މިދިޔަ ހޮނިހިރު ދުވަހުގެ ރޭ އެމްޑީޕީގެ ހަރުގެ ކައިރީގައި އިދިކޮޅު ފަރާތްތަކުން ބޭއްވި އެއްވުން ރޫޅާލަން އުޅުނު ބައެއް ފުލުހުން ހަރުގެ އަށް ވަދެ އެ ތަނުގައި ހުރި މުދަލަށް ގެއްލުން ދިން ކަމަށް ބުނެ، އެ މައްސަލަ ނޭޝަނަލް އިންޓެގްރިޓީ ކޮމިޝަން (އެންއައިސީ) އަށް އެ ޕާޓީން މިއަދު ހުށަހަޅައިފި އެވެ.
ސިޔާސީ ބޭފުޅުން ހިމެނޭ ގޮތަށް ނުވަ ގައިދީއަކު މިނިވަން ކުރުމަށް މިދިޔަ މަހުގެ 1 ގައި ސުޕްރީމް ކޯޓުން ކުރި އަމުރު ތަންފީޒު ކުރުމަށް ގޮވާލައި ކޮންމެ ރެއަކުހެން، ހަރުގެ ސަރަހައްދުގައި މުޒާހަރާ ކުރެ އެވެ. އަދި އެ މުޒާހަރާތައް ރޫޅައިލުމުގެ ތެރޭގައި ފުލުހުން ހާލަތާ ނުބައްދަލު ބާރުގެ ބޭނުން ކުރާ ކަމަށް އިދިކޮޅު ފަރާތްތަކުން ތުހުމަތު ކުރެ އެވެ.
އެމްޑީޕީން ބުނީ، ޣައިރު ގާނޫނީ އަމަލުތައް ހިންގަނީ ފުލުހުންގެ ތެރެއިން މަދު ބައެއް ކަމަށެވެ. އަދި ގިނަ ފުލުހުންނަކީ ގާނޫނަށް ލޯބިކުރާ ޒިންމާދާރު ބައެއް ކަމަށް އެ ޕާޓީން ބުންޏެވެ.
މަދު ފުލުހުންގެ މިފަދަ ދަށު ދަރަޖައިގެ އަމަލުތަކުގެ ސަބަބުން އިޚްލާސްތެރިކަމާ އެކީ ޚިދުމަތް ކުރަމުންދާ ފުލުހުންގެ ނަން ކިލަނބުވެގެންދާތީ ހިތާމަ ކުރާ ކަމަށް ވެސް އެމްޑީޕީން ބުންޏެވެ.
މީގެ އިތުރުން ސުލްހަވެރިކަމާ އެކު ބާއްވާ ސިޔާސީ އެއްވުންތައް ގާނޫނާ ހިލާފަށް ހުއްޓުވައި، ޕާޓީގެ މުދަލަށް ގެއްލުން ދޭ ފަރާތްތަކުގެ މައުލޫމާތު ކަމާ ބެހޭ ފަރާތްތަކަށް ކުރިމަގުގައި ހުށަހަޅާނެ ކަމަށް ވެސް އެމްޑީޕީން ބުންޏެވެ.
ޖުމްހޫރީ ޕާޓީގެ މައި ޖަގަހަ، މ. ކުނޫޒުގައި ތިބި މީހުންގެ ގަޔަށް ފުލުހުން ޕެޕާ ސްޕްރޭ ޖެހި މައްސަލަ އެ ޕާޓީން ވެސް ވަނީ އެންއައިސީ އަށް ހުށަހަޅައިފަ އެވެ.
