ޒުުވާން ކުއްޖަކަށް ދިރުވާލެވުނު ޕިނެއް ފުއްޕާމޭގައި ތާށިވެފައި އޮތްތަން ފެންނަ އެކްސްރޭއެއް: މި ފަދަ ތަކެތި ނަގަނީ ބްރޮންކޮސްކޮޕީ ހަދައިގެން- ފޮޓޯ: އައިޖީއެމްއެޗް.
28 ޖެނުއަރީ 2021 - 12:41
ފުއްޕާމޭގެ ނޭވާލާ ހޮޅިއެއްގެ ތެރޭގައި ކާއެތިކޮޅެއް ތާށިވި ކުއްޖާ، ރާއްޖޭން ބޭރަށް ގެންގޮސްގެން އޭތިކޮޅު ނަގައިފި އެވެ.
މިދިޔަ އަހަރުގެ ޖުލައި މަހުގެ ތެރޭގައި، ކާއެތިކޮޅު ތާށިވެގެން، އުމުރުން ފަސް އަހަރުން ދަށުގެ ކުއްޖާ އެންމެ ފުރަތަމަ ގެންދިޔައީ އައިޖީއެމްއެޗަށެވެ. ރޯގާ ޖެހި ނޭވާލާން އުނދަގޫވާތީ، އެންމެ ފުރަތަމަ ހެދީ އެ ކުއްޖާގެ ސީޓީ ސްކޭނެކެވެ. ނޭވާލާ މައި ހޮޅިއަށް ވުރެ ވެސް އެތެރޭގައި ކާއޭތިކޮޅު ތާށިވެފައިވާކަން އެނގުނީ އެ ސްކޭނުންނެވެ.
ނޭވާލާހޮޅީގައި ތާށިވެފައިވާ ކާއެތިކޮޅު ނެގުމަށް އައިޖީއެމްއެޗުގެ ޑޮކްޓަރުން ވަރަށް މަސައްކަތް ކުރި އެވެ. ގަނޑުކޮށްގެން ވެސް އެ އެތިކޮޅު ނުނެގުނު އިރު، އެކަމުގެ ތެރޭގައި ކުއްޖާގެ ހާލު ސީރިއަސްވެ، ވެންޓިލޭޓަރުގައި ވެސް ބާއްވަން ޖެހުނެވެ.
update on this news which came during 07/2020 @Mihaarunews . Was sent abroad as there were options to take the foreign body through bronchoscopy.Underwent bronchoscopy twice in India and was able to take it, without lung surgery. If only we had smaller sizes of probes..baby is ok pic.twitter.com/vtbxnFv7wK
— Dr. Mohamed Ali (@Moxamedalu) January 28, 2021
އެންމެ ބޮޑު މައްސަލައަކަށް ދިމާވީ، ކާއެތިކޮޅަށް ގިނަ ދުވަސްވެ މަސް އަރާފައި އިނުމެވެ. އެހެންވެ، ޑޮކްޓަރުން ނިންމީ ކުއްޖާ ރާއްޖޭން ބޭރަށް ފޮނުވާލާށެވެ.
އައިޖީއެމްއެޗުގައި ކުޑަކުއްޖާ ބެލި އެތެރެހަށީގެ ޑޮކްޓަރު މުހައްމަދު އަލީ މިއަދު ވިދާޅުވީ އިންޑިއާގައި ދެ ފަހަރެއްގެ މަތިން ބްރޮންކޮސްކޮޕީ ނުވަތަ ފުއްޕާމޭގެެތެރެއަށް ހޮޅިއެއް ވައްދައިގެން، ކާއެތިކޮޅު ނަގައިފައިވާ ކަމަށެވެ.
ކުޑަކުއްޖާ ބޭރަށް ފޮނުވައިލުމަށް، ޑރ. މުހައްމަދު އަލީ ކުުރިން އިރުޝާދު ދެއްވީ ވެސް، ފުއްޕާމޭގެ އޮޕަރޭޝަން ނުކޮށް، އެ އެތިކޮޅު ނެގުމަށެވެ.
"ކާއެތިކޮޅު އިނީ ވަރަށް އެތެރޭގައި. އަޅުގަނޑުމެން ފުރަތަމަ މަސައްކަތް ކުރީ ވެސް، ބްރޮންކޮސްކޮޕީ ހަދައިގެން ކެމެރާ ލައްވައިގެން އެ އެތިކޮޅު ނެގޭތޯ. އެކަމަކު އެތިކޮޅު ތާށިވެފައި އޮތް ހިސާބަށް ދެވޭވަރުގެ އެހާ ކުޑަ ސައިޒުގެ [ބްރޮންކޮސްކޮޕީ]އެއް އަޅުގަނޑުމެން އަތަކު ނެތް،" ޑޮކްޓަރު ވިދާޅުވި އެވެ.
އޭނާ ވިދާޅުވި ގޮތުގައި އިންޑިއާގައި ފަރުވާ ދެމުން އަންނަ ކުޑަކުއްޖާގެ ހާލު މިހާރު ރަނގަޅެވެ.
ތުއްތު ކުދިން ދިރުވާލައިގެން، މި ފަދަ "ފޮރިން އޮބްޖެކްޓްސް" ނޭވާލާ ހޮޅީގައި ތާށިވުމަކީ ރާއްޖޭގައި ދިމާވާ ކަމެކެވެ. ސުޕާރީ އާއި ރުފިޔާ އަދި އެކި ކަހަލަ ބަދަން އެއްޗެހި ދިރުވާލައިގެން، ބްރޮންކޮސްކޮޕީ ހަދައިގެން ނަގަން ޖެހިފައި އެބަ ހުއްޓެވެ.
ޑޮކްޓަރުގެ އިރުޝާދަކީ ބަދަނާއި ޕޮޕްކޯން ފަދަ ތަކެތި، ދެ އަހަރުންގެ ދަށުގެ ކުދިންނަށް ދޭއިރު ސަމާލުވުމެވެ. ކާއެއްޗެހި ރަނގަޅަށް ނުހަފައި ދިރުވުމަކީ ވެސް މިފަދަ ހާލަތެއް ދިމާވެދާނެ ކަމެކެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
އުސްތާޛްޒަކީ
29 January 2021
ٱلْحَمْدُ لِلّٰهِ
ޜަދުން
28 January 2021
އިންޑިޔާ އައުޓް ވީދޯ
އެފް
28 January 2021
އުފާވެރި ޚަބަރެއް. ތުއްތު ދަރިފުޅަށް ދުޅަހެޔޮ ސިއްހަތަކަށް އެދެން.