ރަންބީރު ކަޕޫރުގެ "އެނިމަލް"ގެ ދެވަނަ ބައި "އެނިމަލް ޕާކް" ކެންސަލް ނުވި ނަމަވެސް، އެ ފިލްމުގެ މަސައްކަތް ފެށުން ލަސްވާނެ ކަމަށް އޭނާ ބުނެފި އެވެ.
ރަންބީރު "ޑެޑްލައިން"އަށް ދިން އިންޓަވިއުއެއްގައި ބުނީ އެ ފިލްމުގެ ޑައިރެކްޓަރު ސަންދީޕް ރެޑީ ވަންގާ މިވަގުތު އޭނާގެ ކުރިއަށް އޮތް ފިލްމު "ސްޕިރިޓް"ގެ މަސައްކަތުގައި ބިޒީކޮށް އުޅޭތީ، "އެނިމަލް ޕާކް"ގެ ޝޫޓިން ފެށޭވަރު ވާނީ އަންނަ އަހަރު ކަމަށެވެ.
އެހެންވެ، މި ވަގުތަށް އެ ފިލްމު އޮތީ "ޕާކު"ގައި ކަމުގެ އިޝާރާތެއް ރަންބީރު ދިނެވެ. އެ ފިލްމު ސިނަމާތަކަށް އަންނަނީ 2027 ނުވަތަ 2028 ގައި ކަމަށް ބެލެވެ އެވެ.
އެ ފިލްމުގައި ރަންބީރު ފެންނާނީ ޑަބަލް ރޯލަކުންނެވެ. އެއީ ފިލްމުގެ ލީޑު އެކްޓަރުގެ ގޮތުގަ އާއި އަދި ޕްލާސްޓިކް ސާޖަރީ ހަދައިގެން ލީޑު އެކްޓަރާ ވައްތަރުވެގެން އުޅޭ ވިލަންގެ ގޮތުގަ އެވެ.
ރަންބީރު ބުނީ އެ ފިލްމުގެ ފުރިހަމަ ސްކްރިޕްޓް އަދި އޭނާ ނުކިޔާ ނަމަވެސް، ޑައިރެކްޓަރު ވަނީ އެ ފިލްމުގެ ވާހަކަ ގެނެސްދޭނެ ގޮތުގައި ހިޔާލުތައް އޭނާއާ ހިއްސާކޮށްފައި ކަމަށެވެ.
"އެނިމަލް ޕާކް"ގެ ކުރިން ރަންބީރުގެ ބޮޑު ދެ ފިލްމެއް ކުރިއަށް އެބައޮތެވެ.
އޭގެ ތެރެއިން އެއް ފިލްމަކީ ސަންޖޭ ލީލާ ބަންސާލީ ޑައިރެކްޓްކުރާ އަދި އަންނަ ޖޫން މަހު ރިލީޒްކުރާ "ލަވް އެންޑް ވޯ" އެވެ. އެ ފިލްމުގައި ރަންބީރުއާ އެކު ލީޑު ރޯލުތަކުން ފެންނާނީ އޭނާގެ އަންހެނުން އާލިއާ ބަޓް އަދި ވިކީ ކޯޝަލް އެވެ.
ރަންބީރުގެ ކުރިއަށް އޮތް ދެވަނަ ފިލްމަކީ ނިތޭޝް ތިވާރީގެ "ރަމަޔާނާ" އެވެ.