ވާޖިދު މަރުވީ ކޮވިޑް-19 ގަ އެއް ނޫން، ހާޓްއެޓޭކެއް ޖެހިގެން: ސާޖިދު ޚާން

ކިޑްނީގައި އިންފެކްޝަނެއް އުފެދި ހާލު ގޯސްވެގެން ހޮސްޕިޓަލްގައި އެޑްމިޓްކޮށް ފަރުވާ ދެމުން ދަނިކޮށް، ކޮވިޑް-19 އަށް ޕޮޒިޓިވްވި ނަމަވެސް މިއުޒިކް ޑައިރެކްޓަރި ވާޖިދު މަރުވީ ހާޓްއެޓޭކެއް ޖެހިގެން ކަމަށް އޭނާގެ ބޭބެ ސާޖިދު ޚާން ބުނެފި އެވެ.

ސާޖިދާއި ވާޖިދަކީ މިއުޒިކް ޑައިރެކްޓަރުންގެ ގޮތުގައި އެކީގައި މަސައްކަތްކުރަމުން ދިޔަ ދެބެއިންނެވެ. އެ ދެ މީހުން މަޝްހޫރުވެފައި ވަނީ ސާޖީދު-ވާޖިދުގެ ގޮތުގަ އެވެ.

ވާޖިދު މަރުވީ މުމްބާއީގެ ހޮސްޕިޓަލެއްގައި އާދީއްތަ ދުވަހުގެ ރޭ އެޑްމިޓްކޮށް ފަރުވާ ދެމުން ދަނިކޮށް، ހޯމަ ދުވަހުގެ ދަންވަރު ވަގުތެއްގަ އެވެ.

އޭނާގެ މަރު އޭރު މީޑިއާތަކުން ރިޕޯޓްކުރީ ކޮވިޑް-19 ގައި މަރުވި ކަމަށް ބުނެ އެވެ. ނަމަވެސް އެކަން ދޮގުކޮށް ސާޖިދު ބުނީ ކޮއްކޮ އެ ބައްޔަށް ޕޮޒިޓިވް ނަމަވެސް، މަރުވީ ހާޓްއެޓޭކެއް ޖެހިގެން ކަމަށެވެ.

އޭނާ ބުނިގޮތުގައި ވާޖިދު ކުއްލި ގޮތަކަށް ވަކިވެގެން ދިޔައީ ކިޑްނީގެ މައްސަލަތަކެއްގައި ވެސް އުޅޭތާ ދުވަސްތަކެއް ފަހުންނެވެ.

ސާޖިދާއި ވާޖިދުގެ މަންމަ ރަޒީނާ ޚާން ކޮވިޑް-19 އަށް ޕޮޒިވްވެގެން މިހާރު އަންނަނީ ފަރުވާ ދެމުންނެވެ.

ސާޖިދު-ވާޖިދަކީ ބޮލީވުޑްގެ އެތައް ފިލްމަކަށް ރީތި އެތައް ލަވައެއް ހަދައިދީފައިވާ ދެ ފަންނާނުންނެވެ. ވާޖިދުގެ މަރާ އެކު ބޮލީވުޑަށް ފުން ހިތާމައެއް ލިބި، ފިލްމީ ތަރިންނާއި ޑައިރެކްޓަރުންނާއި ޕްރޮޑިއުސަރުން ހިތާމަފާޅުކޮށް ޓްވީޓްކޮށްފައިވެ އެވެ.

ސާޖިދު-ވާޖިދު އެކީގައި މިއުޒިކް ހެދި ފިލްމަކަށް ދެން އެންމެ އަވަހަށް ބެލުންތެރިންނާ ހަމައަށް އަންނާނެ ކަމަށް ބެލެވޭ ފިލްމަކީ ސަލްމާން ޚާންގެ "ރާދޭ" އެވެ.