ހުޅުމާލެ ފޭސް 3 އިން ގޯތި ލިބުނު މީހުންނަށް އާ ރަޖިސްޓްރީއެއް ހަދައިދީ އަދި ގުޅިފަޅުން ގޯތި ލިބުނު މީހުންނަށް ވެސް އެގްރީމަންޓުގައި ސޮއި ކުރުމަށް އަނެއްކާވެސް އިތުރު ފުރުސަތެއް ދީފި އެވެ. 

ހައުސިން މިނިސްޓްރީން މިއަދު ކުރި އިއުލާނުގައި ބުނީ ހުޅުމާލެ ތިން ވަނަ ފިޔަވަހީގެ ލޭންޑް ޔޫސް ޕްލޭނަށް ގެނައި ބަދަލާއެކު، އެ ސަރަހައްދުން ދޫކުރި ގޯތިތަކަށް ބަދަލު އައިސްފައިވާ ކަމަށެވެ. އަދި މިދިޔަ މަހުގެ 20 ވަނަ ދުވަހު ވަނީ ގޯތި ލިބުނު މީހުންގެ މެދުގައި އަލުން ގުރުއަތު ނަގައިފަ އެވެ. 

އެ މީހުންނަށް ކުރިން ދޫކުރި "ބަންޑާރަ ގޯތީގެ ރަޖިސްޓްރީ" ބާތިލުކޮށް، އާ ރަޖިސްޓަރީއެއް ދޫކުރަން ހަމަޖައްސާފައިވާ ކަމަށް ހައުސިން މިނިސްޓްރީގެ އިއުލާނުގައިވެ އެވެ. އަދި މިހާތަނަށް ރަޖިސްޓަރީ ހަވާލުނުކުރާ މީހުންނަށް ރަޖިސްޓަރީ ހަވާލުކުރުމާއި ގޯތި ހަވާލުކުރުމުގެ އެއްބަސްވުމުގައި އަލުން ސޮއިކުރަން ހަމަޖެހިފައިވާކަމަށް ބުންޏެވެ.

އެހެންވެ، އިއްޔެއިން ފެށިގެން އަންނަ މާޗް މަހުގެ 15 ވަނަ ދުވަހާ "ހިޔާވެހި ޕޯޓަލް" މެދުވެރިކޮށް "ބަންޑާރަ ގޯތީގެ ރަޖިސްޓްރީ" އާ ހަވާލުވުމަށް އެޕޮއިންޓްމަންޓަށް އެދުމުގެ ފުރުސަތު ހުޅުވާލާފައިވާ ކަމަށް އެ އިއުލާނުގައިވެ އެވެ.

މިނިސްޓްރީން ބުނީ ގުޅިފަޅުގެ ލޭންޑް ޔޫސް ޕްލޭނަށް ގެނައި ބަދަލާ ގުޅިގެން، މިއަދާ ހަމައަށް އެއްބަސްވުމުގައި ސޮއިކޮށް ގޯތީގެ ރަޖިސްޓަރީއާ ހަވާލުވެފައި ނުވާ މީހުންނަށް ވެސް އިތުރު ފުރުސަތެއް ދޭން ނިންމާފައިވާ ކަމަށެވެ.

އެ މީހުންނަށް ހިޔާވަހި ޕޯޓަލް މެދުވެރިކޮށް އެޕޮއިންޓުމަންޓަށް އެދެވޭނެ ކަމަށް އިއުލާނުގައި ބުންޏެވެ.

ހިޔާވަހި ޕޯޓަލުން އެޕޮއިންޓްމަންޓަށް އެދޭއިރު ހުށަހަޅަންޖެހޭ ލިޔުންތައް:

- އާ އެެއްބަސްވުމުގައި ހެކިވެރިއެއްގެ ގޮތުގައި ސޮއިކުރުމަށް ހާޒިރުވާނެ އެއް ފަރާތުގެ އައިޑީކާޑު ކޮޕީ

- ގޯތި ލިބޭ މީހާގެ ބަދަލުގައި އެހެން މީހަކު އެއްބަސްވުމުގައި ސޮއިކުރާނަމަ ޕޯޓަލްގެ ޕަވާ އޮފް އެޓާނީގެ ނަމޫނާއާ އެއްގޮތަށް ޝަރުއީ ކޯޓެއްގައި ރަޖިސްޓަރީ ކޮށްފައިވާ ނުވަތަ ޕަބްލިކް ނޯޓަރީގެ ކުރިމަތީގައި ސޮއިކޮށްފައިވާ ޕަވާ އޮފް އެޓާނީ އާއި އެޓާނީގެ އައިޑީކާޑު ކޮޕީ

- ގޯތި ލިބޭ މީހާ ކުރިން ސޮއިކޮށްފައިވާ ބަންޑާރަ ގޯތި ދޫކުރުމުގެ އެއްބަސްވުމުގެ ކޮޕީ

- ގޯތި ލިބޭ މީހާއަށް ކުރިން ދޫކޮށްފައިވާ ބަންޑާރަ ގޯތީގެ ރަޖިސްޓަރީގެ ކޮޕީ

ގުޅިފަޅުން ގޯތި ލިބުނު މީހުން އެގްރިމެންޓުގައި ސޮއިކުރަން އަނެއްކާވެސް މުއްދަތެއް ދިންއިރު، އެ މިނިސްޓްރީން ވަނީ އެ އެގްރިމެންޓުގައި ސޮއިކުރަން މިދިޔަ އަހަރު ވެސް ފަހު ފުރުސަތު ދީފަ އެވެ. 

ބިންވެރިޔާ ސްކީމްގެ ދަށުން ކުރީގެ ސަރުކާރުން ވަނީ ހުޅުމާލެ އާއި ގުޅިފަޅު އަދި ގިރާވަރުފަޅުން 9،031 ގޯތި މާލޭ މީހުންނަށް ދޭން ނިންމައިފަ އެވެ. އޭގެ ތެރެއިން، ގިނަ ގޯތިތައް މިހާރު ވަނީ ހަވާލުކޮށްފަ އެވެ.