ގެދޮރުވެރިޔާ ސްކީމްގެ ފެލްޓުތައް އަންނަ މަހު ހަވާލުކުރަން ފަށަނީ

ގެދޮރުވެރިޔާ ސްކީމްގެ ދަށުން ސަރުކާރުން ހުޅުމާލެ 2 ގައި އިމާރާތް ކުރަމުން އަންނަ ފްލެޓުތަކުގެ މަސައްކަތް ނިމެމުން އަންނަ ވަރަކުން، އަންނަ މަހުން ފަށައިގެން ފްލެޓްތައް ހައްގުވެރިންނަށް ދޫކުރަން ފަށާނެ ކަމަށް ހައުސިން މިނިސްޓަރު ޑރ. އަބްދުﷲ މުއްތަލިބް މިއަދު ވިދާޅުވެއްޖެ އެވެ.

އެ 4،000 ފްލެޓުގެ މަސައްކަތްތައް ރައީސް ޑރ. މުހައްމަދު މުއިއްޒާ އެކު މިއަދު ހަވީރު ބައްލަވާލެއްވުމަށް ފަހު ދައުލަތުގެ މީޑިއާ، ޕީއެސްއެމަށް ދެއްވި އިންޓަވިއުއެއްގައި މުއްތަލިބް ވިދާޅުވީ، އެ ފްލެޓުތަކުގެ މަސައްކަތް ނިންމައި، އެ ތަންތަން ދޫކުރުމުގެ މަސައްކަތް އަންނަ މަހު ފަށާނެ ކަމަށެވެ.

މުއްތަލިބް ވިދާޅުވީ މި ސަރުކާރު އައިރު މި މަޝްރޫއުގެ ސްޕީޑު ހުރި ވަރާ އަޅާބަލާއިރު، މިހާރު ވަރަށް ބޮޑު ކުރިއެރުމެއް ލިބިފައިވާ ކަމަށެވެ. އިމާރާތްތަކުގެ އެތެރޭގައި ކުރަން ޖެހޭ ހުރިހާ މަސައްކަތްތަކެއްހެން މިހާރު ނިމިފައިވާ ކަމަށް ވެސް އޭނާ ވިދާޅުވި އެވެ.

މި 4،000 ފްލެޓަށް ބޭނުންވާ ކަރަންޓާއި ފެނާއި ނަރުދަމާ ފަދަ ޔޫޓިލިޓީ ހިދުމަތްތައް ގުޅައިދިނުން ކުރިން މި މަޝްރޫއުގައި ހިމަނާފައި ނުވި ނަމަވެސް، މި ސަރުކާރުން ވަކި މަޝްރޫއެއްގެ ގޮތުގައި ސްޓެލްކޯ އާއި އެމްޑަބްލިއުއެސްސީއާ ހަވާލުކޮށްގެން މިހާރު އެ މަސައްކަތް ކުރަމުން އަންނަ ކަމަށް ވެސް މުއްތަލިބް ވިދާޅުވި އެވެ.

މުއްތަލިބް ވިދާޅުވީ މި ފްލެޓްތަކުގެ މަސައްކަތް ނިމެމުން އަންނަ ވަރަކުން، ފްލެޓްތައް ލިބުނު މީހުންނާ އެކު އެއްބަސްވުން ހަދައި، އެ ތަންތަން ދޫކުރުމުގެ މަސައްކަތް އަންނަ މަހު ފަށާނެ ކަމަށެވެ.

"މިއީ، އެއްފަހަރާ ކުރިއަށް ގެންދެވޭ ކަމަކަށް ވުރެ ބޮޑު މަސައްކަތެއް، ނިމެމުންދާ ވަރަކަށް ހަވާލުކުރަމުން ގެންދެވޭނީ. އިރާދަކުރެއްވިއްޔާ އަޅުގަނޑުމެން އުއްމީދު ކުރަނީ މިހާރު މަސައްކަތް ގޮސްފައިވާ ހިސާބަށް ބަލާއިރު ސެޕްޓެމްބަރު މަހުގެ ނިޔަލަށް، 4،000 ފްލެޓް ލިބުނު މީހުންނާ އެ ފްލެޓްތައް ހަވާލުކޮށް އެ ތަންތަނުގައި އެ ބޭފުޅުން ދިރިއުޅެން ފެށޭނެ ކަމަށް،" މުއްތަލިބް ވިދާޅުވި އެވެ.

ފަހި ދިރިއުޅުން ކޯޕަރޭޝަންގެ މެނޭޖިން ޑައިރެކްޓަރު ހަމްދާން ޝަކީލް ވިދާޅުވީ، މުޅި މަޝްރޫއުގެ ބޮޑު ޕަސެންޓޭޖެއް މިހާރު ނިމިފައިވާ ކަމަށާއި ބާކީ އޮތީ ޔޫޓިލިޓީ ކަނެކްޝަންތަކުގެ މަސައްކަތް ފުރިހަމަކުރުން ކަމަށެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ފެށި ގެދޮރުވެރިޔާ ސްކީމްގެ ދަށުން ދޫކުރާ މި 4،000 ފްލެޓު ދެނީ ހުޅުމާލެ 2 ގައި އިމާރާތްކޮށްފައިވާ 16 ޓަވަރުންނެވެ. އެއީ ދެ ކޮޓަރި އާއި ތިން ކޮޓަރީގެ ފްލެޓުތަކެވެ.

ފަހި ދިރިއުޅުން ކޯޕަރޭޝަންގެ ފަރާތުން މި މަސައްކަތް ކުރަނީ އިންޑިއާގެ ދެ ކުންފުންޏަކާ ހަވާލުކޮށްގެންނެވެ. އެއީ، ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާއި ނެޝެނަލް ބިލްޑިންގްސް ކޮންސްޓްރަކްޝަން ކޯޕަރޭޝަން (އެންބީސީސީއާ) އެވެ.

މި ފްލެޓްތައް ލިބޭ ކަމަށް ކުރީގެ ސަރުކާރުން އިއުލާންކުރި ލިސްޓް ރިވިއުކޮށް، އޭގެ ތެރެއިން ޝަރުތު ހަމަވެ، ފްލެޓް ލިބޭ މީހުންގެ ލިސްޓެއް މި ސަރުކާރުން މިދިޔަ އެޕްރީލް މަހު ވަނީ އާންމުކޮށްފަ އެވެ.

އެ ލިސްޓުގައި ފްލެޓް ލިބޭނެ ކަމަށް ކަނޑައަޅާފައި ވަނީ 1،820 މީހަކަށެވެ. އޭގެ ތެރޭގައި ތިން ކޮޓަރީގެ ފްލެޓް ލިބޭ ކަމަށް ޝަރުތު ހަމަވަނީ 1،423 މީހެކެވެ. އަދި ދެ ކޮޓަރީގެ ފްލެޓަށް ޝަރުތު ހަމަވަނީ 397 މީހެކެވެ.

މި ފްލެޓްތަކާ ބެހޭ ގޮތުން މައުލޫމާތު ދިނުމަށް އެންމެ ފަހުން ބޭއްވި ނިއުސް ކޮންފަރެންސްގައި ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ފައިނަލް ލިސްޓްގެ ގޮތުގައި ދެން ބަލާނީ ކުރީގެ ސަރުކާރުން ނެރުނު ލިސްޓު ކަމަށާއި އެ ނޫން ލިސްޓެއްގެ ގޮތުގައި ވިޔަސް، އިތުރު ލިސްޓެއް މި ސަރުކާރުން ނުނެރޭނެ ކަމަށެވެ.

ނަމަވެސް، ފްލެޓް ލިބުމަށް ޝަރުތު ހަމަނުވާ މީހުން ފައިނަލް ލިސްޓުން އުނިކުރާނެ ކަމަށް މިނިސްޓަރު ވިދާޅުވި އެވެ.