ފެންކުންފުނީގެ ޗެއާމަން މައުސޫމް ވެސް ގޭގައި މަޑުކުރަން އަންގައިފި

ފެން ކުންފުނީގެ ޗެއާމަން އަދި އެމްޑީޕީގެ ޗެއާޕާސަންގެ ކުރީގެ ނައިބު (މާލީ) އަހްމަދު މައުސޫމްގެ ހިއްސާ އޮންނަ ދެ ކުންފުންޏަކަށް، އެސްއޯއެފުން 6.1 މިލިއަން ޑޮލަރު (93.5 މިލިއަން ރުފިޔާ) ޖަމާކޮށްފައިވާ މައްސަލައިގައި، މައުސޫމް ވެސް ގޭގައި މަޑުކުރަން ރައީސް އޮފީހުން އަންގައިފި އެވެ.

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ދައުލަތަށް ލިބެން ޖެހޭ 1.3 ބިލިއަން ރުފިޔާ އަށް ހިޔާނާތްވި މައްސަލައިގައި ހިންގި ތަހުގީގު ރިޕޯޓު ނެރުނު އިރު ދައުލަތުގެ ފައިސާ އެސްއޯއެފުން ޖަމާކުރި މީހުންނާއި ކުންފުނިތައް އާއްމުކޮށްފައިވެ އެވެ.

ރައީސް އިބްރާހިމް މުހައްމަދު ސޯލިހްގެ ތަރުޖަމާން އިބްރާހިމް ހޫދު މިއަދު ވިދާޅުވީ އޭސީސީގެ ރިޕޯޓުގައި ހިމެނޭ ކަންކަން މުއައްސަސާތަކުން އިތުރަށް ބަލައި ނިމެންދެން ގޭގައި މަޑުކުރަން އެންގި ބޭފުޅުންގެ ތެރޭގައި މައުސޫމް ވެސް ހިމެނިވަޑައިގަންނަވާ ކަމަށެވެ.

އޭސީސީގެ ރިޕޯޓުގައިވާ ގޮތުން ދައުލަތުގެ ފައިސާ އިން މަނީ ލޯންޑަރިން ހިންގި އެސްއޯފުން ފައިސާ ޖަމާކޮށްފައި ވަނީ މައުސޫމްގެ ހިއްސާ އޮންނަ، ސީޖީޓީ އާއި އެމްސީ މޯލްޑިވްސް ޕްރައިވެޓް ލިމިޓެޑަށެވެ.

ސީޓީޖީގައި މައުސޫމްގެ އިތުރުން ހިއްސާ އޮންނަނީ، އަބްދުﷲ ރާފިއު، މއ. ޝޭޑީ ކެބިން އާއި އުމަރު ޖަމާލް، މއ. ތިނަދޫ އާއި އަހްމަދު ޒާހިރު، މާހީ، ސ. ހިތަދޫ، އެވެ.

އެ ކުންފުންޏަށް ޖުމްލަ 5.7 މިލިއަން ޑޮލަރު (88.5 މިލިއަން ރުފިޔާ) ޖަމާކޮށްފައިވާ ކަމަށް އޭސީސީގެ ރިޕޯޓުގައިވެ އެވެ.

ރާފިއު އަކީ، ޚިޔާނާތުގެ މުގުލުގައި ހުންނެވި އެއް ބޭފުޅާ ކަމަށްވާ ކުރީގެ ނައިބު ރައީސް އަހްމަދު އަދީބުގެ ކުރީގެ އަނބިކަނބަލުން ފާތިމަތު ލިއުޝާގެ ބޮޑު ބޭބެ އެވެ. ރާފިއު ހިއްސާވާ، ސީޖީޓީ އަށް 4.9 މިލިއަން ޑޮލަރު ޖަމާކުރުމުގެ އިތުރުން ސިލޯން ބޭންކުގައި ހުޅުވާފައިވާ ރާފިއުގެ އެކައުންޓަކަށް 1.6 މިލިއަން ޑޮލަރު (25 މިލިއަން ރުފިޔާ) އެސްއޯއެފުން ޖަމާކޮށްފައިވާ ކަމަށް ރިޕޯޓުގައިވެ އެވެ.

- ކޭޝްގެ ގޮތުގައި 1.6 މިލިއަން ޑޮލަރު ވިތުޑްރޯ ކުރި

- ސީޖީޓީ ކުންފުންޏަށް 800،000 ޑޮލަރު ޓްރާންސްފާ ކުރި

- މެޑިކުއިޕް މޯލްޑިވްސް ޕްރައިވެޓް ލިމިޓެޑްގެ އެކައުންޓަށް 150،000 އެމެރިކާ ޑޮލަރު ޖަމާކުރި

- އައިމާ ކޮންސްޓްރަކްޝަނަށް 100،000 ޑޮލަރު ޖަމާ ކުރި

- ރާފިއުގެ ނަމުގައި ބޭންކް އޮފް ސިލޯންގައި ހުޅުވާފައިވާ ރުފިޔާ އެކައުންޓަށް 10 މިލިއަން ރުފިޔާ ޖަމާކޮށްފައިވޭ.

ރާފިއުގެ ވެސް ހިއްސާ އޮންނަ ސީޖީޓީގެވިޔަފާރިތަކަކީ ސިނގިރެޓް ވިއްކާ ރޫޓް ފިހާރަ އާއި ކެފޭ އަލްފްރެސްކޯ އާއި ސީޖީޓީ ކައުންޓާގެ އިތުރުން ސީޖީޓީ އައްޑޫ އެވެ.

ސީޖީޓީ އިން 2014 ގައި 500 މިލިއަން ރުފިޔާގެ ވިޔަފާރިކޮށްފައިވާ އިރު އޭގެތެރެއިން އެންމެ ގިނަ އާމްދަނީ ލިބުނީ ސިނގިރެޓް ވިއްކައިގެން ކަން އޭސީސީގެ ރިޕޯޓުގައި ފާހަގަކޮށްފައިވެ އެވެ. އޭސީސީން ބުނިގޮތުގައި ގިނަ އަދަދެއްގެ ފައިސާ ސިނގިރެޓް ގަތުމަށް ރާއްޖެ އިން ބޭރަށް ވެސް ފޮނުވަ އެވެ.

އޭސީސީން ބުނެފައިވާ ގޮތުގައި އެމްއެމްޕީއާރުސީގެ ފައިސާގެ ތެރެއިން ސީޖީޓީގެ ބޭނުމަށް 88.5 މިލިއަން ރުފިޔާ ބޭނުންކޮށްފައިވާ އިރު ބަދަލުގައި އެސްއޯއެފަށް ނުވަތަ އެމްއެމްޕީއާރުސީ އަށް އެއްވެސް ފައިސާއެއް ސީޖީޓީ ޕްރައިވެޓް ލިމިޓެޑުން ނުވަތަ އަބްދުﷲ ރިފާއު ދެއްކި ކަން އެނގޭކަށެއް ނެތެވެ.

ސީޖީޓީ އިތުރުން، ރައީސް މުހައްމަދު ނަޝީދުގެ ސަރުކާރުގައި ރައީސް އޮފީހުގެ ޗީފް އޮފް ސްޓާފުގެ މަގާމުގައި ހުންނެވި މައުސޫމްގެ ހިއްސާ އޮންނަ އެމްސީ މޯލްޑިވްސްގެ ހިއްސާދާރުންނަކީ ރާފިއު އާއި މުހައްމަދު ހަމީދު، މއ، ޑޯންލައިންޓް، އެވެ. މި ކުންފުނީގެ ވިޔަފާރިތަކަކީ އެމްސީ ވެއާ ފިހާރަ އާއި އެމްސީ މޯލްޑިވްސް ބޮންޑެޑް ވެއާހައުސް އެވެ.

އެމްއެމްޕީއާރުސީގެ ފައިސާގެ ތެރެއިން އެސްއޯއެފުން އެމްސީ މޯލްޑިވްސް ކުންފުންޏަށް 328،052 ޑޮލަރު ޖަމާކޮށްފައި ކަމަށް ރިޕޯޓުގައިވެ އެވެ. ހަމަ އެ ދުވަހު، އެ ފައިސާ، އިނގިރޭސިވިލާތުގެ ކުންފުންޏެއް ކަމަށްވާ އޮމްނިއާ ސްޓެރެޓެޖީ އަށް ޖަމާކޮށްފައިވާ ކަމަށް އޭސީސީން ބުންޏެވެ.

އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއާގެ އަނބިކަނބަލުން ޝެރީ ބްލެއާގެ އޮމްނިއާ ސްޓްރެޓެޖީ އަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ދިވެހި ސަރުކާރުގެ މޫނު މަތި ރީތި ކުރަން ލަފާ ދިން ކުންފުންޏެވެ. ފޮރިން މިނިސްޓްރީން ބޭއްވި ޕްރެސް ކޮންފަރެންސްތަކުގައި އެ ކުންފުނިން ބައިވެރިވެފައިވާ ކަން އޭސީސީގެ ރިޕޯޓުގައި ވެސް ފާހަގަކޮށްފައިވެ އެވެ.

އޭސީސީގެ ތަހުގީގަށް ރާފިއު ދިން ބަޔާނުގައިވާ ގޮތުން އެމްސީ ކުންފުނިން އޮމްނިއާ އަށް ފައިސާ ޖަމާކުރީ، އެސްއޯއެފްގެ އެއް ހިއްސާދާރު މުހައްމަދު އަބްދުލް އައްލާމް ލަތީފް (މޮހޯ) އެދިގެންނެވެ. އެއީ ކޮން ބޭނުމަކު ކަން ސާފު ނުކުރާ ކަމަށާއި އެ ފައިސާ ޖަމާކުރީ އިނގިރޭސިވިލާތުގެ ލޯފާމަކަށްކަން އެނގުނީ ރޭޑިއޯ އިން ކަމަށް ރާފިއު ބުނެފައިވެ އެވެ.

އެއީ، ފޮރިން އެފެއާޒް މެދުވެރިކޮށް ސަރުކާރުން އެ ކުންފުންޏަށް ދިން ފައިސާ ކަަމަށް ސަރުކާރުން ނޫސް ބަޔާނެއް ނެރުމުން، އެކަން ހިނގައި ދިޔަ ގޮތް ޕޮލިހަށް ރިޕޯޓް ކުރި ކަމަށް ބަޔާނުގައި ރާފިއު ބުނެފައިވެ އެވެ. އެ މައްސަލައިގައި އޭނާގެ ބަޔާން ވެސް ފުލުހުން ނެގި ކަމަށް އޭސީސީގެ ތަހުގީގުގައި ރާފިއު ބުނެފައިވެ އެވެ.

އެސްއޯއެފުން ފައިސާ ޖަމާކުރި މައްސަލައިގައި މައުސޫމްގެ އިތުރުން ވެސް ސަރުކާރުގެ އިސް ބޭފުޅުންތަކެއް ވަނީ ސަސްޕެންޑްކޮށްފަ އެވެ. އޭގެތެރޭގައި ޔޫތު މިނިސްޓަރު އަހްމަދު މަހްލޫފާއި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އާއި އައައިލެންޑް އޭވިއޭޝަންގެ ބޯޑު މެމްބަރު އާޒިމް ހިމެނެ އެވެ. އެސްއޯއެފުން ފައިސާ ޖަމާކުރި ލިސްޓުގައި ވިޔަފާރިވެރިންގެ އިތުރުން ރައްޔިތުންގެ މަޖިލީހުގެ ބައެއް މެމްބަރުން ވެސް ހިމެނެ އެވެ.