ކުރިއަށް އޮތް ރައްޔިތުންގެ މަޖިލިހުގެ އިންތިޚާބަށް، ވެރިކަން ކުރާ ކޯލިޝަންގެ ޕާޓީތަކަށް ދާއިރާތައް ނުވަތަ ގޮނޑިތައް ބަހާނެ ގޮތަކާ މެދު އަދި ގޮތެއް ނުނިމޭ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު އަބްދުﷲ (މުހައްމާ) އެމްޑީޕީއަށް ސޮއިކުރެއްވުމަށް، ނަޝީދު ދިރިއުޅުއްވާ ގެކޮޅުގައި ބޭއްވި ރަސްމިއްޔާތުގައި އެމަނިކުފާނު ވިދާޅުވީ އަންނަ އަހަރުގެ މާޗް މަހު ބާއްވާ ރައްޔިތުންގެ މަޖިލީހުގެ އިންތިޚާބަށް ކޯލިޝަންގެ ޕާޓީތަކަށް ގޮނޑިތައް ބަހާނެ ގޮތަކާ މެދު ބައެއް މަޝްވަރާ ކޮށްފައިވާ ކަމަށެވެ.
"އެހެން ނަމަވެސް އެ ގޮނޑިތަކުގައި، ވަކި ގޮނޑިތަކަކަށް ވާދަކުރާނީ ކޮން ޕާޓީތަކަކުންތޯ މި ސުވާލުތަކަށް އަދި ވަނީ ޖަވާބެއް ނުލިބި. ނޫނީ އަދި އެނިންމުންތައް ވަނީ އަޅުގަނޑުމެންނަށް ނުނިންމި،" ނަޝީދު ވިދާޅުވި އެވެ.
އެމްޑީޕީގެ ޗެއާޕާސަން ހަސަން ލަތީފް ވެސް ބައިވެރިވެވަޑައިގެންނެވި އެ ހަފްލާގައި ނަޝީދު ވިދާޅުވީ، ގާނޫނުއަސާސީ އަށް 2008 ވަނަ އަހަރު އަމަލުކުރަން ފެށި ފަހުން އެމްޑީޕީން އައީ ރައްޔިތުންގެ މަޖިލިހުގެ ހުރިހާ ގޮނޑި އަކަށް ވެސް ވާދަކުރަމުން ކަމަށެވެ. އަދި ވިދާޅުވީ، އެ ޕާޓީގެ ހުރިހާ މެމްބަރުންގެ ވެސް އެންމެ ބޮޑު އުއްމީދަކަށް އަނެއްކާ ވެސް ވާނީ ކުރިއަށް އޮތް ރައްޔިތުންގެ މަޖިލިހުގެ އިންތިޚާބުގައި ވީހާ ވެސް ގިނަ ގޮނޑިއެއް ކާމިޔާބު ކުރުން ކަމަށެވެ.
"އިރާދަކުރެއްވިއްޔާ ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެމްޑީޕީ އެކަށީގެންވާ ކާމިޔާބެއް ހޯދާނެ" ނަޝީދު ވިދާޅުވި އެވެ.
މުހައްމާ އެމްޑީޕީއަށް ސޮއިކުރެއްވުމުން އޭނާ އަށް މަރުހަބާ ދަންނަވަމުން ނަޝީދު ވިދާޅުވީ، އޭނާ އެ ފިޔަވަޅު އެޅުއްވީ، މަޖިލިސް އިންތިޚާބުގައި އިހަވަންދޫ ދާއިރާއަށް އެމްޑީޕީން ފުރުސަތު ލިބޭނީ ޕްރައިމަރީއަކަށް ފަހު ކަމަށް ގަބޫލުކު ކުރައްވައިގެން ކަމަށެވެ.
ނަޝީދު ވިދާޅުވިގޮތުގައި، ރައްޔިތުންގެ މަޖިލިހުގެ އިންތިޚާބުގައި އެމްޑީޕީގެ ޓިކެޓުގައި ވާދަކުރަން ބޭނުންވާ މީހުންނަށް އެ ފުރުސަތު ފަހިވާނީ ޕްރައިމަރީގައި ވާދަކޮށްގެން ކަމަށެވެ.
މިދިޔަ ސެޕްޓެމްބަރު 23 ގައި ބޭއްވި ރިޔާސީ އިންތިޚާބަށް، އެމްޑީޕީ އާއި ޖުމްހޫރީ ޕާޓީ އާއި އަދާލަތު ޕާޓީ އަދި ކުރީގެ ރައީސް މައުމޫން އަބްދުލްގައްޔޫމް ވަނީ އެއްބަސްވުމެއް އެކުލަވާލައިފަ އެވެ. މައުމޫން ފިޔަވައި އެހެން ހުރިހާ ލީޑަރުން މިހާތަނަށް އެ އެއްބަސްވުމުގައި ސޮއިކުރައްވާފައިވާއިރު، ކުރިއަށް އޮތް ރައްޔިތުންގެ މަޖިލިހުގެ އިންތިޚާބާއި ލޯކަލް ކައުންސިލްތަކުގެ އިންތިޚާބުގައި ގުޅިގެން މަސައްކަތް ކުރަން ވަނީ އެއްބަސްވެފަ އެވެ.