ރައީސް އަބްދުﷲ ޔާމީން: ޕީޕީއެމްގެ މުސްތަޝާރުގެ ހައިސިއްޔަތުން ޕާޓީ ހިންގުމުގެ ޒިންމާތަކާ ހަވާލު ވުމަށް ސިވިލް ކޯޓުން ކުރި ހުކުމަށް ހައި ކޯޓުން ވަނީ ތާއީދު ކޮށްފައި. -- ފައިލް ފޮޓޯ: ރައީސް އޮފީސް
23 އޮކްޓޯބަރ 2016 - 16:48
ވެރިކަން ކުރާ ޕީޕީއެމްގެ ތެރޭގައި ކޯޅުން ބޮޑުވެ ޕާޓީ ދެބައި ވެފައި ވަނިކޮށް، ޕާޓީ ހިންގުމާ ރައީސް އަބްދުﷲ ޔާމީން ހަވާލުވެވަޑައިގަތުމަށް ސިވިލް ކޯޓުން ކުރި ހުކުމަށް ހައި ކޯޓުން ދެންމެ ތާއީދު ކޮށް އިސްތިއުނާފް މައްސަލަ ނިންމައިފި އެވެ.
ޕީޕީއެމް ތެރޭގައި ޚިޔާލު ތަފާތުވުން އުފެދި، ރައީސް ޔާމީންގެ ފެކްޝަނަކާއި ރައީސް މައުމޫންގެ ފެކްޝަނެއް އުފެދިފައި ވަނިކޮށް ޕާޓީ ހިންގުން ރައީސް ޔާމީނާ ހަވާލުކޮށް ދަށު ކޯޓުން ހުކުމްކުރީ ޕާޓީގެ ކައުންސިލް ބައްދަލުވުންތައް މައުމޫން ނުބާއްވަވާތީ އެކަމާ ދެކޮޅަށް ރައްޔިތުންގެ މަޖިލީހުގެ ޕީޕީއެމްގެ ދެ މެމްބަރަކު ހުށަހެޅި މައްސަލައެއްގަ އެވެ.
ހައި ކޯޓުން އެ މައްސަލަ ބެލި ތިން ފަނޑިޔާރުންގެ އިއްތިފާގުން ކުރި ހުކުމުގައިވަނީ ދަށު ކޯޓުގެ ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށެވެ.
ހުކުމް އިއްވެވުމުގެ ކުރިން، މައްސަލަ ބެލި ބެންޗުގެ ރިޔާސަތު ބެލެހެއްޓެވި އިސް ފަނޑިޔާރު އަބްދުﷲ ދީދީ ވިދާޅުވީ ޕީޕީއެމްގެ އަސާސީ ގަވާއިދާ އެއްގޮތަށް ޕާޓީގެ ކައުންސިލް ބައްދަލުވުންތައް ބާއްވަން މައުމޫން ދެކޮޅު ހެއްދެވިކަން އެނގޭއިރު އެކަމަށް މަގްބޫލު އުޒުރެއް ދެއްކިފައި ނެތް ކަމަށެވެ. މައުމޫންގެ އެ އަމަލުތަކުގެ ސަބަބުން ޕީޕީއެމްގެ ހިންގުމަށް ހުރަސް އެޅިގެންދާއިރު އެ ހާލަތުގައި އެކަމަށް ކޯޓުން ހައްލެއް ހޯދައިދެވިދާނެ ކަމަށާއި އެއީ ޕާޓީތަކުގެ ހިންގުމާ ކޯޓުތަކުން ބެހުން ކަމަށް ނުބެލެވޭނެ ކަމަށް އިސް ފަނޑިޔާރު ވިދާޅުވި އެވެ.
އިސް ފަނޑިޔާރު އަބްދުﷲ ދީދީ ވިދާޅުވީ ޕާޓީގެ ކައުންސިލް ބައްދަލުވުންތައް ބާއްވަން މައުމޫން ދެކޮޅު ހައްދަވާއިރު އެ ހާލަތުގައި ޕާޓީ ހިންގުން ރައީސް ޔާމީނާ ހަވާލު ކުރުމަކީ އެންމެ މަސްލަހަތު ހުރި ގޮތް ކަމަށެވެ. ސަބަބަކީ ބައްދަލުވުން ބާއްވަން ޕާޓީގެ ރައީސް ދެކޮޅު ހަދާއިރު ޕާޓީގެ ނައިބު ރައީސަކަށް ހުރި އަބްދުއްރަހީމް އަބްދުﷲ އެ މަގާމުން ވަކިކޮށްފައިވާތީ ބައްދަލުވުން ބޭއްވޭނެ އެހެން ގޮތެއް ނެތުމުން، އެކަމުގައި ޕާޓީ އަށް އެންމެ މަސްލަހަތު ހުރި ގޮތަކީ ރައީސް ޔާމީނާ ޕާޓީ ހިންގުން ހަވާލު ކުރުން ކަމަށް އިސް ފަނޑިޔާރު ވިދާޅުވި އެވެ.
އިސް ފަނޑިޔާރު އިތުރަށް ވިދާޅުވި ގޮތުގައި ޕާޓީގެ ބައްދަލުވުންތައް ބާއްވަން ޕާޓީގެ ރައީސް ދެކޮޅު ހަދާ ނަމަ އަމަލުކުރާނެ ވަކި ގޮތެއް އެއްވެސް ގާނޫނެއްގައި ނުވަތަ ގަވާއިދެއްގައި ނެތެވެ. ގަވާއިދެއްގައި ނުވަތަ ގާނޫނެއްގައި ބުނެފައި ނެތް ކަންކަމާ ގުޅިގެން އެކަމަށް ކޯޓުތަކަށް ފަރުވާއެއް ދެވިދާނެ ކަމަށާއި އެއީ ކޯޓުތަކަށް ލިބިގެންވާ ބާރެއް ކަމަށް ވެސް އިސް ފަނޑިޔާރު އަބްދުﷲ ވިދާޅުވި އެވެ.
އިސް ފަނޑިޔާރު އިތުރަށް ވިދާޅުވީ އެ މައްސަލާގައި ކޯޓަށް ހާޒިރުވެ، ޖަވާބުދާރީވާން ޕީޕީއެމަށް އެތައް ފަހަރަކު ފުރުސަތު ދެވުނަސް އެކި ސަބަބުތައް ދެއްކުމަށް ފަހު ކޯޓުގައި ޖަވާބުދާރީވާން އެ ޕާޓީން ދެކޮޅު ހެދި ކަމަށެވެ. އަދި އެ މައްސަލަ ބެލުމުގައި ސިވިލް ކޯޓުން އަމަލުކުރި އިޖްރާއާތު ވެސް ރަނގަޅު ކަމަށް ފަނޑިޔާރު ވިދާޅުވި އެވެ.
ހަތަރު ފަހަރެއްގެ މަތިން ކޯޓަށް ހާޒިރުވާން ޕީޕީއެމަށް ސިވިލް ކޯޓުން އެންގިޔަސް ކައުންސިލްގެ ގަރާރެއް ނެތް ކަމަށް ބުނެ، ކޯޓަށް ހާޒިރުވާން ޕީޕީއެމުން ދެކޮޅު ހެދި ކަމަށް ފަނޑިޔާރު ވިދާޅުވި އެވެ. އެކަމަކު މައްސަލައިގެ އެންމެ ފަހު އަޑުއެހުމަށް ޕީޕީއެމުން ކޯޓަށް ހާޒިރުވި އިރު 2013 ގައި ފާސްކޮށްފައި އޮތް ގަރާރެއް އޮތްކަން ފަނޑިޔާރު ފާހަގަ ކުރެއްވި އެވެ.
ހުޅުދޫ ދާއިރާގެ މެމްބަރު މުހައްމަދު ޝާހިދާއި ނައިފަރު ދާއިރާގެ މެމްބަރު އަހުމަދު ޝިޔާމް ސިވިލް ކޯޓަށް ހުށަހެޅުއްވި އެ މައްސަލާގައި ކުރި ހުކުމް ހައި ކޯޓުގައި އިސްތިއުނާފްކުރީ އެ ޕާޓީގެ އަމިއްލަ މެމްބަރެއް ކަމަށްވާ އައްބާސް ވާފިރެވެ. އައްބާސަށް އެ މައްސަލަ އިސްތިއުނާފް ކުރުމުގެ ހައްގު ނެތް ކަމަށް މައުމޫންގެ ފަރާތްޕުޅުން ބުނާ ބުނުމަށް ވެސް އިސް ފަނޑިޔާރު ރައްދު ދެއްވި އެވެ.
އިސް ފަނޑިޔާރު ވިދާޅުވީ އައްބާސަކީ ޕާޓީގެ މެމްބަރެއް ކަމަށްވެފައި އެ މައްސަލައަކީ ޕާޓީގެ އާންމު މެމްބަރުންގެ މަސްލަހަތު ހުރި މައްސަލައެއް ކަމަށްވާތީ އެ މައްސަލަ އިސްތިއުނާފް ކުރުމުގެ ހައްގު އައްބާސަށް ވެސް އޮންނާނެ ކަމަށް ފަނޑިޔާރު ވިދާޅުވި އެވެ.
އިސް ފަނޑިޔާރު އަބްދުﷲ އިތުރުން ބެންޗުގައި ދެން ތިއްބެވީ ފަނޑިޔާރު އަބްދުﷲ ހަމީދާއި ފަނޑިޔާރު އަލީ ސަމީރެވެ.
ހާލަތު އޮތް ގޮތުން ޕާޓީ ހިންގުން ރައީސް ޔާމީނާ ހަވާލު ކުރުމަކީ މަސްލަހަތު ހުރި ގޮތް
- ގަވާއިދުގައި ބުނާ ގޮތުގެ މަތިން ކައުންސިލް ބައްދަލުވުންތައް މައުމޫން ނުބޭއްވުމަކީ ޕާޓީ ހިންގުމަށް ހުރަސް އެޅޭ ސަބަބެއް
- ގާނޫނު ނުވަތަ ގަވާއިދުތަކުގައި ނެތް ކަންކަމަށް ކޯޓުތަކަށް ފަރުވާ ދެވޭނެ، އެއީ ޕާޓީތައް ހިންގުމާ ކޯޓުތަކުން ބެހުމެއް ނޫން
- ޝަރީއަތް ހިންގުމުގެ އިޖްރައާތުގައި މައްސަލައެއް ނެތް
ދަށު ކޯޓުގެ ހުކުމް ހައި ކޯޓުން ދެމެހެއްޓީ އެ ހުކުމް އިސްތިއުނާފް ކުރަން މައުމޫން އަމިއްލަފުޅަށް ވަކި މައްސަލައެއް ހައި ކޯޓަށް ހުށަހަޅާފައި ވަނިކޮށެވެ. އެ މައްސަލައިގެ ޝަރީއަތް މިހާތަނަށް ފަށާފައި ނުވާއިރު މިއަދު އެގޮތަށް ހުކުމް ކުރުމުން، މައުމޫން ހުށަހެޅުއްވި މައްސަލަ ބަލައިގަންނާނެ ކަމަކަށް ނުބެލެވެ އެވެ.
މައުމޫނަށް ނޭނގި އައްބާސް އަމިއްލަ އަށް ހައި ކޯޓަށް މައްސަލަ ހުށަހެޅީ އިސްތިއުނާފްގެ ހައްގު މައުމޫނަށް ގެއްލުވާލަން ކަމަށް ބުނެ އެ ނުކުތާ މައުމޫންގެ ފަރާތްޕުޅުން ހައި ކޯޓުގައި ފާހަގަކުރިޔަސް އެ ނުކުތާގައި ވާހަކަ ދައްކަން ފަނޑިޔާރުން ފުރުސަތު ދެއްވާފައެއް ނުވެ އެވެ. އައްބާސަކީ މެމްބަރު ޝާހިދުގެ ގާތް މީހެއް ކަމަށްވެ އެވެ.
ހައި ކޯޓުގައި ޕީޕީއެމް ތަމްސީލު ކުރުމުގެ ފުރުސަތު ލިބުނީ ރައީސް ޔާމީންގެ ފެކްޝަނަށް ކަމަށްވާތީ އެ ޕާޓީން ހައި ކޯޓުގައި ވަކާލާތުކުރީ މައުމޫނާ ދެކޮޅަށް އަދި ދަށު ކޯޓުގެ ހުކުމުގެ ދިފާއުގަ އެވެ.
ދަށު ކޯޓުގެ ހުކުމާ އެކު ޕީޕީއެމް ތެރޭގައި ދެ ކައުންސިލެއް އުފެދި، ކޮންމެ ކައުންސިލަކުން ވެސް ދަނީ އަނެއް ކައުންސިލްގެ މައްޗަށް ނިންމުންތައް ނިންމަމުންނެވެ. އަދި ޕާޓީގެ މަގާމުތަކަށް ވެސް ދެ ކައުންސިލުން ދަނީ ބޭފުޅުން އައްޔަން ކުރަމުންނެވެ. ކޮންމެ ފެކްޝަނަކުން ވެސް ބުނަނީ އަސްލު ޕީޕީއެމަކީ އެ ފެކްޝަން ކަމަށެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ކަޅުކޯޓު
27 October 2016
ޕީޕީ އެމް ގެ ނަން ހައިކޯޓުން ދެވިދާނެ، އެކަމަކު ރައްޔިތުންގެ ހިތެއްނުދެވޭނެ!!! ލާހިކައެއްނޫން ދިވެހިންގެ ދުވަހަކު ކޮޅުން ޔާމީނަކަށް ހޯދާކަށް!!!
ދޮގެއްތަ؟
25 October 2016
ދެން ކަލޭމެންނަށްތަ ދޭން ޖެހެނީ!!!
މާމުއި
25 October 2016
" ކާކައްތަދާނައީކުޅަ ، ވާގިލާރުންޖަދަމުގު، ލާކަށެއް އިރާދަމުގު "
މުހަންމަދު
24 October 2016
މިކަމަކީ އެނބުރި ގޭސްގަނޑެއްނަމަ، ރައީސް މައުމޫނަށް ނުވަތަ ރައީސް ޔާމީނަށް އެއްވެސް އަސަރެއް ނުކުރާނެއެވެ. ގޭސްގަނޑަކަށް ނުވެއްޖެނަމަ، ރައީސް މައުމޫނަށް އަސަރުކުރާނެކަން ޔަޤީނެވެ. އެމަނިކުފާނުގެ ދަންފަޅީގައި އިންދަވައި ހެއްދިގަހުން މިވަރުގެހިތި މޭވާއެއް ފަރީއްކުޅުއްވަން ޖެހިދާނެކަން ހުވަފެނަކުންވެސް ދެކެވަޑައިގެންފާނެކަމާމެދު ޝައްކެވެ. އެކަމަކު މިހިންވީތާއެވެ! ސުޕްރީމްކޯޓުގައި އިސްތިޢުނާފުކުރުއްވައިގެން ހަމަމިގޮތަށް ނިމިއްޖެނަމަ، ކުރީމޭވާއަށްވުރެ މާހިތިވާނެ.
ޑީ.އާރޫ.ޕީ
24 October 2016
މީގެ ކުރިން ކިގޮތައް ޕާޓީ ދަމައި ގަތީ ތަސްމީނު ޕާޓީ ވީތަނެއް ނޭނގޭ. ތަސްމީނުވެސް ވީތަނެއް ނޭނގޭ. ޔާމީނަށްވެސް ވާނީ ހަމަ މިވަރު
އަބާ
24 October 2016
ރާއްޖެގެ ކޯޓްތަކުން އިންސާފެއް ނުލިބޭނެ. އޭ ޝައްކެތް އޮތްކަމެއްނޫން
ބޭރު
24 October 2016
ޕީޕީއެމްގެ އަސާސީ ގަވާއިދާ އެއްގޮތަށް ޕާޓީގެ ކައުންސިލް ބައްދަލުވުންތައް ބާއްވަން މައުމޫން ދެކޮޅު ހެއްދެވިކަން އެނގޭއިރު އެކަމަށް އޮތް ހައްލަކީ ކައުންސިލް ބައްދަލުވުންތައް ބޭއްވުމަށް މައުމޫނަށް އަމުރު ކުރުމެވެ. އަސާސީ ގަވާއިދުގައި ރައީސާއި ނައިބް ރައީސް މަގާމުގެ މަސްއޫލިއްޔަތު އަދާ ނުކުރެވޭ ހާލަތެއް ދިމާވުމުން ކަންކުރަން އޮންނަގޮތްވެސް އެބައޮތެެވެ. ވީމާ، ނައިބް ރައީސްގެ މަގާމާ މެދު ސުވާލު އުފެދި ރައީސް ޕާޓީ ހިންގުމަށް ހުރަސް އަޅާކަމަށް ފަޑިޔާރުން ނަށް ފެންނަނަމަ އެކަމަށް ހޯދޭނެ ފަރުވާ އަސާސީ ގަވާއިދުގައިވެއެވެ. އެ ނުބަލައި އަމިއްލައަށް ގޮތްތަކެއް ކަނޑައެޅުމަކީ ގާނޫނީ ހަމައެއް ނޫނެވެ. ފަޑިޔާރުންގެ ކިބައިން އާދޭހާއެކު އެދެނީ ރަގަޅަށް ދިރާސާ ކުރައްވާށެވެ. އިދާރީ ކަންކަމުގައި މަސްއޫލު ވުމުގެ ބަދަލުގައި ދިރާސާ ކުރުމުގައި ވަގުތު ހޭދަކުރަށްވާ ހުކުމްތައް ނެރޭށެވެ.
ގގ
24 October 2016
ނަމުން ޖުމުހޫރިއްޔަތު ކަމުން ރަސްކަން!
ޒަކީ
24 October 2016
ލޯބިވާ ބޭބެއަށް ރާކަނިމަސް ކާންދެނީ
ޒަކީ
24 October 2016
ކަންކުރަނީ ޔަހޫދީންނަށްވުރެ ނުބައިކޮށް