ރަހުމެއް، ކުލުނެއް، އިންސާނިއްޔަތުކަމެއް ވެސް ހަމަ ނެތީ ހެއްޔެވެ؟ ކުރީގެ ރައީސް މައުމޫން އަބްދުލް ގައްޔޫމް އިއްޔެ ކޯޓަށް ހާޒިރުކޮށް އެމަނިކުފާނަށް ޖެއްސި ހާލުން މި ސުވާލު ކުރަން އެތައް ބަޔަކަށް މަޖުބޫރުވީ އެވެ.
ކޮއްކޯފުޅު، ރައީސް އަބްދުﷲ ޔާމީންގެ ވެރިކަން ވައްޓާލަން އުޅުއްވުމުގެ ތުހުމަތުގައި ހައްޔަރުކޮށް ދޫނިދޫގައި ބަންދުކުރިތާ 40 ދުވަސް ފަހުން، ބަންދުގެ މުއްދަތު އިތުރުކުރަން މާލެ ގެނެސް ހަތް ގަޑިއިރު ވަންދެން ކޯޓު ތެރޭއި ބޭންދީ އެވެ. ވަކީލުން ވިދާޅުވާ ގޮތުގައި، މައުމޫނު އެގޮތަށް ބޭންދީ، އެއްވެސް ސަބަބެއް ނެތި އެވެ.
މައުމޫންގެ ބަންދާ މެދު ގޮތެއް ނިންމުމަށް އިއްޔެ މެންދުރު ފަހު، 3:30 ގައި ކޯޓަށް ހާޒިރުކުރި ގޮތަށް ކޯޓުގައި ބޭންދެވުމަށް ފަހު، ބަންދާ މެދު ގޮތެއް ނިންމުމުގެ މަޖިލިސް ކެންސަލްވި ކަން ވަކީލުންނަށް އެންގީ، ރޭ 11 ޖެހި ފަހުންނެވެ. އެހާއިރު ވަންދެން އެ މަނިކުފާނު އިންނަވަން ޖެހިވަޑައިގަތީ ކޯޓުގެ ގޮނޑިއެއްގައި ގިނިކަންޏާ އެވެ. އުމުރުފުޅުން، 80 އަހަރަށް ވުރެ މަތިވެފައިވާ މައުމޫނަށް މިއީ، ގައިމު ވެސް ފަސޭހަފުޅު ކަމަކަށް ނުވާނެ އެވެ.
މައުމޫންގެ ވަކީލު އަހްމަދު ފައިސަލް ރޭ ވިދާޅުވީ އެތައް އިރެއް ވަންދެން ކޯޓު ތެރޭގައި މައުމޫން ބޭންދި އިރު، ވަކީލުންނަށް އެ މަނިކުފާނާ ވާހަކަ ދެއްކެވުމުގެ ފުރުސަތު ވެސް ނުދިން ކަމަށެވެ. އެއްވެސް ސަބަބަކާ ނުލައި، އެ ހުރިހާ ވަގުތަކު މައުމޫން ކޯޓުގައި ބޭންދުމަކީ އެއްވެސް ހަމައަކުން ގަބޫލުކުރެވޭނެ ކަމެއް ނޫން ކަމަށް ވެސް އޭނާ ވިދާޅުވި އެވެ.
"ދިވެހިރާއްޖޭގައި 30 އަހަރު ވަންދެން ވެރިކަން ކުރައްވައި ދިވެހި ރައްޔިތުންނަށް އެތައް ޚިދުމަތެއް ކުރައްވައި ދިވެހިރާއްޖެ އަށް އެތައް ކުރިއެރުމެއް ހޯއްދަވައި ރައްޔިތުންގެ އިހްތިރާމާއި ލޯބި ލިބިވަޑައިގެން ހުންނެވި ބޭފުޅަކު އެހާ ގިނަ ވަގުތު އެއްވެސް ސަބަބެއް ނެތި ބޭންދުމަކީ އެއްވެސް ދިވެހި ރައްޔިތަކު ގަބޫލުކުރާނެ ކަމެއް ނޫން،" ފައިސަލް ވިދާޅުވި އެވެ.
ވަކީލުންނާއި އާއިލާއާ ވާހަކަ ދެއްކެވުމުގެ ފުރުސަތެއް ވެސް މައުމޫނަށް ލިބިވަޑައެއް ނުގެންނެވި އެވެ.
ރައީސް ޔާމީން ހިމެނިވަޑައިގަންނަވާ ގޮތަށް، ސަރުކާރުގެ އިސް މަގާމްތަކުގައި ތިއްބެވި ބޭފުޅުންނަށް މިއީ، ގާނޫނުގެ ކުރިމަތީގައި އެންމެން ހަމަހަމަކުރުމޭ ވިދާޅުވެ ނިންމާލެވިދާނެ އެވެ. އެކަމަކު، ރާއްޖޭގައި 30 އަހަރު ވަންދެން ވެރިކަން ކުރެއްވި، އަދި ދައުލަތުގެ އެންމެ މަތީ ޝަރަފާއި ލަގަބު އަރުވާފައިވާ ބޭފުޅަކަށް މިފަދަ "އިހާނެތި" ގޮތަކަށް އަމަލުކުރުމުން އެތައް ދިވެހިންނަކަށް ވަނީ އަސަރުކޮށްފަ އެވެ.
ސޯޝަލް މީޑިއާ އަށް ޖަޒުބާތު ބަންޑުންކޮށްލި މީހުން ބުނަނީ، ރާއްޖެ އަށް އެތައް ޚިދުމަތްތަކެއް ކޮށްދެއްވާފައިވާ ރައީސަކާ ދޭތެރޭގައި އެ ގޮތަށް އަމަލުކޮށްގެން ނުވާނެ ކަމަށެވެ. އެތައް ބަޔަކު އެކަން ސިފަކުރަނީ، "އަނިޔާ"ގެ އަމަލެއްގެ ގޮތުގަ އެވެ.
މިދިޔަ މަހުގެ ފަސް ވަނަ ދުވަހު ކުއްލި ނުރައްކަލުގެ ހާލަތު އިއުލާންކޮށް، މައުމޫން ހައްޔަރުކުރީ ސަރުކާރު ވައްޓާލަން ރޭވުމާއި ފަނޑިޔާރުންނަށް ރިޝްވަތު ދިނުމުގެ ތުހުމަތުގަ އެވެ. އޭގެ އިތުރުން ހެކި ނައްތައިލުމުގެ ދައުވާ ކޮށްދިނުމަށް އެދި ފުލުހުން ވަނީ ޕީޖީގެ އޮފީހަށް ފޮނުވައިފަ އެވެ. އެކަމަކު އެންމެ ފަހުން އެ މަނިކުފާނުގެ މައްޗަށް އުފުލާފައި ވަނީ ޓެރަރިޒަމްގެ ދައުވާ އެވެ.