ސިޔާސީ ކަންކަމަށް ވަގުތު ދެއްވުމަށްޓަކައި، ސަން އައިލެންޑް ރިސޯޓުގެ ޖެނެރަލް މެނޭޖަރު ކަމުން ޑރ. އަބްދުﷲ މައުސޫމް އިސްތިއުފާ ދެއްވައިފި އެވެ.
ރާއްޖޭގެ އެންމެ ބޮޑު ރިސޯޓުގެ ޖެނެރަލް މެނޭޖަރުކަން ކުރެއްވި މައުސޫމް މިއަދު ވިދާޅުވީ ހަތަރު އަހަރަށް ފަހު، އެ މަގާމުން އިސްތިއުފާ ދެއްވި އެއް ސަބަބަކީ މި އަހަރުގެ ރިޔާސީ އިންތިޚާބުގައި އިދިކޮޅު ކޯލިޝަނާއެކު ސިޔާސީ ހަރަކާތްތަކަށް ވަގުތު ދެއްވުމަށް ކަމަށެވެ. ސިޔާސީ ކަންކަމުގެ އިތުރުން އަމިއްލަ ކުންފުނި، ސްޓްރީމް ލައިނާސްގެ ވިޔަފާރި ކުރިއަށް ގެންދިއުމަކީ ވެސް ސަން އައިލެންޑުން ވަކިވެވަޑައިގެންނެވި ސަބަބެއް ކަމަށް ޖުމްހޫރީ ޕާޓީގެ ކައުންސިލް މެމްބަރު މައުސޫމް ވިދާޅުވި އެވެ.
"ރާއްޖެ އަނެއްކާ ވެސް ޑިމޮކްރެޓިކް މަގަށް ގެންދިއުމަށް އިދިކޮޅު ކޯލިޝަނުން ކުރަމުންދާ މަސައްކަތަށް ވަގުތު ދޭން ބޭނުންވޭ. މިވަގުތު އެހެން އެއްވެސް ތަނެއްގައި ވަޒީފާއެއް އަދައެއް ނުކުރާނަން،" ކުރީގެ ރައީސް މައުމޫން އަބްދުލް ގައްޔޫމްގެ ސަރުކާރުގައި ޓޫރިޒަމް މިނިސްޓަރުކަން ވެސް ކުރެއްވި މައުސޫމް ވިދާޅުވި އެވެ.
ރައްޔިތުންގެ މަޖިލީހުގެ ކެލާ ދާއިރާގެ މެމްބަރުކަން ވެސް ކުރެއްވި މައުސޫމް ވިދާޅުވީ އަމިއްލަ ކުންފުނިން ޓޫރިޒަމް ދާއިރާއަށް ބޭނުންވާ މުހިންމު ކަންކަން ވަރަށް އަވަހަށް ތައާރަފްކުރަން ނިންމާފައިވާ ކަމަށެވެ.
"ސިޔާސީ ކަންތަކަށް ވަނުމުގެ ކުރިން ވެސް ޕްރައިވެޓް މަސައްކަތްތަކެއް ކުރިން. އެހެންވެ ޓޫރިޒަމް އިންޑަސްޓްރީއަށް ވަރަށް މުހިންމު ކަންކަން ޕްރޮވައިޑް ކޮށްދޭން މަސައްކަތްކުރަމުން މިދަނީ،" އޭނާ ވިދާޅުވި އެވެ.
