ކޮވިޑް-19 ފެތުރުން ކޮންޓްރޯލްކުރުމަށް މާލެ ލޮކްޑައުންކޮށް ގޭގޭގަައި މީހުން ބައިތިއްބައިގެން ގެތަަކަށް ބޭނުންވާ ތަކެތި ޑެލިވަރީ ކޮށްދޭން ރޭވި ނިޒާމު މަސައްކަތް ނުކުރި ކަމަށާއި މަގުތަކަށް މީހުން ގިނަވީ އެހެންވެ ކަމަަށް ފުލުހުން މިއަދު ބުނެފި އެވެ.
ނެޝަނަލް އިމަޖެެންސީ އޮޕަރޭޝަން ސެންޓަރު ގައި މިއަދު ހަވީރު ބޭއްވި ޕްރެސް ބްރީފިންގައި ޑެޕިއުޓީ ކަމިޝަނާ އޮފް ޕޮލިސް އަބްދުލް މަންނާނު ޔޫސުފް ވިދާޅުވީ މާލޭގައި ޑެލިވަރީކޮށްގެން ގޭގެެއަށް ހިދުމަތް ދެވޭނެ ކަމަށް ކުރިން ގަބޫލު ކުރެވުނު ނަމަވެސް އެގޮތަށް ކަންތައް ނުވި ކަމަށެވެ. އޭނާ ވިދާޅުވީ މާލޭގެ ބޮޑެތި ފިހާރަތަކާ ފުލުހުން ވާހަކަ ދެއްކި ކަމަށާއި ބައެއް ފިހާރަތަކުން 4،000 އަށް ވުރެ ގިނަ އޯޑަރު ޑެލިވަރީ ނުކުރެވި ހުރި ކަމަށެވެ. ވިޔަފާރި ކުރަން ނުކުމެ އުޅުނު ބައެއް މީހުންނާ ވެސް ފުހުން ވާހަކަ ދެއްކި ކަމަށާއި ފިހާރަތަކާ ގުޅޭނެ ގޮތެއް ވެސް މީހުންނަށް ނެތް ކަމަށެެވެ.
"އޭގެ ސަބަބުން ގޭގައި އެ ހުރި އެއްޗެއް ހުސްވެގެން މަގުމައްޗަށް ނުކުންނަން، ހަމަ އެބޭފުޅުންގެ އިބާރާތުން ނަމަ ހަމަ އެނޫން ގޮތެއް ނެތިގެން ނުކުންނެވި ވަރަށް ގިނަ ބޭފުޅުންނާ ދިމާވި.އެހެންވީމާ މިދެންނެވިހެން ގިނަ އަދަދެއްގެ ބަޔަކަށް އެގެެއަށް ބޭނުންވާ ޒަރޫރީ ކާބޯތަކެތި ފޯރުކޮށް ނުދެވި އޮންނަ އޮތުން އޮތުމަށް ހައްލެއް ގެނައުމަށް މި ދެންނެވި މި އައި އާ ބަދަލުތައް މި ގެނެވެނީ،" މަންނާނު ވިދާޅުވި އެވެ.
އޭނާ ބިދާޅުވި ގޮތުގައި މީހުން ގޭގައި މީހުން ބައިތިއްބައިގެން ޑެލިވަރީ ކުރެވޭނެ ކަމަށް ކުރިން ބެލި ނަމަވެސް ލޮކްޑައުންގެ ފުރަތަމަ ހަތަރު ދުވަހުގެ ތަޖުރިބާއިން އެނގުނީ ރާއްޖޭގައި އަދި ހާއްސަކޮށް މާލޭގައި އެ ނިޒާމު މަސައްކަތް ނުކުރިކަން ކަމަށެވެ. އޭނާ ވިދާޅުވީ ރާއްޖޭގެ ގިނަ ފިހާރަތައް ހުރީ އެގޮތަށް ތައްޔާރުވެފައި ނޫން ކަމަށެވެ.
"އޭގެ ސަބަބުން، ގެތަކުގައި މަޑުމަޑުން ތިއްބެވި، ނުނުކުންނަވާ ތިއްބެވި ބޭފުޅުންނަށް ވަކި ވަގުތެއްވީ ތަނާ ގޭގައި ހުރި ކާއެއްޗިހި ހުސްވެގެން މަގުމައްޗަށް ނުކުންނަވަން ޖެހިވަޑައިގަތީ،" މަންނާނު ވިދާޅުވި އެވެ.
އޭނާ ވިދާޅުވި ގޮތުގައި އެގޮތަށް ކާބޯތަކެތި ހުސްވެެގެން މީހުން ނުކުތީމާ މަގުތަކަށް މާ މީހުން ގިނަވާނެ ކަމަށް ބެލެވޭ ކަމަށާއި އިންތިޒާމްވެގެން ވަކި ވަގުތުތަކެެއްގައި ނުކުންނަން ހުއްދަ ދިނުމުން އެއް ފަހަރާ ނުކުންނަ މީނުން މަދުވާނެ ކަމަށެވެ.
އެސިސްޓެންޓް ކޮމިޝަނާ އޮފް ޕޮލިސް ޑރ. އަބްދުﷲ ފައިރޫޝް ވިދާޅުވީ ލޮކްޑައުންއާ ގުޅިގެން ރާއްޖޭގެ އެހެން ސަރަހައްދުތަކަށް ނުގެންދެވި ހުރި ތަކެތި ގެންދިއުމުގެ އިންތިޒާމް ވެސް ހަމަޖައްސަން ޖެހޭ ކަމަށާއި ޑެލިވަރީގެ ކަންތައް ފުލުހުންގެ ފަރާތުން ވެސް ފެސިލިޓޭޓް ކޮށްދޭން މަޝްވަރާކޮށްފައިވާ ކަމަށެވެ.
އޭނާ ވިދާޅުވީ ޑެލިވަރީ ކުރެވޭނެ އިންތިޒާމް ހަމަޖައްސައިދިނުމަށް ޓަކައި 3،000 އަށް ވުރެ ގިނަ ފަރާތްތަކަށް ހުއްދަ ވެސް ދޫކޮށްފައިވާ ކަމަށެވެ. މާލޭގެ 26 ސެކްޓާއެއްގައި ވަކި ވަގުތުތަކެއްގަައި ހުއްދަ ދޭ މީހުން ނުކުންނަ ގޮތަށް ހެދިޔަސް، ޑެލިވަރީ ނިޒާމު މުޅިން ހުއްޓިއްޖެ ނަމަ ގޭބިސީތަކަކަށް ބޭނުންވާ ތަކެތި ނުހޯދޭނެ ކަމަށް ވެސް އޭނާ ވިދާޅުވި އެވެ.
ފައިރޫޝް ވިދާޅުވި ގޮތުގައި މާލޭގެ މަގުމައްޗަށް މީހުން ގިނަ ވިޔަސް އޭގެ މާނައަކީ މީހުން ގަވައިދާ ހިލާފަށް ނުކުތުމެއް ނޫން ކަމަށާއި ޒަރޫރީ އެތައް މަސައްކަތްތަކެއް ކުރަން ހުއްދަ ދީފައިވާ އެތައް ބަޔަކު ނުކުންނަ ކަަމަށެވެެ. އޭގެ ތެރޭގައި ޑެލިވަރީ ކުރާ ފަރާތްތަކާއި ސިއްހީ އެކިއެކި އިންތިޒާމްތައް ހަމަޖައްސަން މަސައްކަތް ކުރާ މީހުން ވެސް ހިމެނެ އެވެ.
"މިދެންނެވި ސަބަބުތަކަށްޓަކައި މަގުމަތީގައި ތަންކޮޅެއް މީހުން ގިނަ. ބޭނުންވާ ވަރަށް ވުރެ މާގިނަ. އެހެން ނަމަވެސް މިހާލަތުން އަރައިގަންނާނެ ގޮތް ވެސް ހަމަޖެއްސޭނީ ކޮންމެވެސްް ބަޔަކަށް މަގުމައްޗަށް ނުކުމެވޭނެ ގޮތް ހަމަޖައްސައިގެން ކަމަށްވާތީ، މި ހުއްދަތައް ދޭން ޖެހޭ. އެހެންވީމާ ވީހާވެސް ބޮޑަކަށް މި ހުރިހާ ކަމެއް ވެސް ކޮންޓްރޯލް ކޮށްގެން އަޅުގަނޑުމެންގެ މަސައްކަތް މި ބައްޓަން ކުރަނީ،" ފައިރޫޝް ވިދާޅުވި އެވެ.
