ކުރީގެ ހޯމް މިނިސްޓަރު އުމަރު ނަސީރު. އޭނާ ވިދާޅުވީ ލޮކްޑައުންގެ ގެއްލުން މާބޮޑު ކަމަށް
01 މެއި 2020 - 23:03
55 comments
އިގްތިސާދު ހުއްޓުވާލައިގެން ލިބޭ ގެއްލުން މާބޮޑު ކަމަށާއި ކޮރޯނާ ވައިރަސްއާ އެކު ދިރިއުޅެން ދަސްކުރަން ޖެހޭ ކަަމަށް ވިދާޅުވެ، އެ ވައިރަސް ފެތުރުން ކޮންޓްރޯލް ކުރަން މާލެ ސަރަހައްދު ލޮކްޑައުން ކޮށްފައިވާތީ ކުރީގެ ހޯމް މިނިސްޓަރު އުމަރު ނަސީރު މިއަދު ފާޑުވިދާޅުވެއްޖެ އެވެ.
އުމަރު އޭނާގެ ފޭސްބުކްގައި ލިޔުއްވި ޕޯސްޓެއްގައި ވިދާޅުވީ، ސަރުކާރުގެ މުވައްޒަފުންނަށް މުސާރަ ލިބުނަސް އަމިއްލަ ދާއިރާތަކުގައި މަސައްކަތް ކުރާ 120،000 އަށް ވުރެ ގިނަ މީހުން ތިބީ މުސާރައެއް ނުލިބި ކަމަށެވެ. ބިދޭސީންގެ ގިނަ ބަޔަކު ކާބޯތަކެތި ނުލިބިގެން ސަލާން ޖަަހަމުންދާ ކަމަށް "މިހާރު"ގައި މިއަދު ލިއުނު ޚަބަރުގެ ސްކްރީން ޝޮޓެއް ހިއްސާ ކުރައްވަމުން އޭނާ ވިދާޅުވީ "އެތައް ދިވެހިންނެއް ވެސް ތިބީ ބަނޑުހައި ހޫނުކަމުގައި" ކަމަށެވެ.
"ލޮކްޑައުން އަކީ ހައްލެއް ނޫން. އިގްތިސާދު ހުއްޓުވާލައިގެން ތިބުމުގެ ގެއްލުން މާބޮޑު. ކޮރޯނާ ވައިރަސްއާ އެކު ދިރިއުޅެން ދަސްކުރުން ނޫން ގޮތެއް ނެތް،" އުމަރު ވިދާޅުވި އެވެ.
އުމަރު ވިދާޅުވި ގޮތުގައި، އެހެން ގައުމުތަކުގައި ވެސް ދަނީ ލޮކްޑައުންގެ ހާލަތު ދޫކޮށްލަމުންނެވެ. އޭގެ ބަދަލުގައި އެ ގައުމުތަކުން ދަނީ "ހާޑް އިމިއުނިޓީ" އާ ދިމާއަށް ކަމަށް އުމަރު ވިދާޅުވި އެވެ.
"ލޮކްޑައުންގެ ވިސްނުން މުރާޖައާ ކުރަންޖެހޭ. ލޮކްޑައުން އަކީ ވައިރަސް އަށް ވުރެ ބޮޑު ގެއްލުމެއް ދޭ ކަމެއް،" އޭނާ ވިދާޅުވި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އެޕިޑެމިއޮލޮޖިސްޓް ޑރ. އިބްރާހީމް އަފްޒަލް ވެސް ކުރިން ވިދާޅުވީ ލޮކްޑައުންގައި އަބަދު ނުތިބެވޭނެ ކަމަށާއި ކޮންމެވެސް ވަގުތަކުން އެ ފިޔަވަޅު ދޫކޮށްލަން ޖެހޭނެ ކަމަށެވެ. އެހާ ހިސާބަށް ނަފްސާނީ ގޮތުން މީހުން ތައްޔާރުވާން ޖެހޭނެ ކަމަށް ވެސް އޭނާ ވިދާޅުވި އެވެ.
"ހަގީގަތުގައި ވެސް ކޯވިޑް އޮތް ތަނެއްގައި ދިރިއުޅޭ މީހުންގެ ދިރިއުޅުމުގެ ވައްޓަފާޅި އަށް ބައިވަރު ބަދަލުތަކެއް ގެންނަން ޖެހޭނެ،" ޑރ. އަފްޒަލް ކުރިން ވިދާޅުވެފައި ވެ އެވެ.
އުމަރުގެ ފޭސްބުކް ޕޯސްޓް
އެ ބަލި މުޖުތަމައުގެ ތެރޭގައި ފުޅާ ދާއިރާއެއްގައި ފެތުރިފައިވާ ހާލަތުގައި ދިރިއުޅުމުގެ ވައްޓަފާޅި އަށް ގެންނަންޖެހޭ ބަދަލުތަކުގެ ތެރެއިން ފުރަތަމަ ކަމަކީ ޑރ. އަފްޒަލް ވިދާޅުވި ގޮތުގައި މީހުންނާ ބައްދަލުކުރުން މަދުކުރުމެވެ. އެގޮތުން، ކޮންމެހެން ބައްދަލުކުރަން ޖެހޭ ބަޔަކާ ނޫނީ ބައްދަލު ނުކުރުމަކީ ދިރިއުޅުމުގެ އާދަކާދައަކަށް ހަދަން ޖެހޭނެ ކަމަށް އޭނާ ވިދާޅުވި އެވެ.
ދެވަނަ ކަމަކީ ކޮވިޑްގެ އަލާމާތެއް ފެނޭތޯ ބަލައި އެ ކަމަށް ހުށިޔާރު ވެގެން އުޅުމެވެ. އެފަދަ ކަމެއް ފާހަގަ ވެއްޖެ ނަމަ ކަމާ ބެހޭ ފަރާތްތަކަށް ވީހާ ވެސް އަވަހަކަށް އެންގުމަކީ އެގޮތުން ކުރަން ޖެހޭނެ ކަމެކެވެ. ބަލި ޖެހޭ މީހުން، އެ މީހުން ދިރިއުޅޭ ތަންތަނުގައި ކަރަންޓީނު ކުރަން ޖެހުމަކީ ވެސް ބަލި ފެތުރޭ މަރުހަލާގައި އަންނާނެ ކަމެއް ކަމަށް ޑރ. އަފްޒަލް ވިދާޅުވި އެވެ.
"ހުރިހާ އެންމެން، ރާއްޖޭގެ އާބާދީގެ ބޮޑުބައެއް، ކަރަންޓީނު ފެސިލިޓީއަކަށް އެކޮމޮޑޭޓެއް ނުވެސް ކުރެވޭނެ،" އޭނާ ވިދާޅުވެފައި ވެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބުމަރު
05 May 2020
އަޑީގަ އުޅެއުޅެފަ ނޭވާލާންވީމަ މައްޗަށް އަރާވެލާ ރޯނުއެދުރު
ފިނިހަކި
03 May 2020
ވޭލު ސަބުމެރިންގެ ވެރިޔަކީ ކާކު؟
ރާޅުބެ
02 May 2020
އުމަރު ކެމޮފުލާޖު ޓީޝާޓު ލައިގެން ގޮސް ހާޑު އިމިއުނިޓީ މަސައްކަތް ފެށުމުގެ ގޮތުން ޕޮޒިޓިވް ވެފާވާ މީހުންނާ އެކީ އެއްކޮޓަރިއެއްގަ އުޅެން ދާންވީ. އެކަމަކު ބަލި ޖެހިއްޖެޔާ ދިވެހި ދައުލަތުން އުމަރަގެ ފަރުވާއަށް އެއްވެސް ކަމެއް ކުރަން ނުޖެހޭނެ ކަމަށް އިގުރާރު ވާން ޖެހޭނެ ފުރަތަމަ.
ޒިންދަގީ
02 May 2020
މިސާލަކަށް ކިޑްނީއާއި ލިވަރ ފައިލްވެގެން ފަރުވާދެމުން ބޭސްކާދެމުންދާ މުސްކުޅި ބަލިމީހަކަށް ރޯގާއެއްޖެހުނުތަނާ ދުވަސްކޮޅަކުން މަރުވީއޯ. ދެން އޭނާ މަރުވީ ރޯގާޖެހިގެންތޯ ނުވަތަ ކިޑްނީ އާއި ލިވަރ ފެއިލްވެގެންނޭތޯބުނާނީ؟؟ ކޮވިޑުގަ މަރުވި 98% މީހިންނަކީ މިބުނާކަހަލަ ހާލަތްތައްކަމަށް ބުނަނީ.. އެހެންވީމަ މީގެ އަނެއްކޮޅަކީ ނަފްސާނީ ބަލިތަކުގައާއި ބަނޑުހައިހޫނުކަމުގަ މަރުވާމީހުންވެސް ކޮވިޑް ކޭސްތަކަށް ގުނަންފެށުން.
ބިރޭލް
02 May 2020
ރަނގަޅު ވާހަކައެއް. ފުލުހުން ރަނގަޅަށް ރަށުތެރެ ބަލަހައްޓާފައި އިގްތިސޯދީ މަސައްކަތް ކުރާ މީހުންނަށް ހުޅުވާ ލަންވީ. އެކަމަކު މަސައްކަތު ނިކުމެވެންވާނީ އޮތޮރައިޒްޑް އަދި މިންގަނޑަށް އަމަލު ކުރެވޭ މީހުން. ލަޓޯ ފަޓޯ ތިބެންވާނީ ގޭގަ. އެއީ އެތިކޮޅު ވިއްކާ ކުދިންނާ، މޮޔަވެގެން ވެގެން ދުއްވާ މީހުން ތައް/
އަލިބޭބެގެ ހުސައިންދީ
02 May 2020
ފުރަބަންދުން ދޫކޮށްލައި، ހާޑު އިމިއުނިޓީއަށް ދާން ގޮވަނީ، ސިއްޙީ ޚިދުމަތްތެރިންނެއް ނޫން. ޑޮލަރަށް ދަހިވެތި މަހުޖަނުން. ތެދެއް ބައްޔާއެކު އުޅެން ނުކުންނަންވީ މަރުގެ ތުންފަތްމައްޗަށް ނިކަމެތި މުވައްޒަފުން. އުމަރުމެން ތިބޭނީ ގަނޑުވަރުގައި ފިލައި، ޑޮލަރު ގުނަން. އެންމެ މަހަކު މުވައްޒަފުންނަށް މުސާރަ ދޭނެ ފަދަ މިމީހުން އަތުނެތް. ދެން ފުރަބަންދު ދޫކޮށްލައި ނިކަމެތިން ނުކުންނަންވީ މިމީހުންގެ ވިޔަފާރި ހިނގައިދޭން. މުދަަލަށް ދަހި ވިޔަސް ތީ ބޮޑުވަރު.
ފޮނިޓައްޕު ހަސަނު
02 May 2020
މަށަށް ފެންނަނީ ކޮވިޑް19ގެ ޓާސްކް ފޯސް ހެޑަކަށް މީނަ ލާން. އެނގިދާނެތާ މީނަގެ ހުރި ހުނަރުވެރިކަމެއް ، ވިސް ނުމެއް.
މުހައްމަދު ނަސީރު
02 May 2020
ކޮވިޑާ އެކު އުޅެން ދަސްކުރާށޭ ބުނާއިރު ދަރުމަވަންތަ ހޮސްޕިޓަލްގެ ކެޕޭސިޓީ އަކީ 10.. އެހާ ބައިވަރު މީހުން މިތާ ތޮއްޖެހިފަ. މަހިޔެއްނުކުރަން އުމަރު މިހާ ތާކުންތާކު ނުޖެހޭ ވާހަކައެއް ދައްކާނެ ކަމަށް
އަލީރާޖާ
02 May 2020
އަޅުގަޑު އުމަރުގެ މި ވާހަކައަށް ތާއީދު ކުރަން. މި ވައިރަސްއާއި އެކީ ދިރިއުޅެން ދަސްކުރަން އެބަޖެހޭ. ކިހާ ދުވަހެއް ވަންދެންތޯ ހުރިހާ ކަމެއް ބަންދުކޮށްގެން ތިބެވޭނީ؟ ކޮބާތޯ މީގެ ނިމުން އޮތް ހިސާބަކީ؟ ހުޅުވާ ދުވަހަކުން ދެން މި ބަލި ރާއްޖެއަށް ނާންނާނެތޯ؟ ޓޫރިޒަމްއަށް ބަރޯސާވެފައިވާ ގައުމެއްގައި އެކަން ޔަގީން ކުރެވޭނެ ގޮތެއް ނޯންނާނެ.
ޢަދުރުއްނިހާނު
02 May 2020
ކޮންމެވެސް ކޮހެއް މިދަނޑިވަޅުގަވެސް ގޮވާ ނުލެވިއްޖެއްޔާމިން މިވެރިންނައް ޕޮލިތީޝަނުންނެކޭ ނުކިޔޭނެ....