބަދަލު ނުކުރެވޭނެ ހަގީގަތަކީ ރާއްޖޭގައި ކޮވިޑް ކަންތައް މެނޭޖް ކުރީ އަދި ކުރަމުންދަނީ ފުރިހަމައަށްކަން. އެންމެ ފުރަތަމަ ޓެސްޓު ހަދަން އިންޑިޔާގެ ޕޫނޭއަށް ފޮނުވިއިރު، މިއަދު ޓެސްޓިން ކަންތަކުގައި އިންޑިޔާއަށް ވުރެވެސް ކުރީގައި ވޯލްޑޯމީޓާގައި އުޅެނީ ރާއްޖެ. މިކަމުގެ ހައްގު ޝުކުރު ރައީސް، ހެލްތު މިނިސްޓަރު އަދި ޓީމަށް.
ހަވަރު
15 July 2020
އެންމެ ފުރިހަމަ ކޮށެއް ނޫން. އެކަމަކު ރަގަޅު. ރަގަޅު ކުރަން ޖެހޭ ކަންތައް ބައިވަރު އެބަހުރި އަދިވެސް
ކެންޑްރިކް
15 July 2020
ހަހަހަ. ފެސިލިޓީ ގޯހެއް ނޫން. ޢެކަމު ފެސިލިޓީ އައިޖީއެމްއެޗާ ހަވާލު ކުރި ދުވަހު ބުނީ މިހާރު ޖާގަ އެބަ އޮތޭ! އެންމެ ވޯސްޓް ސިނާރިއޯއަށްވެސް ރެޑީއޭ!! އެންމެ 300 ވަަރަކަށް މީހުންގެ ޖާގަައިގެ ތަނެއް ހަދައިގެން އެކަހަލަ ފޮނި ކެނޑީމަ ކަޑަ. މިހާރު މިއޮތީ އެތަންވެސް ފުރިފަ.
ކުމާރުު
15 July 2020
ދުނިޔޭގެ އެކި ކަންކޮޅުތަކުގައި ތިބި ސައިންސްވެރިންނަށްވެސް މި ބަލީގެ ހަގީގަތް އަދި ހޯދިފައި ނުވާއިރު ތިޔަ ބުނާ ފުރިހަމަކަން އަންނާނީ މަތިން ކަންކަން ބާވާލެއްވިގެން. އެހާ އަވަހަށް ބަދަލުވަމުންދާ ހާލަތަކާ އެކީ ރާއްޖެ ފަދަ ސިއްހީ ނިޒާމެއް އޮތް ތަނެއްގައި މި ހޯދި ނަތީޖާ ހަމަ ފުރިހަމައޭ ބުނެވޭނީ. ހަގީގަތް ގަބޫލުކުރުމާއި ޝުކުރުވެރިވުމަކީ މުއުމިނުންގެ ރީތި ސިފަތައް.