އިންޑިއާގެ ކޮންސިއުލޭޓެއް އައްޑޫގައި، ބެންގަލޫރުގައި ރާއްޖޭގެ ކޮންސިއުލޭޓެއް ގާއިމްކުރަން މަޝްވަރާކޮށްފި

އައްޑޫގައި އިންޑިއާގެ ކޮންސިއުލޭޓެއް ގާއިމުކުރުމަށް ދެ ގައުމުގެ އެންމެ މަތީ ފެންވަރުގައި މިއަދު މަޝްވަރާ ކުރައްވައިފި އެވެ.

އެ މަޝްވަރާތައް ކުރެއްވީ ރައީސް ޑރ. މުހައްމަދު މުއިއްޒު އިންޑިއާ އަށް މިހާު ކުރައްވަމުން ގެންދަވާ ފުރަމާނަ ދަތުރުފުޅުގައި މިއަދު ހެނދުނު ބޮޑުވަޒީރު ނަރެންދުރަ މޯދީއާ އެކި ވަކިން ބޭއްވެވި ބައްދަލުވުމުގައި ކަމަށް ރައީސް އޮފީހުން ބުންޏެވެ.

އައްޑޫގެ އިތުރުން އިންޑިއާގެ ބެންގަލޫރުގައި ރާއްޖޭގެ ކޮންސިއުލޭޓެއް ގާއިމުކުރުމަށް ވެސް ދެބޭފުޅުން މަޝްވަރާ ކުރެއްވި އެވެ. އެކަމަކު، ދިވެހި ސަރުކާރުގެ އިސް އޮފިޝަލަކު ވިދާޅުވީ، "މިއީ އަދި މަޝްވަރާއެއް" ކަމަށާއި ގޮތެއް ނުނިންމާ ކަމަށެވެ.

"މިއީ މާކުރިއްސުރެ މަޝްވަރާކޮށް، ދެއްކެވެމުން އަންނަ ވާހަކަތަކެއް. ދިގުދެމިގެންދާ މަޝްވަރާތަކެއް މިއީ،" އޭނާ ވިދާޅުވި އެވެ.

ރައީސް ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ޕްރެސް ސްޓޭޓްމެންޓް ދެއްވުން.--- ފޮޓޯ | ރައީސް އޮފީސް

ރާއްޖޭގެ ދެވަނަ އަށް އެންމެ ބޮޑު އާބާދީއެއް އޮންނަ އައްޑޫގައި އިންޑިއާގެ ކޮންސިއުލޭޓެއް ގާއިމުކުރުމުގެ މަޝްވަރާ މިއަދު ކުރެއްވިއިރު އިންޑިއާގެ ކޮންސިއުލޭޓެއް ގާއިމް ކުރުމަށް 2021 ވަނަ އަހަރު އިންޑިއާގެ ކެބިނެޓުން އޮތީ ފާސްކޮށްފަ އެވެ.

އެކަމާ ގުޅިގެން ރާއްޖޭގައި ހުންނަ އިންޑިއާ އެމްބަސީން އޭރު ބުނިގޮތުގައި އެ ގައުމުގެ ކެބިނެޓުން އެ ނިންމުން ފާސްކުރީ ރާއްޖެ އާއި އިންޑިއާއާ ދެމެދު އޮންނަ ގާތް ގުޅުމުގެ ސަބަބުންނާއި އިންޑިއާގެ ސަރުކާރުން ގެންގުޅޭ "ނެއިބަހުޑް ފަސްޓް ޕޮލިސީ" އާއި "ސެކިއުރިޓީ އެންޑް ގްރޯތު ފޯ އޯލް އިން ދަ ރީޖަން (ސާގަރް)" ގެ އަމާޒުގައި ރާއްޖެ އަކީ މުހިންމު ދައުރެއް އަދާކުރާ ގައުމަކަށް ވާތީ އެވެ.

ނަމަވެސް އެކަމާ ގުޅިގެން އޭރުގެ ރައީސް އިބްރާހިމް މުހައްމަދު ސޯލިހު ވިދާޅުވީ އައްޑޫގައި އިންޑިއާގެ ކޮންސިއުލޭޓެއް ގާއިމުކުރަން އިންޑިއާ ސަރުކާރުން ނިންމި ނަމަވެސް އެކަމާ ބެހޭ ގޮތުން ދިވެހި ސަރުކާރުން އަދި އެއްވެސް ނިންމުމެއް ނިންމާފައި ނުވާ ކަމަށެވެ. އަދި ޑިޕްލޮމެޓިކް ގުޅުމުގެ ތެރެއިން އެއް ފަރާތުން އަނެއް ފަރާތަކަށް އެދޭ އެދުންތައް ފުރިހަމަކުރަން ދެއްކެވެން ޖެހޭ ވާހަކަތައް އެކަމުގައި ދެއްކެވޭނެ ކަމަށް އެ މަނިކުފާނު ވެސް ވިދާޅުވި އެވެެ.

އިންޑިއާގެ ބޮޑުވަޒީރު ނަރެންދުރަ މޯދީ ޕްރެސް ސްޓޭޓްމަންޓް ދެއްވަނީ--- ފޮޓޯ | ރައީސް އޮފީސް

ކޮންސިއުލޭޓް ގާއިމްކުރަން އިންޑިއާ އިން ނިންމުމާ އެކު އޭރު ވަނީ އައްޑޫގެ ޒުވާނުންގެ ތެރެއިން ބަޔަކު ކެމްޕެއިނެއްކޮށް، ޝުއޫރުފާޅުކޮށްފަ އެވެ. އިންޑިއާ ހިމެނޭ ގޮތުން އެއްވެސް ގައުމެއްގެ ސިފައިން ރާއްޖޭގައި ބޭތިއްބުމާ ދެކޮޅު ހަދަމުން ދިޔައިރު، އައްޑޫގައި ކޮންސިއުލޭޓެއް ހުޅުވުން ވެސް އޭރު އޮތީ ދެކޮޅު ކަމެއްގެ ގޮތުގަ އެވެ.

މި ވެރިކަން ފެށުމާ އެކު އިންޑިއާ އެކު ކުރި މަޝްވަރާތަކުން އެއްބަސްވެވި އެ ގައުމުގެ ސިފައިން ވަނީ އަނބުރާ ފޮނުވާލައިފަ އެވެ. ގައުމުތަކާ އެކަހެރި ނުވެ، މި ސަރުކާރުން ގެންގުޅޭ މޯލްޑިވްސް ފަސްޓް ޕޮލިސީގައި، ގައުމުތަކާ އެކު ޑިޕްލޮމެޓިކް ގުޅުން ގާއިމްކުރާނީ ރާއްޖޭގެ އިސްތިގުލާލާއި ސިޔާދަތަށް ގެއްލުނުވާނެ ގޮތަށް ކަމުގެ ޔަގީންކަން ވަނީ ދީފަ އެވެ.

އައްޑޫގައި އިންޑިއާގެ ކޮންސިއުލޭޓެއް ގާއިމުކުރުމަށް ރާއްޖެއިން ހުއްދަ ދީފި ނަމަ، އެއީ ބޭރުގެ ގައުމެއްގެ ޑިޕްލޮމެޓިކް މިޝަނެއް ވެރި ރަށް މާލެ ފިޔަވައި އެހެން ރަށެއްގައި ހުޅުވާ ފުރަތަމަ ފަހަރެވެ.

އިންޑިއާގެ ވެރިރަށް ނިއުދިއްލީގައި ރާއްޖޭގެ ހައިކޮމިޝަން ހުންނައިރު އެ ގައުމުގެ ތުރިވަަނަންތަޕޫރަމްގައި ރާއްޖޭގެ ކޮންސިއުލޭޭޓެއް ހުރެ އެވެ.