ދުނިޔޭގެ މަޝްހޫރު ކައްކާ ޝޯ "މާސްޓަޝެފް" ގެ ދިވެހިރާއްޖޭގެ ވާޝަން "މާސްޓަޝެފް މޯލްޑިވްސް" ގެނެސްދޭން ޕީއެސްމުން ނިންމައި. އެ ޝޯ ރަސްމީކޮށް އިއްޔެ އިއުލާންކޮށްފި އެވެ.
އިނގިރޭސިވިލާތުގެ ޕްރޮޑަކްޝަން ހައުސް އެންޑެމޯލް ޝައިންގެ މި ފްރެންޗައިޒްގެ ރާއްޖޭގެ ވާޝަން "މާސްޓަޝެފް މޯލްޑިވްސް" ލޯންޗްކޮށް ދެއްވުމަށް ޕީއެސްއެމްގެ މެނެޖިން ޑިރެކްޓަރު އަލީ ހާލިދު ވިދާޅުވީ އަންނަ ސެޕްޓެމްބަރު މަހުގެ ތެރޭގައި ޝޯ ދައްކަން ފަށާނެ ކަމަށެވެ.
އޭނާ ވިދާޅުވީ މީރު ރަހަ އާއި ކުޅަދާނަ ކެއްކުންތެރިކަމަކީ ދިވެހީންގެ ލެޔާ ވެސް ގުޅިފައިވާ ކަމަކަށްވާތީ މިއީ ކެއްކުމަށް ލޯބިކުރާ މީހުންނަށް ވަރަށް ހާއްސަ އަދި އެ މީހުންނަށް ހުނަރުތައް ދައްކައިލަން ލިބޭނެ ވަރަށް ބޮޑު ޕްލެޓްފޯމަކަށް ވާނެ ކަމަށެވެ. ހާލިދު ވިދާޅުވި ގޮތުގައި ކުރިއަރަމުން އަންނަ ޒުވާން، އުންމީދީ ކައްކާއިންނާއި މި ދާއިރާ އިން ކުރިއަށްދާން ބޭނުންވާ ދިވެހީންނަށް ބައިނަލްއަގްވާމީ ފަންތީގައި ވާދަކޮށް، ބެލުންތެރީންނާއި މުޅި ދުނިޔެ އަށް ކެއްކުމުގެ ފަންނުގައި ދިވެހިންގެ ހުނަރާއި ގާބިލްކަން ސާބިތުކޮށް ދިނުމަށް "މާސްޓަޝެފް މޯލްޑިވްސް" އަކީ ރަނުގެ ފުރުސަތެއް ކަމަށެވެ.
"އަޅުގަނޑު ދެކެނީ ދުނިޔޭގެ ނަން ހިނގާ ފަތުރުވެރިކަމުގެ މަންޒިލެއްގެ ހައިސިއްޔަތުން ވެސް، އަޅުގަނޑުމެން ވީވަރަކުން މިފަދަ ޝޯތައް ރާއްޖެ ގެނެސް ދިވެހީންނަށް ބައިވެރިވުމުގެ ފުރުސަތު ހުޅުވާލަން ޖެހޭ،" އޭނާ ވިދާޅުވި އެވެ.
"މާސްޓަޝެފް މޯލްޑިވްސް" ލޯންޗިން ހަފުލާގައި އެންޑެމޯލް ޝައިންއިން އޭޝިއާ ސަރަހައްދަށް ކަނޑައަޅާފައި ހުންނަ ރީޖަނަލް ޑައިރެކްޓަރު ރަޝްމީ ބަޖްޕާއީ ވިދާޅުވީ "މާސްޓަޝެފް" އަކީ ކެއްކުމުގެ ދާއިރާ އިން ކުރިއަށްދާން ޝައުގުވެރިވާ ދިވެހިންނާއި ފަތުރުވެރިކަމާއި ކެއިންބުއިމުގެ ހިދުމަތްތަކާ ގުޅުން ހުރި ސިނާއާތްތަކަށް ހުޅުވިގެންދާނެ ފުރުސަތެއް ކަމަށެވެ. އެހެންވެ މި ފުރުސަތުގެ ބޭނުން ކެއްކުމަށް ލޯބިކުރާ ދިވެހިން ހިފާނެ ކަމަށް އުންމީދުކުރައްވާ ކަމަށް ވިދާޅުވި އެވެ.
"އަޅުގަނޑު މިހުރީ ދިވެހިރާއްޖެ އިން މާސްޓަޝެފް ފްރެންޗައިޒަށް ގެނެސްދޭނޭ ކަންތައްތައް ބަލައިލުމަށް ކެތްމަދުވެފައި" ރަޝްމީ ވިދާޅުވި އެވެ.
"މާސްޓަޝެފް މޯލްޑިވްސް" ގެ ޓައިޓްލް ސްޕޮންސަރަކީ ދިރާގެވެ. މީގެ އިތުރުން އެސްޓީއޯ، ވިލާ ކޮލެޖް އަދި ބޭންކް އޮފް މޯލްޑިވްސް (ބީއެމްއެލް) ކޯ-ސްޕޮންސަރުންގެ ދައުރު އަދާކުރާނެ އެވެ.
މާސްޓަޝެފްގެ ޝޯތައް މިހާރު ދުނިޔޭގެ އެކި ގައުމުތަކުގައި އެ ގައުމުތަކުގެ ނަމާ ގުޅުވައިގެން ގެނެސްދޭ އިރު، މި ޝޯ އަކީ 1990 ގައި ތައާރަފުކުރި ޝޯއެކެވެ. މީގެ މޭސްތިރި އަކީ ފްރޭންޑް ރޮޑަމެވެ.
މާސްޓަޝެފަކީ ހަމައެކަނި ބޮޑެތި މީހުންނަށް ހާއްސަ ޝޯއެއް ވެސް ނޫނެވެ. އެގޮތުން ކުޑަކުދިންނާއި ފުރާވަރުގެ ކުދިންނަށް ހާއްސަކޮށްގެން ވެސް މި ޝޯގެ ވާޝަންތައް ގެނެސްދެ އެވެ.
"މާސްޓަޝެފް މޯލްޑިވްސް" ލޯންޗްކުރި އިރު، ރާއްޖެއާ އެންމެ އަވަށްޓެރި އިންޑިއާ އިން މިހާރު އަންނަނީ އެ ގައުމުގައި ބާއްވާ މި ޝޯގެ ހަ ވަނަ ސީޒަން ގެނެސްދެމުންނެވެ. އެއީ ދިވެހިންގެ މެދުގައި އެންމެ މަގުބޫލު އެއް ޗެނެލް ކަމަށްވާ ސްޓާ ޕްލަސް އިންނެވެ. މީގެ އިތުރުން މާސްޓަޝެފް އެމެރިކާ، މާސްޓަޝެފް އޮސްޓްރޭލިއާ ފަދަ ޝޯތަކަކީ ދިވެހިންގެ ތެރޭގައި ހަމަ ވަރަށް މަގުބޫލު ޝޯތަކެކެވެ.
ޕީއެސްއެމުން ބުނި ގޮތުގައި "މާސްޓަޝެފް މޯލްޑިވްސް" ގައި ބައިވެރިވާން ވަރަށް އަވަހަށް ހުޅުވައިލާނެ އެވެ.
މިއީ "މޯލްޑިވިއަން އައިޑޮލް" އަށް ފަހު ޕީއެސްއެމުން ދިވެހިންނަށް ގެނެސްދޭ ދެވަނަ ފްރެންޗައިޒް ޝޯ އެވެ.