މި ސަރުކާރާ ދެކޮޅަށް މާލޭގައި އިއްޔެ ބާއްވަން އުޅުނު ސައިކަލް ބުރުގައި ބައިވެރިވި މީހުންގެ ތެރެއިން އެކަކު ފިޔަވައި އެހެން އެންމެން ދޫކޮށްލައިފި އެވެ.
ކޮވިޑް-19 ފެތުރޭތީ އިއުލާނު ކޮށްފައިވާ ސިއްހީ ކުއްލި ނުރައްކަލުގެ ހާލަތުގައި ގިނަ މީހުން އެއްވެ އުޅުން މަނާކޮށްފައި ވަނިކޮށް، ބާއްވާ އެއްވުންތަކުގެ ބައިވެރިންނާ މެދު ފިޔަވަޅު އަޅާނެ ކަމުގެ އިންޒާރު ފުލުހުން އޮތީ ކުރިން ދީފަ އެވެ. ހެލްތު ޕްރޮޓެކްޝަން އޭޖެންސީ (އެޗުޕީއޭ) ގެ އުސޫލުތަކާ ހިލާފަށް އިއްޔެ ބާއްވަން އުޅުނު ސައިކަލު ބުރުގައި ބައިވެރިވާން ނުކުތް 41 މީހަކު ފުލުހުންގެ ބެލުމުގެ ދަށަށް އިއްޔެ ގެންދިޔަ އެވެ.
އެޗްޕީއޭގެ އުސޫލުތަކާ ހިލާފުވުމުން، އެ އެންމެން ވެސް ޖޫރިމަނާކުރި ކަމަށް ފުލުހުން ބުންޏެވެ. ކޮންމެ މީހަކު 1،000ރ. އިން ޖޫރިމަނާ ކުރުމުން، އެ ސައިކަލު ބުރުގައި ބައިވެރިވި 41 މީހެއްގެ އަތުން ދައުލަތަށް އިއްޔެ އެކަނިވެސް 41،000ރ. ލިބޭނެ އެވެ.
ފުލުހުންގެ ބެލުމުގެ ދަށަށް އިއްޔެ ގެންދިޔަ މީހުންގެ ތެރެއިން މިހާރު ހައްޔަރު ކޮށްފައި ވަނީ އެންމެ މީހެކެވެ. އަދި، ސައިކަލު ބުރުގައި ބައިވެރިވި އެއްވެސް މީހެއްގެ ލައިސެންސް ހިފަހައްޓާފައި ނުވާ ކަމަށް ފުލުހުން ބުނެ އެވެ.
ސަރުކާރާ ދެކޮޅަށް އިއްޔެ ބޭއްވި ހަރަކާތުގައި އިދިކޮޅު ކޯލިޝަން ޕީޕީއެމް/ޕީއެންސީގެ ބައެއް އިސްވެރިން ބައިވެރިވެވަޑައިގަތަސް އެއީ އެ ކޯލިޝަނުން ރޭވި ހަރަކާތެއް ނޫން ކަމަށް އެ ކޯލިޝަނުން ބުނެފައި ވެ އެވެ. ފުލުހުންގެ ބެލުމުގެ ދަށަށް ގެންދިޔަ މީހުންގެ ތެރޭގައި ޕީއެންސީގެ ކައުންސިލް މެމްބަރުން މުހައްމަދު ޖިނާން ޖަލީލް އާއި ނަބީލް ޒަމީލްގެ އިތުރުން އެ ޕާޓީގެ ރަޖިސްޓްރާ މުހައްމަދު އަފޫ ހާމިދު ހިމެނެ އެވެ.
ފުލުހުންގެ ބެލުމުގެ ދަށަށް ގެންދިޔަ މީހުންނަށް ގާނޫނީ އެހީތެރިކަން ފޯރުކޮށްދޭނެ ކަމަށާއި ކުރިއަށް އޮތް ތަނުގައި ބަޔަކު މިފަދަ ހަރަކާތްތައް ކުރިއަށް ގެންދާ ނަމަ އިދިކޮޅު ކޯލިޝަނުން ބައިވެރިވާނެ ކަމަށް ބުންޏެވެ.