ސިޔާސީ ޕާޓީތަކުގެ ޖަގަހަތަކާއި އެ ނޫން ވެސް ސިޔާސީ ހަރަކާތް ހިންގާ ތަންތަނަށް ރައްކާތެރިކަން ފޯރުކޮށްދޭން އިދިކޮޅު އެމްޑީޕީން މިއަދު ގޮވާލައިފި އެވެ.
އެ ޕާޓީން ނެރުނު ބަޔާނެއްގައި މިގޮތަށް ގޮވާލީ، މާލޭހިޔާ ފްލެޓްތަކުގެ ފުރަގަހުން އޮންނަ ހުސް ބިމުގައި، ވެރިކަން ކުރާ ޕާޓީ ޕީޕީއެމުން ހަދާފައިވާ "ރުމާލު 2" ޖަގަހައިގެ ސްޓޭޖުގައި ރޭ ރޯކޮށްލައި ބޮޑެތި ގެއްލުންތަކެއް ދިނުމާ ގުޅިގެންނެވެ.
އެކަން ކުށްވެރިކޮށް އެމްޑީޕީން ނެރުނު ނޫސް ބަޔާނެއްގައި ބުނީ ސިޔާސީ ހަރަކާތްތައް ހިންގާ ޖަގަހަތަކާއި އޮފީސްތަކާއި ސިޔާސީ ޕާޓީތަކުގެ މުދަލަށް ހަމަލާ ދިނުމަކީ މުޅި ސިޔާސީ ނިޒާމަށް ދެވޭ ހަމަލާއެއް ކަމަށެވެ.
އެމްޑީޕީން ބުނިގޮތުގައި ސިޔާސީ ހަރަކާތްތައް ހިންގާ ތަންތަނަށާއި އޮފީސްތަކުގެ އިތުރުން، ވަކިން ހާއްސަކޮށް ވާދަވެރި ސިޔާސީ ޕާޓީތަކުގެ އޮފީސްތަކަށާއި ހަރުގެތަކަށް ހަމަލާދީ ބޮޑެތި ގެއްލުން ދިނުން މިހާރު ވަނީ އާއްމުވެފަ އެވެ. އެގޮތުން، މާލެ އާއި އަތޮޅުތަކުގައި ހަދާފައިވާ އެމްޑީޕީގެ ހަރުގެތަކަށާއި ޖަގަހަތަކަށް ބޮޑެތި ގެއްލުންދީފައިވާ ކަމަށް ބަޔާނުގައިވެ އެވެ.
"މި ޕާޓީން އިސް ނަގައިގެން ހިންގާ ހަރަކާތްތަކަށް ފުލުހުން ހުރަސްއަޅައި ހުއްޓުވާއިރު ޕާޓީގެ މުދަލާއި ސިޔާސީ ހަރަކާތްތައް ހިންގުމަށް ކުއްޔަށް ހިފާ މުދަލަށް ވެސް ބޭނުން ނުކުރެވޭ މިންވަރަށް ގެއްލުން ދިނުމާއި، ހަރުގެތައް ރޫޅާލުމާއި އެމްޑީޕީގެ ދިދަތައް ނެގުން ފަދަ ކަންކަން ފުލުހުންގެ ކިބައިން ތަކުރާރުކޮށް ފެންނަމުން އަންނަކަން ހިތާމައާއެކު ފާހަަގަ ކުރަަމެވެ،" ބަޔާނުގައިވެ އެވެ.
އެމްޑީޕީން ބުނިގޮތުގައި މިފަދަ ކަންކަމަކީ، ޑިމޮކްރަޓިކް ސިޔާސީ ނިޒާމެއް ކުރިއެރުވުމަށް އެޅޭ ވަރަށް ބޮޑު ހުރަހެކެވެ. އެހެންކަމުން މިފަދަ ކަންކަން ތަހުގީގުކޮށް، އެ ކަންކަން ކުރުމުގައި ބައިވެރިވާ ފަރާތްތަކާ މެދު ހަރުކަށި ފިޔަަވަޅު އެޅުމަށް ވެސް ދައުލަތުގެ މުއައްސަސާތަކަށް އެމްޑީޕީން ވަނީ ގޮވާލައިފަ އެވެ.
ވަކި ފިކުރެއް ނުވަތަ ސިޔާސީ ވަކި ޕާޓީއަކަށް ބެލުމެއް ނެތި، ހަމަހަމަ އުސޫލުން ރައްކާތެރިކަން ފޯރުކޮށްދިނުމަށް ވެސް ސަލާމަތީ ޚިދުމަތްތަކަށް އެމްޑީޕީން ވަނީ ގޮވާލައިފަ އެވެ.
