ރޭގަނޑު 10:30 ގެ ފަހުން ސިޔާސީ އެއްވުން ބޭއްވުމަކީ މިރެއިން ފެށިގެން މަނާކަމެއް ކަމަށާއި އެފަދަ ކަންކަން ހުއްޓުވާނެ ކަމަށް ފުލުހުން ދެންމެ ބުނެފި އެވެ.
ފުލުހުން ބޭއްވި ނިއުސް ކޮންފަރެންސްގައި ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ، ރޭގަނޑު 10:30 ގެ ފަހުން މަގުމަތީގަ އާއި ސިޔާސީ ޕާޓީތަކުގެ ޖަގަހަތަކަށް މީހުން އެއްވެ ހިންގާ ހަރަކާތްތައް ހުއްޓުވާނެ ކަމުގެ ޔަގީންކަން ދޭ ކަމަށެވެ.
"އަދި ޚާއްސަކޮށް މިކަންކަން [ރޭގަނޑު 10:30 ގެ ފަހުން އެއްވެ އުޅުން މަނާކުރުން] ހަމަހަމަކަމާއެކު ސިޔާސީ އެއްވެސް ފަރާތެއް މީގެ ތެރެއިން އިސްތިސްނާ ނުވާނެ ގޮތަށް ތަންފީޒު ކުރާނެ ކަމުގެ ޔަގީންކަން ފުލުހުންގެ ފަރާތުން އަޅުގަނޑު އަރުވަން،" ޝިފާން ވިދާޅުވި އެވެ.
މި މަހުގެ ފަސް ވަނަ ދުވަހުގެ ރެ އިން ފެށިގެން ކުއްލި ނުރައްކަލުގެ ހާލަތު ރައީސް އަބްދުﷲ ޔާމީން އިއުލާން ކޮށްފައިވާއިރު، އެއްވެ އުޅުމުގެ ހައްގު ވަނީ ހިފަހައްޓައިފަ އެވެ. އޭގެ ފަހުން އިދިކޮޅު ފަރާތްތަކުން ކޮންމެ ރެއަކު މާލޭގައި އެމްޑީޕީގެ ހަރުގެ ސަރަހައްދަށް އެއްވެ އެވެ. އެކަމަކު ވަކި ހިސާބަކުން ކޮންމެ ރެއަކު ވެސް ފުލުހުން އިދިކޮޅު ފަރާތްތަކުގެ އެއްވުން ރޫޅާލާއިރު، ވެރިކަން ކުރާ ޕާޓީ، ޕީޕީއެމް ކޯލިޝަންގެ ޖަލްސާ އަށް ފުލުހުން ހުރަސް ނާޅާ ކަމަށް ބުނެ އިދިކޮޅު ފަރާތްތަކުން ދަނީ ކެނޑިނޭޅި ޝަކުވާ ކުރަމުންނެވެ.
ޕީޕީއެމުން މިއަދު ބޭއްވި ނިއުސް ކޮންފަރެންސެއްގައި، އެ ޕާޓީގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ވިދާޅުވީ، އެ ޕާޓީ އާއި ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމްގެ އޮފީހުން އިންތިޒާމުކޮށްގެން މަގުމައްޗަށް ނުކުމެ، ރައްޔިތުންނަށް ޖެއްސުން ކުރުމުގެ ނިޔަތުގައި ހަރަކާތްތައް ނުބާއްވާ ކަމަށެވެ. އޭނާ އަދި ޕީޕީއެމާއި ފަސްޓް ލޭޑީގެ އޮފީހުން ކުރިއަށް ގެންދާ ހަރަކާތްތަކަކީ ހުއްދަ ނުނަގައި، ރައްޔިތުންނަށް ޖެއްސުން ކުރުމުގެ ނިޔަތުގައި މަގުމަތީގައި ބާއްވާ ހަރަކާތްތަކެއް ނޫން ކަމަށެވެ. އެގޮތުން "ރުމާލު 2" ޖަގަހައިގައި ބޭއްވި ކޮންމެ ބައްދަލުވުމެއް ކުރިއަށް ގެންދިޔައީ ހަމަ އާއި އުސޫލާއި އިންސާފުގެ ތެރެއިން ކަމަށް އޭނާ ވިދާޅުވި އެވެ.
ފުލުހުންގެ ނިއުސް ކޮންފަރެންސްގެ ކުރިން ޕީޕީއެމުން މިއަދު އިއުލާން ކޮށްފައިވާ ގޮތުން އެ ޕާޓީގެ އެއްވެސް ހަރަކާތެއް ރޭގަނޑު 10:30 ގެ ފަހުން ނޯންނާނެ އެވެ.
މިއަދުގެ ނިއުސް ކޮންފަރެންސްގައި ޝިފާން ވިދާޅުވީ، އެއް ސަރަހައްދަކަށް ގިނަ ބަޔަކު އެއްވެ، ތަފާތު ހަރަކާތްތައް ހިންގާތީ އާންމު ދިރިއުޅުމަށް އުނދަގޫވާ ކަމުގެ ޝަކުވާ ފުލުހުންނަށް ކޮންމެ ރެއަކު ވެސް ލިބޭ ކަމަށެވެ. ޚާއްސަކޮށް އެ އެއްވުންތަކުގައި، ސަލާމަތީ ބާރުތަކަށް ފާޅުގައި ހަމަލަދީ، ނުވަތަ ހަމަލަ ދިނުމަށް ހިތްވަރު ދިނުން ފަދަ ކަންކަން ކުރާ ކަމަށް އޭނާ ވިދާޅުވި އެވެ.
"ޚާއްސަކޮށް މާސްކް ފަދަ މީހުންގެ ސިފަ ނޭނގޭ ގޮތަށް މޫނު ފޮރުވުމުގެ ނިޔަތުގައި އެކި ކަހަލަ އަމަލުތައް ކޮށް، މިފަދަ އެކި ކަންކަމުގެ ތެރެއިން ނުރައްކާތެރި އެތައް އަމަލުތަކެއް ހިނގަމުންދާކަން އަޅުގަނޑުމެން ފާހަގަކުރަން،" ޝިފާން ވިދާޅުވި އެވެ.
އޭނާ ވިދާޅުވި ގޮތުގައި ރޭގަނޑު 10:30 ގެ ފަހުން އެއްވެ އުޅުން މަނާކުރީ ގައުމުގެ ދާޚިލީ ކަންކަން ބެލެހެއްޓުމަށް ފުލުހުންނަށް ދަތިތަކެއް ކުރިމަތިވާތީ އެވެ.