ތަންތަނުގައި ހުޅު ޖަހައި ގެއްލުން ދެނީ އިދިކޮޅު ފަރާތްތަކުން ކަމަށް ޕީޕީއެމްގެ އިސް ބައެއް ބޭފުޅުން ވިދާޅުވެ، ރޭ ޕީޕީއެމްގެ ޖަގައިގެ އަލިފާނުގެ ހާދިސާ ހިންގީ ވެސް އިދިކޮޅު ފަރާތްތަކުން ކަމަށް ތުހުމަތުކޮށްފި އެވެ.
މާލޭހިޔާ ފްލެޓްތަކުގެ ފުރަގަހުން އޮންނަ ހުސް ބިމުގައި ޕީޕީއެމުން ހަދާފައިވާ "ރުމާލު 2" ޖަގަހައިގެ ސްޓޭޖުގައި ރޭ ރޯކޮށްލައި ބޮޑެތި ގެއްލުންތަކެއް ވަނީ ދީފަ އެވެ.
މިކަން ކުށްވެރިކުރައްވައި ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ވިދާޅުވީ ހުޅުޖެހުން ރާއްޖޭގެ ސިޔާސީ ހަރަކާތަކަށް ހަދަން މަސައްކަތް ކުރަނީ ފަނާކުރުމުގެ ވިސްނުމުގެ މީހުން ކަމަށެވެ. އެ ފަދަ ފިކުރުތައް ކުރިއަށް ނުދާނެ ކަމަށާއި ކާމިޔާބެއް ވެސް ނުލިބޭނެ ކަމަށް ނިހާން ވިދާޅުވި އެވެ.
ޕީޕީއެމްގެ ސެކްރެޓަރީ ޖެނެރަލް ޑރ. އަބްދުﷲ ޚަލީލް ވިދާޅުވި ގޮތުގައި، ހުޅުޖެހުން ފަދަ ފިނޑިއަމަލުތަކުން އެ ޕާޓީ ފަހަތަކަށް ނުޖެއްސޭނެ އެވެ. ރައީސް ޔާމީނާ އެކު ގައުމާއި ރައްޔިތުން ދާނީ ކުރިއަށް ކަމަށް ވެސް ވިދާޅުވި އެވެ.
އޭނާ ވިދާޅުވީ ގައުމުގައި ހުޅުޖަހަނީ ކޮންބައެއް ކަން އެނގޭ ކަމަށެވެ. ރިޔާސީ އިންތިހާބުގައި އެ މީހުންނަށް ރައްޔިތުން ބުނާނީ ނޫނެކޭ ކަމަށް ވެސް ވިދާޅުވި އެވެ.
ޕީޕީއެމުން ބުނީ ޖަގަހައިގައި އަލިފާން ޖެހީ ސައިކަލުގައި ދިޔަ ދެ މީހެއްގެ ތެރެއިން އެކަކު، ޖަގަހަ ބަލަހައްޓަން ހުރި ސެކިއުރިޓީ އަށް ބިރު ދައްކައި އެތެރެއަށް ވަނުމަށް ފަހު ކަމަށެވެ. އަލިފާން ރޯކުރަން ފުރަތަަމަ އުޅުނީ ޖަގަހައިގެ ފަސްޓް ފްލޯގައި ހިންގާ ޕީޕީއެމް ސޯޝަލް މީޑިއާ އޮފީހުގައި ކަމަށް ވެސް އިބްރާހިމް ވިދާޅުވި އެވެ.