ވޯޓު ކަރުދާހުގައި ޖަހާ ފާހަގައިގެ އިތުރަށް އެ ކަރުދާހުގައި އިތުރު އެއްޗެހި ލިޔެ، ކުރެހުމަކީ ވޯޓު ވިއްކުމަށް ބޭނުން ކުރާ އުކުޅެއް ކަމަށާއި، މި ފަދަ ވޯޓު ބާތިލް ކުރުމަށް ރައްޔިތުންގެ މަޖިލީހަށް ހުށަހެޅި އިސްލާހު ފެއިލްކޮށްލުމަކީ އޭގެ އަސަރު އިންތިހާބުގައި ވާދަކުރާ މީހުންނަށް ކުރާނެ ކަމެއް ކަމަށް ޓްރާންސްޕޭރަންސީ މޯލްޑިވްސް (ޓީއެމް) އިން މިއަދު ބުނެފި އެވެ.
އެ ޖަމިއްޔާއިން ނެރުނު ބަޔާނެއްގައި ބުނީ، ވޯޓު ކަރުދާހުގައި ކުރެހުމަކީ ވޯޓު ބާތިލްވާނެ ކަމަކަށް ހެދުމަށް ހުށަހެޅި އިސްލާހަކީ ރަނގަޅު ނިންމުމެއް ކަމަށެވެ. އަދި އޭގެ ސަބަބުން ވޯޓު ގަނެވިއްކުން ހުއްޓުވައި، ވޯޓުގެ ސިއްރުކަން ޔަގީން ކުރެވޭނެ ކަމަށް ޓީއެމް އިން ބުނެ އެވެ.
އިންޓަނޭޝަނަލް ފައުންޑޭޝަން އޮފް އިލެކްޓޯރަލް ސިސްޓަމްސް އިން 2014 ވަނަ އަހަރު ހެދި ދިރާސާ ރިޕޯޓަކާ ހަވާލާދީ ޓީއެމް އިން ބުނީ ވަކި ގޮތަކަށް ވޯޓުލާން މަޖުބޫރު ކުރުވައި، އެގޮތަށް ވޯޓުލީކަން ކަށަވަރު ކުރަން ގެންގުޅޭ އެންމެ އާއްމު އުސޫލަކީ، ވޯޓު ކަރުދާހުގައި ކުރިން އެއްބަސް ވެވޭ ފާހަގައެއް ޖެހުން ކަމަށެވެ. އަދި އޭގެ ސަބަބުން ފާހަގަ ޖަހަން ބުނި މީހާ، އެއްބަސްވި ފަރާތަށް ވޯޓުދިންކަން ވޯޓު ގުނާ ވަގުތު ކަށަވަރުކޮށްދޭނެ ކަމަށް ވެސް އެ ރިޕޯޓާ ހަވާލާދީ ޓްރާންސްޕޭރަންސީން ބުނެފައި ވެ އެވެ.
ޓީއެމް އިން ބުނިގޮތުގައި، ވޯޓު ފާހަގައިގެ އިތުރުން، ވޯޓު ކަރުދާހުގައި ފާހަގަކޮށްފައި ހުންނަ ނިޝާން ފަދަ އެއްޗިއްސަކީ ވޯޓު ގަނެވިއްކުމަށް ބޭނުން ކުރާ އުކުޅެއް ކަމަށާއި މި ފަދަ ވޯޓު ބާތިލް ކުރަން ކަނޑައެޅުމަކީ ރަނގަޅު ކަމެއް ކަމަށް، މީގެ ދެ އަހަރު ކުރިން އިލެކްޝަންސް ކޮމިޝަނުން ބޭއްވި މަހާސިންތާއެއްގައި ވެސް ހުުރިހާ ސިޔާސީ ޕާޓީތަކާއި ދައުލަތުގެ ކަމާބެހޭ މުއައްސަސާތަކުން އެއްބަސްވެފައިވެ އެވެ.
މި ބަޔާނުގައި ޓީއެމްއިން ވަނީ އިންތިހާބުގެ ކަންކަމާ ގުޅޭގޮތުން ސަރުކާރުން އަމަލު ކުރަމުން އަންނަ ގޮތަށް ވަރަށް ބޮޑަށް ފާޑު ކިޔާފަ އެވެ. އެގޮތުން އަންނަ މަހު 14 ގައި ބޭއްވުމަށް ކުރިން ހަމަޖެއްސި ލޯކަލް ކައުންސިލްތަކުގެ އިންތިހާބު ފަސް ކުރުމާއި ޕްރައިމަރީން ބަލިވާ މީހުންނަށް އިތުރަށް އިންތިހާބުގައި ވާދަނުކުރެވޭނެ ގޮތް ހެދުމާ މެދު ވެސް އެ ޖަމިއްޔާއިން ވަނީ ކަންބޮޑުވުން ފާޅުކޮށްފަ އެވެ.
ޓީއެމް އިން ބުނީ ޕްރައިމަރީން ބަލިވާ މީހުންނަށް އިންތިހާބުގައި ވާދަނުކުރެވޭނެ ގޮތް ހެދުމުން އެތައް ބަޔަކަށް އިންތިހާބުގައި ވާދަކުރުމުގެ ހައްގު ގެއްލޭނެ ކަމަށާއި އެއީ އިންތިހާބުގެ ހަމަހަމަ ކަމާއި އިންސާފުވެރިކަމަށް ވެސް ނޭދެވޭ އަސަރު ކުރާނެ ކަމެއް ކަމަށެވެ. އަދި ގާނޫނުއަސާސީން ކޮންމެ ރައްޔިތަަކަށް ވެސް ލިބިދޭ މިި ހައްގު، މި މިންވަރަށް ހަނިކުރުމަކީ މިނިވަން ޑިމޮކްރަޓިކް އެއްވެސް ގައުމެއްގައި ގެންގުޅޭ މިންގަނޑެއް ނޫންކަން އެ ޖަމިއްޔާއިން ފާހަގަ ކޮށްފައި ވެ އެވެ.
ކައުންސިލްތަކުގެ އިންތިހާބު އަންނަ މާޗު މަހަށް ފަސް ކުރުމަށް ސިވިލް ކޯޓުން ކުރި ހުކުމަށް ފާޑު ކިޔަމުން ޓީއެމް އިން ބުނީ ކަނޑައެޅިފައިވާ ތާރީހަަށް އިންތިހާބު ނުބޭއްވުމަކީ އިންތިހާބުގެ އިންސާފުވެރިކަމާ މެދު ސުވާލު އުފެދޭނެ ކަމެއް ކަމަށެވެ. އަދި ސިޔާސީ ޕާޓީއެއްގެ އެތެރޭގައި އޮތް މައްސަލައަކާ ގުޅިގެން، އިންތިހާބު ފަސްކުރުމަކީ މުޅި އިންތިހާބީ ނިޒާމާ މެދު ރައްޔިތުންގެ އިތުބާރު ގެއްލިދާނެ ކަމެއް ކަމަށާއި މިއީ ކުރިއަށް އޮތް އިންތިހާބުތަކުގައި ވެސް ހިތުހުރި ގޮތަކަށް (އިންތިހާބުގެ) ތާރީހު ބަދަލު ކުރުމަށް ބާރު އަޅާނެ ކަމެއް ކަމަށް ވެސް ޓްރާންސްޕޭރަންސީން ބުނެފައި ވެ އެވެ.
"ވޯޓުލުމުގެ ހައްގު އުނިކުރެވޭ މިކަންކަމާ މެދު ކަންބޮޑުވެ، މި ކަން ކުށްވެރިކުރަމެވެ. އަދި ވޯޓުގެ ސިއްރުކަން ދެމެހެއްޓޭނެ ގާނޫނީ މިންގަނޑުތަކެއް ކަނޑައެޅުމަށް ރައްޔިތުންގެ މަޖިލީހުގެ މެމްބަރުންނަށް ގޮވާލަމެވެ." ޓީއެމްގެ ބަޔާނުގައި ވެ އެވެ.