ސަރުކާރުގެ ޓެކްސީ ލައިންގެ ހިދުމަތް ކުޑައީދުގެ ކުރިން މި މަހުގެ 18 ވަނަ ދުވަހު ފެށުމަށް ތައްޔަރީތައް ފަށައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ މި ރޯދަމަސް ނިމެންވާއިރަށް ސަރުކާރުގެ ޓެކްސީ ލައިންގެ ހިދުމަތް ފެށުމަށް މަސައްކަތް ކުރަމުން އަންނަ ކަމަށެވެ.
އަމީން ވިދާޅުވީ ޓެކްސީ ލައިންގެ ހިދުމަތް ފެށުމަށް ތިން މޮޑެލްއެއްގެ ކާރު، ދެ ބެޗަކަށް ބަހާލައިގެން ރާއްޖެ ގެނައުމުގެ މަސައްކަތް މިހާރު ކުރަމުން އަންނަ ކަމަށެވެ. ފުރަތަމަ ބެޗު ގެންނަނީ ތައިލެންޑުން ކަމަށާއި އެ ގައުމުން އެ މޮޑެލްގެ 60 ކާރު ގެންނާނެ ކަމަށް އޭނާ ވިދާޅުވި އެވެ.
ބާކީ ދެ މޮޑެލްގެ ކާރުތައް ގެންނަނީ ޗައިނާ އިން ކަމަށް އޭނާ ވިދާޅުވި އެވެ.
"އެމްޓީސީސީން މައުލޫމާތު ލިބިފައި ވަނީ މިމަ ހުގެ 11 ވަނަ ދުވަހު އެއް ބެޗު މާލެ އަންނާނެ ކަމަށް. ދެވަނަ ބެޗު އަންނަނީ ޗައިނާ އިން. މިއަދު އަޅުގަނޑު މައުލޫމާތު ސާފުކޮށްލިން، ހުކުރު ދުވަހު ލިބޭނެ ދެވަނަ ބެޗުގެ އެރައިވަލް ޑޭޓެއް،" އޭނާ ވިދާޅުވި އެވެ.
ފުރަތަމަ ބެޗުގެ ކާރުތައް މިއަދު ސްރީޗލަންކާގެ ޕޯޓަށް ވަންނާނެ ކަމަށް އަމީން ވިދާޅުވި އެވެ.
އަމީން ވިދާޅުވި ގޮތުގައި، އެ ހިދުމަތް އިފުތިތާހުކޮށް އަދި ލިމިޑެޓްކޮށް މި މަހުގެ 18 ވަނަ ދުވަހު ހިދުމަތް ފެށޭތޯ އަންނަނީ މަސައްކަތް ކުރަމުންނެވެ.
ކަލަންޑަރުގައިވާ ގޮތުން މި އަހަރުގެ ކުޑައީދު ދުވަހަށް ވަނީ މި މަހުގެ 20 ވަނަ ދުވަހު އެވެ. އަމީން ވިދާޅުވި ގޮތުގައި، އެމްޓީސީސީގެ އަމާޒަކީ ކުޑައީދު ދުވަހަށް އެ ހިދުމަތް ފެށުން ކަމަށެވެ.
އާއްމު ދަތުރުފަތުރުގައި މިހާރު ދިމާވާ ދަތިތައް ހައްލުކުރަން މާލޭގައި ސަރުކާރުގެ ޓެކްސީ ލައިންގެ ހިދުމަތް ފެށުމަށް އެމްޓީސީސީން ވަނީ ޑްރައިވަރު ވެސް ވަޒީފާއަށް އިންޓަވިއު ކޮށްފަ އެވެ.
އެމްޓީސީސީން ކުރި އިއުލާނެއްގައިވާ ގޮތުގައި، 407 ޑްރައިވަރުން އެ ހިދުމަތަށް ބޭނުންވެ އެވެ. އޭގެ ތެރެއިން 122 ޑްރައިވަރުން ހޯދަނީ ޕާޓް ޓައިމްކޮށް މަސައްކަތްކުރާ ގޮތަށެވެ.
ސަރުކާރުން ޓެކްސީ ވިޔަފާރީގެ ތެރެއަށް ނުކުންނަން ނިންމީ މިހާރު ވެސް ޓެކްސީގެ ހިދުމަތަށް 1،500 އެއްހާ ކާރު ރަޖިސްޓްރީކޮށްފައި އޮންނައިރު އެ މީހަކު ބޭނުންވާ ވަގުތެއްގައި ނުކުމެ، ބޭނުންވާ ތަނަކަށް އެކަނި ދަތުރު ނެގުމުގެ މައްސަލައާ ހެދި އާއްމުންނަށް ކުރިމަތިވާ އުނދަގޫތަކާ ހެދި އެވެ.
ކުރިން މިނިސްޓަރު އަމީން ވިދާޅުވި ގޮތުގައި، އެންމެ ފުރަތަމަ ހިދުމަތަށް ނެރޭނީ 100 އުޅަނދެވެ. އޭގެ ތެރޭގައި ހަނި ގޯޅިތަކަށް ވަދެވޭ ޓެކްސީ ހުންނާނެ އެވެ.
ޓެކްސީ ލައިނުގައި ބޭނުންކުރާ ވެހިކަލްތައް ޕާކުކުރުމަށް ހުޅުމާލެއިން ތިން ބިމެއް ވެސް ވަނީ ކަނޑައަޅައިފަ އެވެ.
އެމްޓީސީސީން ޓެކްސީގެ ހިދުމަތް ދޭނީ އިލެކްޓްރިކް ވެހިކަލް (އީވީ) ބޭނުންކޮށްގެންނެވެ. މި ހިދުމަތް ދޭން ހަމަޖެހިފައި ވަނީ ހިދުމަތް ދިނުމަށް ހާއްސަ އެޕްލިކޭޝަނެއް ގާއިމުކޮށް، ރާއްޖެއިން ބޭރުގައި ދޭ އޫބާ އާއި ގްރޭބް ފަދަ ހިދުމަތްތަކުގެ ސްޓައިލަށެވެ.
ސަރުކާރުގެ ޓެކްސީ ލައިންގެ ހިދުމަތް ދޭން ފަށާނީ ތިން ފިޔަވައްސަކަށް ބަހާލައިގެންނެވެ.
ކުރިން އިއުލާނުކޮށްފައިވާ ގޮތުން ފުރަތަމަ ފިޔަވަހީގައި މާލެ އާއި ހުޅުމާލޭގެ އިތުރުން ވެލާނާ އިންޓަނޭޝަނަލް އެއާޕޯޓަށް ހިދުމަތް ދޭން ފަށާނެ އެވެ. ދެވަނަ ފިޔަވަހީގައި ވިލިމާލެ އާއި ތިލަފުއްޓަށް މި ހިދުމަތް ތައާރަފުކުރާނެ އެވެ. އަދި ތިންވަނަ ފިޔަވަހީގައި އެ ހިދުމަތް ރަސްމާލެ އާއި ގިރާވަރާއި އައްޑު އާއި ފުވައްމުލަކުގައި ފަށާނެ އެވެ. އެ ހިދުމަތް ހދ. ކުޅުދުއްފުއްޓަށް ތައާރަފުކުރަން ރާވާފައިވެ އެވެ.