ނޫސްވެރިންނަށް ބިރުދައްކައި އިންޒާރު ދިނުމަކީ ދުނިޔޭގެ ސަފުން ބޭރުވެފައިވާ ހުދުމުހުތާރު ދަށުދަރަޖައިގެ ގައުމުތަކުގެ ސިފައެއް ކަމަށް ބުނެ ކްރިމިނަލް ކޯޓުގެ ބަޔާން އެމްޑީޕީން މިއަދު ކުށްވެރިކޮށްފި އެވެ.
ފިތުނައުފައްދަން ނޫސްވެރިންތަކެއް އުޅެމުންދާ ކަމަށް ތުހުމަތުކޮށް، އެ ފަރާތްތަކާ މެދު ފިޔަވަޅު އަޅާނެ ކަމުގެ އިންޒާރު ކްރިމިނަލް ކޯޓުން އިއްޔެ ވަނީ ދީފަ އެވެ.
ކްރިމިނަލް ކޯޓުގެ ބަޔާނަކީ އެމްޑީޕީން ބުނިގޮތުގައި، އެ ކޯޓު އެންމެހާ އަސާސްތަކާއި އިހްތިސާސުން ބޭރުވެ، ސިޔާސީ ފަރާތްތަކުން ނެރޭ ފަދަ ނޫސް ބަޔާނެއް ކަމަށެވެ. ބޭނުމަކީ ނޫސްވެރިންނަށް ބިރުދެއްކުން ކަމަށް ވެސް އެމްޑީޕީން ބުންޏެވެ.
"ކޯޓުތަކަކީ އެ ކޯޓުތަކަށް ހުށަހެޅިގެން ފައިސަލާކޮށް ބެލެވޭ މައްސަލައެއްގެ އިތުރަށް އަމިއްލަ އަށް ބަސް ބުނެ ގޮތް ކިޔަން ހުންނަ ތަން ތަނެއް ނޫނެވެ. އެ ހަމައިން ބޭރުން މިފަދަ ނޫސްބަޔާން ނެރެ، ފިޔަވަޅު އަޅާނޭ ކަމުގެ އިންޒާރު ރައްޔިތުންނަށާއި ނޫސްވެރިންނަށް ދިނުމަކީ ޚުދުމުހުތާރު ސިޔާސީ ފަރާތްތަކުން ކުރާ ޒާތުގެ އަމަލެކެވެ،" އެމްޑީޕީގެ ބަޔާނުގައިވެ އެވެ.
އެ ޕާޓީން ބުނީ ނޫސްވެރިންނާއި ރައްޔިތުންނަށް އިންޒާރުދީ މިފަދަ ނޫސްބަޔާން ކްރިމިނަލް ކޯޓުން ނެރުމަކީ ޖުޑީޝަރީގެ މިނިވަންކަން ގެއްލި، އިތުބާރު އިތުރަށް ގެއްލިދާ ކަމެއް ކަމަށެވެ. ކޯޓުތަކުގެ ގަދަކަމަކީ ކޯޓުތަކަށް ހުށަހެޅި ފައިސަލާ ކުރެވިފައި ނުވާ ކަންކަމުގައި އަމިއްލަ ގޮތްތައް ނިންމައި އިންޒާރުގެ ނޫސްބަޔާން ނެރުން ނޫން ކަމަށް ވެސް އެ ބަޔާނުގައިވެ އެވެ.
"އެއާޚިލާފަށް ކޯޓުތަކުގެ ގަދަކަމަކީ ރައްޔިތުންގެ އިތުބާރު ހޯދުމެވެ. ނަމަވެސް އިތުބާރު ހޯދުމުގައި ކޯޓުތައް ނުކުޅެދިފައިވާކަން ކަންބޮޑުވުމާއެކު ފާހަގަ ކުރަމެވެ. ދިވެހި ގިނަ ރައްޔިތުންނާއި އދ. އާއި އިންޓަނޭޝަނަލް ކޮމިޝަން އޮފް ޖޫރިސްޓްސް އާއި، އިންސާފާއި ހައްގުތަކަށް މަސައްކަތް ކުރާ ބައިނަލްއަގުވާމީ އެންމެހައި ބޮޑެތި ޖަމިއްޔާތަކުން ތަކުރާރުކޮށް ގެންދަނީ މިކަމުގެ ކަންބޮޑުވުން އިންތިހާއަށް ފާޅުކުރަމުންނެވެ،" އެ ބަޔާނުގައިވެ އެވެ.
ކްރިމިނަލް ކޯޓުން ނޫސްވެރިންނަށް ބިރުދައްކަމުންދާއިރު، މީގެކުރިން ނޫސްވެރިންނާ މެދު ހިންގާފައިވާ އަމަލުތަކަށް މިހާތަނަށް ވެސް އިންސާފު ހޯދައިދީފައި ނުވާ ކަމަށް ބަޔާނުގައި ފާހަގަކޮށްފައިވެ އެވެ. އޭގެތެރޭގައި މިނިވަން ނޫހުގެ ނޫސްވެރިޔާ އަހްމަދު ރިލްވާން ވަގަށް ނެގުމާއި، ރާއްޖެ ޓީވީ ރޯކޮށްލުމާއި ނޫސްވެރިންނަށް މަރުގެ ހަމަލާތައް ދިނުމާއި މަރުގެ އިންޒާރު ދީ މެސެޖު ފޮނުވުން ހިމެނޭ ކަމަށް އެމްޑީޕީގެ ބަޔާނުގައިވެ އެވެ.