މިއީ 10 އަހަރުގެ ތެރޭގައި އިރުވައި މޫސުން ފެށުން އެންމެ ލަސްވި ފަހަރު!

މިދިޔަ 10 އަހަރު ދުވަހުގެ ތެރޭގައި ރާއްޖެއަށް އެންމެ ލަހުން އިރުވައި މޫސުން ފެށުނީ މިދިޔަ އަހަރު ކަމަށް މޫސުމާ ބެހޭ އިދާރާއިން ބުނެފި އެވެ.

މިދިޔަ އަހަރުގެ އިރުވައި މޫސުން ފެށުނީ އަހަރު ވެސް ނިމުނު ފަހުން މި މަހުގެ ދެވަނަ ދުވަހު އެވެ.

ފާއިތުވި އަހަރުތަކުގައި އިރުވައި މޫސުން ފެށުނު ތާރީހުތައް ހޯދުމަށް "މިހާރު" އިން މެޓް އޮފީހުގައި އެދުމުން ވަނީ މިދިޔަ 10 އަހަރުގެ ތާރީހުތައް ދީފަ އެވެ. އެއިން އެނގޭ ގޮތުގައި، އިރުވައި މޫސުން ފެށުން އެންމެ ލަސްވީ މިދިޔަ އަހަރު އެވެ.

އޭގެ ކުރީ އަހަރު، 2023 ގައި އިރުވައި މޫސުން ފެށުނީ ޑިސެމްބަރު 24 ގަ އެވެ. އަދި 2022 ވަނަ އަހަރު ޑިސެމްބަރު 31 ގަ އެވެ.

މިދިޔަ 10 އަހަރު ދުވަހުގެ ތެރޭގައި އެންމެ އަވަހަށް އިރުވައި މޫސުން ފެށިފައި ވަނީ 2019 ވަނަ އަހަރު އެވެ. އެއީ އެ އަހަރުގެ ޑިސެމްބަރު 8 ގަ އެވެ.

ރާއްޖެއަށް އިރުވައި މޫސުން ފެށުނު ކަމަށް މެޓް އޮފީހުން ނިންމަނީ ވައިގެ މިސްރާބު އިރުމަތިން ހުރެފައި، ގަޑިއަކު 10 ނޯޓިކަލް މޭލަށް ވުރެ ބާރުމިނުގައި ވައިޖެހުން އަދި އެ ހާލަތު ވިދިވިދިގެން ދެ ދުވަހަށް ނުވަތަ އިތުރަށް ދެމިގެން ދިއުމުންނެވެ.

ރާއްޖޭގައި އޮންނަ ދެ މޫސުމުގެ ތެރެއިން އިރުވައި މޫސުން އާންމުކޮށް ދެމިގެންދަނީ ޑިސެމްބަރުގައި ފަށައި، ޖެނުއަރީން މާޗު މަހުގެ ނިޔަލަށެވެ. އަދި ހުޅަނގު މޫސުން ދެމިގެންދަނީ އެޕްރީލް މަހު ފަށައި، މެއި މަހުން ނޮވެމްބަރު މަހުގެ ނިޔަލަށެވެ.

އިރުވައި މޫސުން ފެށި، އޭގެ އަސަރުތައް އާންމު ގޮތެއްގައި ޑިސެމްބަރު މަހުގެ ދެވަނަ ނުވަތަ ތިންވަނަ ހަފުތާގައި، އުތުރާއި މެދު ރާއްޖެ ތެރޭގެ އަތޮޅުތަކަށް ފަށަ އެވެ. ޖެނުއަރީ މަސް ފެށޭއިރު މުޅި ރާއްޖެއަށް އިރުވައި މޫސުން ފެށެ އެވެ.

ރާއްޖޭގެ ނަކަތް ކަލަންޑަރުގައިވާ ގޮތުގައި، އިރުވައި މޫސުން ފަށާނެ ކަމަށް ލަފާކުރަނީ މީލާދީ މަހުން ޑިސެމްބަރު 10 ގަ އެވެ. އެކަމަކު، ދިވެހި ނަކަތާއި މޫސުން މިދިޔަ 10 އަހަރު ދުވަހުގެ ތެރޭގައި ވެސް ދިމާ ނުވާކަން މެޓް އޮފީހުން ދިން ތަފާސްހިސާބުތަކުން އެނގެ އެވެ.

ދުނިޔޭގެ މޫސުމަށް އަންނަމުންދާ ބޮޑެތި ބަދަލުތަކުގެ އެނގުން މިދިޔަ އަހަރު ރާއްޖެއަށް ވެސް ވަރަށް ބޮޑަށް ކުރެވުނެވެ. އާދަޔާ ހިލާފަށް ހޫނުގަދަވުމާއި ވިއްސާރަކުރުމާއި ފެންބޮޑުވުން އަދި އުދައެރުން ކަހަލަ އެތައް ހާދިސާތަކެއް މިދިޔަ އަހަރު ވަނީ ވަރަށް ގިނައިން ހިނގައިފަ އެވެ.

މިދިޔަ އަހަރު ރާއްޖެއަށް އިހުސާސް ކުރެވޭ ހޫނުމިން ރެކޯޑް މިންވަރަކަށް މައްޗަށް ވެސް ދިޔަ އެވެ. އެއީ، މިދިޔަ އަހަރުގެ އެޕްރީލް މަހުގެ އެއްވަނަ ދުވަހެވެ. އެ ދުވަހު މާލެ ސަރަހައްދަށް ހޫނުކަން އިހުސާސް ކުރެވޭ ވަރު 48 ޑިގްރީ ސެލްސިއަސް އެރި އެވެ.

މިދިޔަ އަހަރަކީ މިހާތަނަށް ރެކޯޑް ކުރެވުނު، ދުނިޔެއަށް އެންމެ ހޫނުގަދަވި އަހަރު ކަމަށް އދ. ގެ މޫސުމާ ބެހޭ އިދާރާ، ޑަބްލިއުއެމްއޯ އިން ވެސް ވަނީ ބުނެފަ އެވެ. ރެކޯޑް މިންވަރަކަށް ހޫނުގަދަވުމުގެ އިތުރުން މިދިޔަ އަހަރު ދުނިޔޭގެ އެކި ހިސާބުތަކަށް އާދަޔާ ހިލާފަށް ވާރޭވެހި، ފެންބޮޑުވެގެން ހިތާމަވެރި އެތައް ހާދިސާތަކެއް ހިނގާފައިވާ ކަމަށް ވެސް އެ އިދާރާއިން ބުނެފައިވެ އެވެ.