ސުޕްރީމް ކޯޓުން އަމުރުތަކެއް ނެރެގެން މުޅި ދައުލަތް ހުއްޓުވާލައި ޖުޑިޝަރީން ބޭނުންވީ ބަޣާވާތެއް ގެންނަން ކަމަށާއި ކުއްލި ނުރައްކަލުގެ ހާލަތު އިއުލާންކުރަން ޖެހުނީ އެއީ ކިހާވަރެއްގެ "ބަޣާވާތެއްކަން" ދެނެގަތުމަށް ކަމަށް ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.
ޖަލު ހުކުމްތަކެއްގައި ތިއްބެވި ސިޔާސީ ލީޑަރުންތަކެއް ވަގުތުން މިނިވަންކޮށް ދޫކޮށްލަން ސުޕްރީމް ކޯޓުން މިދިޔަ ބުރާސްފަތި ދުވަހުގެ ރޭ ނެރުނު އަމުރު ސަރުކާރުން ތަންފީޒުނުކޮށް، ސަރުކާރުން ރޭ ވަނީ ކުއްލި ނުރައްކަލުގެ ހާލަތު އިއުލާންކޮށް، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރުކޮށްފަ އެވެ. އަދި ކުރީގެ ރައީސް މައުމޫން އަބްދުލްގައްޔޫމާއި ޖުޑީޝަލް އެޑްމިނިސްޓްރޭޓާ ހަސަން ސައީދު ވެސް ރޭ ހައްޔަރު ކުރި އެވެ.
މިއީ، ސުޕްރީމް ކޯޓުގެ ބާރު ކަނޑުވާލައި ގާނޫނުއަސާސީއާ ޚިލާފުވުން ކަމަށް، އިދިކޮޅު ފަރާތްތަކުން ފާޑުކިޔަމުން ދަނިކޮށް ކެބިނެޓާއި ރައްޔިތުންގެ މަޖިލީހުގެ ޕީޕީއެމް މެމްބަރުންނާ އެކު ރައީސް އޮފީހުގައި ނޫސްވެރިންނާ ބައްދަލުކުރައްވައި، ރައީސް ވަނީ އެ މަނިކުފާނުގެ ދިފާއުގައި ވާހަކަފުޅު ދައްކަވައިފަ އެވެ.
ރައީސް ޔާމީން ވިދާޅުވީ ބޮޑެތި ކުށްތަކެއްގައި ތިބި ނުވަ މީހަކު ދޫކޮށްލަން ސުޕްރީމް ކޯޓުން އަމުރުކުރީ ނުފޫޒުތަކަކާ ހެދި ކަމަށެވެ. އެ ނުފޫޒުތަކުގައި ޖެހި، ކޯޓުގެ މިސްރާބު ހުރީ "ބަޣާވާތަކާ" ދިމާލަށް ކަމަށް ރައީސް ސިފަކުރެއްވި އެވެ.
ރައީސްގެ ވާހަކަފުޅުގެ ޚުލާސާ:
- ބޮޑެތި ކުށްވެރިންތަކެއް ދޫކޮށްލަން ކޯޓުން ކުރި އަމުރުން ދައުލަތް ހިންގުން ހުއްޓުމަކަށް އައި.
- ބަންޑާރަ ނައިބާއި ޕްރޮސެކިއުޓާ ޖެނެރަލްގެ އިތުރުން ޖުޑީޝަލް ސާވިސް ކޮމިޝަން (ޖޭއެސްސީ)ގެ ގާނޫނީ ޒިންމާ އަށް ހުރަސް އެޅުނު.
- ފަނޑިޔާރުން ޒިންމާދާރު ކުރުުވުމަކީ ގާނޫނުއަސާސީގައިވާ ގޮތުން ޖޭއެސްސީގެ ޒިންމާއަކަށްވި ނަމަވެސް އެ ބާރު ވެސް ސުޕްރީމް ކޯޓުން ނިގުޅައިގަތް.
- އަމުރު ތަންފީޒުކުރަން، މަސައްކަތް ކުރި ނަމަވެސް ދަތިތަކެއް ހުރެގެން، އުއްތަމަ ފަނޑިޔާރުގެ ސަމާލުކަމަށް ގެންނަން ކުރި މަސައްކަތަށް އެ މަނިކުފާނު އިޖާބައެއް ނުދެއްވި. ދައުލަތުގެ އެންމެ މަތީ ވެރިޔާގެ ހައިސިއްޔަތުން ހަތަރު އަމުރެއްކޮށް ސިޓީ ފޮނުވުމުން ވެސް ބަލައެއް ނުގަތް.
- ރައީސް މަގާމުން އަޒުލުކޮށް، ބަންޑާރަ ނައިބާއި ޕްރޮސެކިއުޓާ ޖެނެރަލަށް ފިޔަވަޅު އެޅުމުގެ ކަންކަން ސުޕްރީމް ކޯޓުން ކުރިއަށް ގެންދިޔަ.
- ފަނޑިޔާރުންނަށް އައިސްގެން އުޅުނީ ކޮން ނުފޫޒެއްތޯ އާއި ކިހާ ހިސާބަކުން އައި ބަޣާވާތެއްތޯ ބެލީ އެ ހިސާބުން.
- ދެން ފެނުނީ އުއްތަމަ ފަނޑިޔާރާއި އަލީ ހަމީދުގެ އިތުރުން ހަސަން ސައީދު ފްލެޓް ބައްލަވައިގަތް އެޕްލިކޭޝަނެއް. ޖިނާއީ މައްސަލައަކަށް ވި ނަމަވެސް ބާރުތަކެއް ސުޕްރީމް ކޯޓުން ނަގާފައިވާތީ، ތަހުގީގެއް ނުހިންގުނު.
- ކުއްލި ނުރައްކަލުގެ ހާލަތު އިއުލާންކުރީ ފަނޑިޔާރުން ޖަވާބުދާރީ ނުކުރެވިގެން. ތުހުމަތުތަކާ ގުޅޭ ގޮތުން ފުލުހުން ބައެއް ކަންކަން ހޯދައިފި.
މި ހާލަތު އޮތަސް އެއްވެސް ނުރައްކަލެއް ނެތް، އާންމު ދިރިއުޅުމަކަށް އެއްވެސް ހުރަހެއް ނެތް. ސުޕްރީމް ކޯޓު ވެސް ހިނގާނެ. އަނެއް ތިން ފަނޑިޔާރުންނަށް ކޮރަޕްޝަންގެ ތުހުމަތުތަކެއް ނެތް.
ގާނޫނުއަސާސީގައި ސުޕްރީމް ކޯޓަށް ބާރުތަކެއް ދީފައި އޮތް ނަމަވެސް، ރައީސް ޔާމީން ވިދާޅުވީ ބޮޑެތި ކުށްތަކެއްގައި ތިބި މީހުން ދޫކޮށްލަން ސުޕްރީމް ކޯޓުން ކުރި ހުކުމް ބަލައިގަންނަން އުނދަގުވީ، އެ އަމުރާ މެދު ދައުލަތުން އެއްޗެއް ބުނާނެ ޖާގަ ދީފައި ނެތުމުން ކަމަށެވެ. އެ އަމުރާ ގުޅޭ ގޮތުން އުއްތަމަ ފަނޑިޔާރާ ބައްދަލުކުރައްވަން އެ މަނިކުފާނު މަސައްކަތްޕުޅު ކުރެއްވި ކަމަށާއި އެކަމަކު އެ ޖާގަ ވެސް އުއްތަމަ ފަނޑިޔާރު ނުދެއްވި ކަމަށް ރައީސް ވިދާޅުވި އެވެ.
އެއާއެކު، ދައުލަތުގެ އެންމެ މަތީ ވެރިޔާގެ ހައިސިއްޔަތުން ހަތަރު އަމުރެއް ކުރެއްވުމުން ވެސް ކޯޓުން ބަލައިނުގަނެ، ގާނޫނާ ޚިލާފު ކަންތައްތަކެއް ކުރުމުގައި ދެމިތިބީ ކަމަށް ރައީސް ވިދާޅުވި އެވެ. އޭގެ ތެރޭގައި ޖުޑީޝަލް އެޑްމިނިސްޓްރޭޓަރު ހަސަން ސައީދު ހައްޔަރުކުރަން ކްރިމިނަލް ކޯޓުން ނެރުނު އަމުރު ބާތިލު ކުރުމާއި ކޮމިޝަނާ އޮފް ޕޮލިސްގެ މަގާމުން ވަކިކުރި ދެ ބޭފުޅަކު އަލުން އެ މަގާމަށް ގެންނަން މަސައްކަތް ކުރުމާއި، ސުޕްރީމް ކޯޓަށް ލިބިގެން ނުވާ ބާރެއްގެ ބޭނުންކޮށްގެން ރައީސް މަގާމުން އަޒުލުކުރުމުގެ މަސައްކަތްތަކެއް ކުރި ކަމަށް ރައީސް ވިދާޅުވި އެވެ.
"އެ ހިސާބުން އަޅުގަނޑުމެން ވިސްނީ ސުޕްރީމް ކޯޓަށް މި އުޅެނީ ކޮން ނުފޫޒެއް އައިސްގެންތޯ،" ރައީސް ވިދާޅުވި އެވެ.
އެކަން ބެލިއިރު، ހަސަން ސައީދު ފްލެޓް ގަންނަން ފޮނުއްވާފައި އޮތް އެޕްލިކޭޝަނަކާއި ސުޕްރީމް ކޯޓުގެ އިސް ފަނޑިޔާރު އަބްދުﷲ ސައީދާއި އަލީ ހަމީދުގެ މަސްލަހަތު ހުރި ފްލެޓްތަކެއްގެ އެޕްލިކޭޝަންތަކެއް ފެނުނު ކަމަށް ރައީސް ވިދާޅުވި އެވެ.
"އަޅުގަނޑުމެން ބަލަން ބޭނުންވީ ފަނޑިޔާރުގެ މައްސަލަތަކެއް ނޫން. އަޅުގަނޑުމެން ބަލަން ބޭނުންވީ ހަސަން ސައީދުގެ މައްސަލަ. އެކަމަކު ހަސަން ސައީދު ފިލީ،" ރައީސް ވިދާޅުވި އެވެ.
"ކުއްލި ނުރައްކަލުގެ ހާލަތު އިއުލާންކުރީ ފަނޑިޔާރުން ޖަވާބުދާރީ ކުރެވޭނެ ގޮތެއް ނެތިގެން. މިއީ ކިހާ ވަރެއްގެ ބަޣާވާތެއްކަން، ކިހާ ހިސާބަކުން އައި ބަޣާވާތެއްކަން އަޅުގަނޑު ދެނެގަންނަން ބޭނުންވެގެން."
އެކަމުގެ ހަގީގަތް ފުލުުހުން ހޯދާފައިވާ ކަމަށާއި އެ ތަފްސީލުތައް ވަރަށް އަވަހަށް ފުލުހުން ހާމަކުރާނެ ކަމަށް ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ކުއްލި ނުރައްކަލުގެ ހާލަތު އޮތަސް ސުޕްރީމް ކޯޓާއި އެހެން މުއައްސަސާތައް ވެސް ގާނޫނުއަސާސީއާ އެއްގޮތަށް ހިނގާނެ އެވެ.