ޔޫއޭއީގެ ދުބާއީން ފުރައިގެން އިޒްރޭލުގެ ތެލް އަވީވަށް ދަތުރުކުރަނިކޮށް، ކުއްލި ހާލަތުގައި ސައުދީ އަރަބިއްޔާގެ ތަބޫކް އެއާޕޯޓަށް ޖެއްސި ފްލައިދުބާއީގެ ބޯޓުގައި ތިބި އިޒްރޭލު ފަސިންޖަރުން ބަލާ ދިއުމަށް އިޒްރޭލުގެ އަސްކަރީ މަތިންދާބޯޓަކަށް ސައުދީގެ ވައިގެ ސަރަހައްދަށް ވަނުމުގެ ހުއްދަ ދޭން ސައުދީ ސަރުކާރުން އިންކާރުކޮށްފި އެވެ.
ބުދަ ދުވަހު ހިނގި މި ހާދިސާގައި، ފްލައިދުބާއީގެ އެފްޒެޑް1073 ފްލައިޓް ސައުދީއަށް ކުއްލި ގޮތަކަށް ޖައްސަން ޖެހުނީ ބޯޓުގެ ކޯ-ޕައިލެޓް ކެޕްޓަނަށް ހަމަލާދީ ބޯޓު ވައްޓާލަން އުޅުމާ ގުޅިގެންނެވެ. ބޯޓުގެ ފަސިންޖަރުން ކޮކްޕިޓްތެރެއަށް ވަދެ ކޯ-ޕައިލެޓް ހިފަހައްޓައި ބޯޓުގެ ކޮންޓްރޯލް ހޯދުމަށް ފަހު ރައްކާތެރިކަމާ އެކު ސައޫދީގައި ޖައްސާފައި ވާއިރު މިއީ ގިނަ އަދަދެއްގެ އިޒްރޭލު މީހުން ތިބި ބޯޓު ވައްޓާލަން ކުރަން އުޅުނު ކަމެއްގެ ގޮތުގައި އިޒްރޭލުން ވަނީ ސިފަކޮށްފަ އެވެ.
ތަބޫކް އެއާޕޯޓަށް ބޯޓު ޖެއްސުމާ އެކު، އޭގައި ތިބި އިޒްރޭލުގެ ފަސިންޖަރުން ބަލާ ދިއުމަށް އިޒްރޭލުގެ ވައިގެ ސިފައިންގެ "ސުޕަ ހާކިއުލިސް" މަރުކާގެ އަސްކަރީ ކާގޯ ބޯޓެއް ފޮނުވަން އިޒްރޭލުން ތައްޔާރުވި އެވެ. ނަމަވެސް ސައުދީ އަރަބިއްޔާ އާއި އިޒްރޭލާ ދެމެދު ރަސްމީ ސިޔާސީ ގުޅުމެއް ނޯންނާތީ، ސައުދީގެ ސަލާމަތީ ބާރުތަކުން ވަނީ އިޒްރޭލުގެ އަސްކަރީ ބޯޓަށް ސައުދީގެ ވައިގެ ސަރަހައްދަށް ވަނުމުގެ ހުއްދަ ދޭން ދެކޮޅު ހަދާފަ އެވެ.
ސައުދީން ހުއްދަ ނުދިން ނަމަވެސް، އިޒްރޭލުގެ ފަސިންޖަރުން ތަބޫކް އެއާޕޯޓުގައި ތާށިވެފައެއް ނުވެ އެވެ. ފްލައިދުބާއީން ފޮނުވި ބަދަލު ފްލައިޓެއްގައި އެ ހުރިހާ ފަސިންޖަރުން ވަނީ އެ ރޭގެ ވަގުތެއްގައި ރައްކާތެރިކަމާ އެކު ތެލް އަވީވްގެ ބެން ގޫރިއަން އެއާޕޯޓަށް ގެންގޮސްދީފަ އެވެ.
ސައޫދީން ބުނެފައިވާ ގޮތުގައި ބޯޓުގެ ކޯ-ޕައިލެޓް މިހާރު ވަނީ ހައްޔަރުކޮށް ތަހުގީގު ފަށައިފަ އެވެ. މިހާތަނަށް އާންމުވެފައިވާ މައުލޫމާތަށް ބަލާއިރު ބޯޓު ދުއްވަން އިނީ އިންޑިއާގެ ޕައިލެޓެކެވެ. އޭނާއަށް ހަމަލާ ދިނީ އުމާންގެ ޕައިލެޓެކެވެ. ދަތުރުމަތީ ދިން ހަމަލާއަށް ފަހު ހިނގި ކުރިމަތިލުމުގެ ތެރޭ އިންޑިއާގެ ޕައިލެޓް ކޮކްޕިޓް ހުޅުވުމުން ފަސިންޖަރުންގެ ތެރެއިން ބަޔަކު ވަދެގަނެ ކޯ-ޕައިލެޓް ހިފަހައްޓައި އަނެއް ޕައިލެޓަށް އެހީތެރިވީ އެވެ.