ލޯކަލް ކައުންސިލް އިންތިހާބަށް ކުރިމަތިލުމަށް އެދި ފޯމް ހުށަހެޅުމަށް އިލެކްޝަން ކޮމިޝަނުން ދީފައިވާ މުއްދަތު ކުރު ކަމަށް ބުނެ އެމްޑީޕީން ކަންބޮޑުވުން ފާޅުކޮށްފި އެވެ.
އެމްޑީޕީން ބުނީ އިލެކްޝަން ކޮމިޝަނުން ދީފައިވަނީ ވަރަށް ކުރު މުއްދަތެއް ކަމަށްވާތީ ބޮޑެތި ދަތިތަކާ ކުރިމަތިވަމުންދާ ކަމަށެވެ. އަދި ދައުލަތުގެ އިދާރާތަކުން ރިކޯޑް ސާފް ކުރުމާއި އެހެނިހެން ކަންކަން ފުރިހަމަކުރުމަށް އެތަކެއް ދުވަސް ހޭދަވާތީ، އެއީ ފޯމު ހުށަހެޅުމަށް އެކަށީގެންވާ މުއްދަތެއް ނޫން ކަމަށް ވެސް އެ ޕާޓީން ބުންޏެވެ.
"މިކަމުގެ ސަބަބުން އެތައް ބަޔަކަށް އިންތިހާބަށް ކުރިމަތިލުމުގެ ފުރުސަތު ގެއްލިދާނެކަމުގެ ކަންބޮޑުވުން ފާޅުކުރަމެވެ. އަދި، މި މައްސައަށް ހައްލު ހޯދައިދިނުމަށް އިލެކްޝަންސް ކޮމިޝަނަށް މި ޕާޓީން ގޮވާލަމެވެ،" އެމްޑީޕީން ބުންޏެވެ.
އަންނަ އޭޕްރީލް މަހުގެ 4 ގައި ބާއްވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބަށް ކުރިމަތިލާން އިލެކްޝަންސް ކޮމިޝަނުން ހުޅުވާލީ މި މަހުގެ 17 ވަނަ ދުވަހު އެވެ. އެ ފުރުސަތު އޮތީ އަންނަ މަހުގެ ފުރަތަމަ ދުވަހުގެ މެންދުރުފަހު 3:30 އާ ހަމައަށެވެ.
ލޯކަލް ކައުންސިލްތަކުގެ އިންތިހާބަށް އަމިއްލަ ގޮތުން ވާދަކުރާ ކެންޑިޑޭޓުންގެ ތާއީދު ފޯމު ފުރުމަށް ހަމައެކަނި އީފާސް ބޭނުންކުރަން އިލެކްޝަންސް ކޮމިޝަނުން ނިންމާފައިވާ މައްސަލާގައި ބައެއް ޕާޓީތަކުން ވަނީ ކަންބޮޑުވުން ފާޅުކޮށްފަ އެވެ.
އީސީން ބުނެފައިވާ ގޮތުގައި އިންތިހާބަށް ކުރިމަތިލުމަށް އެދޭ ފަރާތްތަކުން އެކަމަށް އެދި ހުށަހަޅަންޖެހޭ ލިޔެކިޔުންތަކާއި އިންތިހާބަށް ކުރިމަތިލުމަށް އެދޭ ފަރާތްތަކުން ދައްކަންޖެހޭ އިދާރީ ފީ ދައްކަން ޖެހޭނީ ކޮމިޝަނުގެ ޕޯޓަލް my.elections.gov.mv އިންނެވެ. އީސީން ބުނީ އިންތިހާބަށް ކުރިމަތިލުމަށް އެދި ހުށަހެޅި ހުށަހެޅުމާ މެދު ނިންމާ ގޮތެއް ކެންޑިޑޭޓުންނަށް އަންގާނީ ވެސް އެ ޕޯޓަލް މެދުވެރިކޮށް ކަމަށެވެ.
އެ އިންތިހާބުގައި ރަށު ކައުންސިލުގެ ރައީސުންނާއި ނައިބުން އަދި ކައުންސިލަރުންގެ އިތުރުން ސިޓީތަކަށް މޭޔަރުންނާއި ކައުންސިލަރުން ހޮވާނެ އެވެ. އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވެސް މެމްބަރުން ހޮވާނެ އެވެ.
މި ދެ އިންތިހާބުގެ ވޯޓާސް ލިސްޓު މިމަހުގެ 8 ވަނަ ދުވަހު ވަނީ އާންމުކޮށްފަ އެވެ. އެ ލިސްޓުގައިވާ ގޮތުން ވޯޓު ދިނުމުގެ ހައްގު 294,937 މީހަކަށް ލިބެ އެވެ. މި ފަހަރުގެ ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި 225 ދާއިރާއަކަށް މީހުން އިންތިހާބު ކުރާނެ ކަމަށެވެ.