ކޮވިޑް-19: ކުރެއްދު އާއި ވ. ތިނަދު އަށް އަރައި ފޭބުން މަނާ

އިގްތިސާދީ ގޮތުން އަންނަ ބަދަލުތައް ދެނެގަތުމަށް، ޓޫރިޒަމް ދާއިރާގެ ފަރާތްތަކުން ކަމާބެހޭ އިދާރާތަކަށް ދުވަހުން ދުވަހަށް މައުލޫމާތު ފޯރުކޮށްދެމުން ދިއުމަށް އެދެމުން ޕްރެސް ކޮންފަރެންސް ނިންމާލައިފި.

ކުރެއްދޫން ދިޔަ މީހާ ޕޮޒިޓިވް ވި ކަމަށް އަންގާފައި ވަނީ އިއްޔެ. އޭނާ ފުރައިގެން ދިޔައިރު ކޮންޓެކްޓްވި މީހުން ހޯދުމާއި ދިޔައިރު ބަލީގެ އަލާމާތްތައް ހުރިތޯ އާއި، އެހެން ނަމަ އެކަން ރިޕޯޓް ނުކުރެވުނީ ކީއްވެތޯ ބަލަން ތަހުގީގެއް ވަނީ ފަށާފައި.

މިނިސްޓަރު އަލީ ވަހީދު ވިދާޅުވި ގޮތުގައި، މި ވަގުތު ރާއްޖެ އޮތީ އާދައިގެ ހާލަތެއްގައި. އިންތިހާބު ފަސްކުރުމާއި ނުކުރުން ވެސް ބިނާވާނީ ކަންކަން ބަދަލުވެގެންދާ ގޮތަކުން ކަމަށް ވިދާޅުވި.

މީހަކު ޕޮޒިޓިވް ވެއްޖެ ނަމަ އެކަން ސިއްރެއް ނުކުރާނަން. ހުރި ގޮންޖެހުންތައް ވެސް ސިއްރެއް ނުކުރާނަން: އަމީން

ހުރިހާ ދިވެހިންނާއި ބިދޭސީންނަށް ވާ ވަރަށް، ރޯދައިގެ ފަހަށް ވެސް ބޭނުންކުރެވޭ ވަރަށް ކާޑުގެ ސްޓޮކް އެބަހުރި. އެކަމަކު ބޭނުންވާ ވަރަށް ވުރެ ގިނައިން އެންމެން ގަންނަން ފަށައިފި ނަމަ މައްސަލަތައް ދިމާވެދާނެ: އަލީ ވަހީދު

އައިޖީއެމްއެޗްގައި ބަލި ޓެސްޓްކުރަނީ ޑަބްލިޔުއެޗްއޯގެ މިންގަނޑަށްތޯ ސުވާލުކުރުމުން މިނިސްޓަރު އަމީން ވިދާޅުވީ ޓެސްޓް ކިޓްތައް ހަދިޔާކުރީ ވެސް ޑަބްލިޔުއެޗްއޯ އިން ކަމަށާއި އެއީ އެ އިދާރާ އިން ބަލަންޖެހޭ ކަންކަން ބެލުމަށް ފަހުގައި ކަމަށް. މިވަގުތު މުޅި ދުނިޔޭގައި ވެސް އެންމެ ބޮޑީ ބައްޔާ މެދު ސައްހަ ނޫން މައުލޫމާތު ފެތުރުމާއި ޝައްކު އުފެއްދުން ކަމަށް ޑަބްލިޔުއެޗްއޯއާ ހަވާލާދީ އަމީން ވިދާޅުވި.

އިގްތިސާދެއް އޮންނަނީ ރައްޔިތުންނަށް ހިމާޔަތް ލިބިގެން ކަމަށާއި އެހެންވެ ފިޔަވަޅު އަޅަންޖެހޭ ކޮންމެ ގައުމަކަށް ވެސް، ހާލަތު ވަޒަންކުރުމަށް ފަހު ފިޔަވަޅު އަޅުއްވާނެ ކަމަށް އަލީ ވަހީދު ވިދާޅުވެއްޖެ.

ރާއްޖޭގައި އޮތީ ވައިޓް އެލާޓް. ޕެނިކް ވާންޖެހޭ ހާލަތެއް ނެތް: އަލީ ވަހީދު

ފަރުކޮޅުފުށީގައި، އިޓަލީން އައި ދިވެހި އަންހެނަކާއި ކުޑަ ކުއްޖަކާއި އިޓަލީގެ ތިން މީހަކު އެބަތިބި. އަދި ކުރެއްދޫ ރިސޯޓުން ޝައްކުވާ ޑޮކްޓަރު ވެސް އެތަނަށް ގެންދާނެ.

މިއީ ދުނިޔޭގެ ހުރިހާ ގައުމަކަށް ވެސް ގޮންޖެހުން ބޮޑު ހާލަތެއް ކަމަށާއި ރާއްޖެ ވެސް، ގޮންޖެހުންތަކާ އެކު ވެސް ރަނގަޅަށް ތައްޔާރު ވެވިފައިވާ ކަމަށް ގަބޫލުކުރައްވާ ކަމަށް އަމީން ވިދާޅުވި.

މިހާރު ރާއްޖޭގެ ހުރިހާ ރަށަކަށް ވެސް، ފަރުވާ ދޭން ބޭނުންވާ ސާމާނު މިހާރުގެ ހާލަތާ އެކަށީގެންވާ ވަރަށް ފޮނުވާފައިވާ ކަމަށް އަމީން ވިދާޅުވި.

ހެލްތު މިނިސްޓަރު އަމީން ވިދާޅުވީ ރާއްޖޭގެ އެއްވެސް ރަށަކުން ޕޮޒިޓިވް ކޭސްއެއް ފެނިއްޖެ ނަމަ އެ ރަށަކަށް އަރައި ފޭބުން މެދުކަނޑާލުމަކީ މިހާރު ހަމަޖައްސާފައި އޮތް ގޮތް ކަމަށް.

ކުރިން ރިސޯޓް ހިންގި ވިލިވަރު ވެސް މިހާރު ވަނީ ކަރަންޓީނު ފެސިލިޓީ އަކަށް ބަދަލުކޮށްފައި

ޓޫރިޒަމް މިނިސްޓަރު އަލީ ވަހީދު ވިދާޅުވީ ވ. ތިނަދު އާއި ރިސޯޓަކަށް އަރައި ފޭބުން މަނާކުރީ ޓެސްޓްތަކުގެ ނަތީޖާ ލިބެންދެން ކަމަށް

މާދަމާ ރޭ މެންދަމު 12:00 އިން ފެށިގެން އިޓަލީން ރާއްޖެ އަށް މީހުން އައުން މަނާކުރަން ސަރުކާރުން ވަނީ ނިންމާފައި.

ކުރެއްދޫ ރިސޯޓުގައި ހުރެފައި ދިޔަ އިޓަލީ މީހަކު ވެސް ބައްޔަށް ޕޮޒިޓިވް ވެފައިވާ ކަމަށާއި އެ މީހާއާ ކޮންޓެކްޓްވި މީހުން ހޯދައި، ބަލަންޖެހޭ ކަންކަން ބަލަމުން އަންނަ ކަމަށް ހެލްތު މިނިސްޓަރު އަމީން ވިދާޅުވި.

ވ. ތިނަދޫން ގެނައި އިޓަލީ މީހާ ފަރުކޮޅު ފުށީގައި ވަނީ ކަރަންޓީނުކޮށްފައި. އެ މީހާގެ ޓެސްޓްތައް އަންނަނީ ކުރަމުން. ކެޔޮދޫ ވެސް މިހާރު ވަނީ މީހުން އަރައި ފޭބުން ވަގުތީ ގޮތުން މަނާކޮށްފައި.

ޕްރެސް ކޮންރަފެންސް ފަށައިފި.

ނިއުސް ކޮންފަރެންސް ދެއްވަނީ ހެލްތު މިނިސްޓަރު އަބްދުﷲ އަމީނާއި ޓޫރިޒަމް މިނިސްޓަރު އަލީ ވަހީދު އަދި ޑިޒާސްޓާ މެނޭޖްމަންޓު އޮތޯރިޓީގެ އިސްވެރިޔާ ހިސާން.

ކޮވިޑް-19 ގައި ރާއްޖޭގެ ހާލަތާ ގުޅޭ އެންމެ ފަހުގެ މައުލޫމާތު ދިނުމުގެ ނިއުސް ކޮންފަރެންސެއް މިރޭ 11:30 ގައި ބާއްވާނެ ކަމަށް ހެލްތު މިނިސްޓްރީން ބުނެފި. އެ ނިއުސް ބްރީފިން އޮންނާނީ ދަރުބާރުގޭގައި. އެ ތަނުގައި ވަނީ ކޮވިޑް-19 އާ ގުޅިގެން އިމަޖެންސީ ސެންޓަރެއް ގާއިމްކޮށްފައި.