ރާއްޖޭގައި މަރުގެ ހުކުމް ތަންފީޒު ކުރުމަށް ސަރުކާރުން އެންމެ ފުރަތަމަ ކުރަން ޖެހޭ ކަމަކީ ޝަރުއީ ދާއިރާ އަށް ނުފޫޒު ފޯރުވުން ހުއްޓާލުން ކަމަށް ކުރީގެ އިސްލާމިކް މިނިސްޓަރު ޑރ. އަބްދުލްމަޖީދު އަބްދުލްބާރީ ރޭ ވިދާޅުވެއްޖެ އެވެ.
އިދިކޮޅު ޕާޓީތަކުން މ. ކުނޫޒްގައި ބޭއްވި ޖަލްސާގައި ވާހަކަ ދައްކަވަމުން، މަޖީދު ވަނީ ސަރުކާރުން މަރުގެ ހުކުމް ތަންފީޒުކުރަން އުޅޭ ގޮތާ މެދު ކަންބޮޑުވުން ފާޅު ކުރައްވައިފަ އެވެ.
ހަށިގަނޑުގެ އެކި ތަންތަނަށް ހަމަލާދީ، މަރާލާފައި އޮއްވާ ހޮނިހިރު ދުވަހުގެ ރޭ ފެނުނު ޔާމީން ރަޝީދަށް އިންސާފު ހޯދައިދޭން ވެސް ސަރުކާރުން އަޅާނެ ފިޔަވަޅުތަކުގެ ތެރޭގައި މަރުގެ ހުކުމް ތަންފީޒުކުރުން ހިމެނޭ ކަމަށް ރައީސް އަބްދުﷲ ޔާމީން ވިދާޅުވި ވާހަކަފުޅަށް އިޝާރާތް ކުރައްވައި މަޖީދު ވިދާޅުވީ މަރުގެ ހުކުމް ތަންފީޒު ކުރަން ފެށުމަކީ އިންސާފަށް ވާސިލްވުން ނޫން ކަމަށެވެ. ރާއްޖޭގެ ޝަރުއީ ނިޒާމް އޮތް ގޮތުން އެކަން އިންސާފުވެރިކޮށް ކުރެވޭނެ ކަމާ މެދު ވެސް ސުވާލު އުފެދޭ ކަމަށް މަޖީދު ވިދާޅުވި އެވެ.
"ޑރ. އަފްރާޝީމްގެ ގާތިލަކީ ފަހަރުގައި ހުމާމް ކަމަށް ވެދާނެ. އެހެން ނަމަވެސް ހުމާމާއި އަފްރާޝީމާ ދޭތެރޭގައި އޮތީ ކޮން އަދާވާތްތެރިކަމެއްތޯ؟ މަހްފޫޒް ސައީދު ގަޔަށް ވަޅި ޖެހި މީހާއާ އޭނާއާ އޮތީ ކޮން އަދާވާތްތެރިކަމެއްތޯ؟" މަޖީދު ސުވާލު ކުރެއްވި އެވެ.
އޭނާ ވިދާޅުވި ގޮތުގައި އެ މީހުންގެ މައްޗަށް މަރުގެ ހުކުމް ތަންފީޒު ކުރުމަކީ އިންސާފު ހޯދައިދެވުން ކަމަށް ނުވާނެ އެވެ. މިސާލެއް ދައްކަވަމުން ވިދާޅުވީ އަފްރާޝީމްގެ މަރާ ގުޅިގެން ހުމާމް މަރާލުމަކީ އެ މައްސަލާގައި ހިމެނޭ އެތައް ހެއްކެއް ފަހަރުގައި، ފޮރުވިގެން ހިނގައިދާނެ ކަމަކަށް ވެސް ވެދާނެ ކަމަށެވެ.
"އަޅުގަނޑު ގަބޫލުކުރަން މާތްﷲ ބާވައިލައްވާފައިވާ ހުކުމްތައް ތަންފީޒުކުރެވެން ޖެހޭނެ. ގިސާސް ހިފުމަކީ ވެސް ޝަރުއީ ހުކުމެއް. އެހެން ނަމަވެސް އޭގެ ކުރިން ކުރަން ޖެހޭ ކަންތައްތައް އަޅުގަނޑުމެން ކުރަން އެބަޖެހޭ. އަދުލުއިންސާފު ކަށަވަރުކުރުމަށްޓަކައި ކުރަން ޖެހޭ ކަންކަން އެބަކުރަން ޖެހޭ،" މަޖީދު ވިދާޅުވި އެވެ.
"އުމަރުގެފާނު ވިދާޅުވެފައިވޭ އެއްވެސް ކަހަލަ ޝައްކެއް އޮވެގެން މީހެއްގެ މައްޗަށް ހައްދެއް ގާއިމްކުރުމަށް ވުރެން ތިމަންނާ ގާތުގައި އެ މީހާގެ މައްޗަށް މައާފް ދީފައި ދޫކޮށްލުން ވެސް މާ ރަނގަޅުވެގެންއޭ، މާ ހެޔޮވެގެންވެއޭ."
މަޖީދު ވިދާޅުވި ގޮތުގައި މަރުގެ ހުކުމް ތަންފީޒުކުރުމަކީ ރާއްޖޭގައި އަދުލު އިންސާފު ގާއިމްކުރެވުނީ ކަމަށް ގަބޫލުކޮށްގެން ނުވާނެ އެވެ. އޭގެ ކުރިން ޖެހޭ ކަމަކީ، ޝަރުއީ ނިޒާމުގެ މިނިވަންކަން ކަށަވަރުކުރުން ކަމަށް ތަކުރާރުކޮށް ވިދާޅުވި އެވެ.