އާދަޔާ ހިލާފަށް މޫސުން ގޯސްވެ، މާލެ އާއި ވިލިމާލެއާ ދެމެދު ފެރީ ދަތުރުތައް މެދުކަނޑާލައިފި އެވެ.
މާލެ އާއި ވިލިމާލެއާ ދެމެދު ފެރީގެ ހިދުމަތް ދެމުން އަންނަ އެމްޓީސީސީން ބުނީ ދަތުރުތައް މެދުކަނޑާލީ މޫސުން ރަނގަޅުވަންދެން ކަމަށެވެ.
މި ދުވަސްވަރު ރާއްޖެ އަށް އާދަޔާ ހިލާފަށް ވައި ގަދަވެ ކަނޑު ގަދަ އެވެ. ކަނޑުމަތީގެ ހާދިސާތައް ހިނގަމުން ދާއިރު މިއަދު ހަވީރު ވަނީ ގަދަ ކަނޑުގައި ދަތުރުކުރި ލޯންޗަކަށް ރާޅެއް އަރައި އޭގައި އިން އަންހެނަކާއި ދެ ކުދިން ކަނޑަށް ވެއްޓި އަންހެން މީހާ މަރުވެފަ އެވެ. އަދި އެއް ކުއްޖަކު ވަނީ ގެއްލިފަ އެވެ.
މެޓް އޮފީހުންނާއި ކޯސްޓް ގާޑުން ވެސް ވަނީ ކަނޑު ދަތުރުކުރުމުގައި ސަމާލުވާން އަންގައިފަ އެވެ. ކުރިއަށް އޮތް ތިން ދުވަހު ވެސް ރާއްޖޭގެ މޫސުން ގޯސްވާނެ ކަމަށް މެޓުން ލަފާކުރެ އެވެ.