ޔޫއެފާ ޗެމްޕިއަންސް ލީގުގެ ތަށި އެންމެ ފަހުން އުފުލާލި ޕީއެސްޖީ މިފަހަރުވެސް ޕްލޭއޮފްގައި ވާދަކުރަން ޖެހިއްޖެ އެވެ.
ޕެރިހުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗު އެއްވަރުވީ 1-1 ންނެވެ.
މިދިޔަ އަހަރުގެ މުބާރާތުގެ ޗެމްޕިއަންނަށް ވުމަށް ޕީއެސްޖީން ކުރި ދަތުރުގައި ލީގު ބުރުގެ ގަދަ އަށަކަށް ނުވަދެވުމުން އެ ޓީމު ވެއްޓުނީ ޕްލޭއޮފް ބުރަށެވެ. އެ މަރުހަލާއިން ނޮަކައުޓް މެޗުތައް އެ ޓީމުން ފަށައި އެންމެ ފަހުން ނިންމާލީ ޗެމްޕިއަން ޓީމުގެ ގޮތުގަ އެވެ.
ކޯޗު ލުއިސް އެންރީކޭ ބުނީ ގަދަ އަށަކަށް ނުވަދެވުމަކީ ނާކާމިޔާބެއް ކަމަށެވެ. މިފަހަރު ވެސް ޕީއެސްޖީ އަށް ދަތުރު ދިގުވެދާނެކަމަށް އޭނާ ހުރީ ވިސްނައިގެންނެވެ.
"ޕްލޭއޮފް އަށް އަދި ކުޅެން ޖެހޭ ކޮންމެ ޓީމެއް ކަމަށް ވިޔަސް ވެސް އެއްވެސް ޓީމެއް ޕްލޭއޮފަށް ތައްޔާރަށް އޮތް ނަމަ އެއީ އަހަރެމެން -- އަހަރެމެނާ ދެކޮޅަށް ކުޅުނު ޓީމުތަކުގެ ފެންވަރަށް ބަލާއިރު އެއީ އެ ވަރުގަދަކަން އެ ޓީމުތަކުން ފެނުނީމަ އުނދަގޫވެގެން ދިޔަ،" މެޗަށް ފަހު އެންރީކޭ ބުންޏެވެ.
އޭނާ ބުނީ ނިއުކާސަލްއަކީ ވެސް ފިޒިކަލް ވަރުގަދަ ގޭމެއް ކުޅޭ ޓީމަކަށް ވުމުން އެ ޓީމުގެ ފަރާތުން އުނދަގޫ ކުރިިމަތިވާނެކަން އެނގުނު ކަމަށެވެ. އަދި ޕީއެސްޖީން ވެސް ވަރަށް ގިނަ ކަންކަން ރަނގަޅު ކުރަން ޖެހޭކަމަށް ބާސެލޯނާއާ އެކު ވެސް ޔޫއެފާ ޗެމްޕިއަންސް ލީގު ކާމިޔާބު ކުރި އެންރިކޭ ބުންޏެވެ.
"އަހަރެމެންނަށް އެނގުނު ޕްލޭއޮފް އަށް ދާން ޖެހިދާނެކަމުގެ ފުރުސަތު އޮތްކަން. (އަހަންނަށް އެނގުނު ދިގު މަގަކުންކަން އަހަރެމެން ކުރިއަށްދާން ޖެހޭނީ. އެކަމަކު އަހަރެމެންނަށް ވުރެ ފޭވަރިޓުންގެ ގޮތުގައި ބަލާނެ އެހެން ބައެއް އޮތް ކަމަކަށް އަހަރެން ނުދެކެން."