ވެސްޓް ބެންގާލްގެ އިންތިހާބީ ހަމަނުޖެހުމުގައި 17 މަރު

އިންޑިއާގެ ވެސްޓްބެންގާލްގައި ހަމަނުޖެހުން ހިނގި ސަރަހައްދެއް އެގައުމުގެ ފުލުހުން ބަލަނީ. އިންތިހާބީ ހަމަނުޖެހުމުގައި 17 މީހުން މަރުވިކަމަށް ބެލެވޭ.

މުހައްމަދު ނަސީމް، މިހާރު

05 މެއި 2021 - 16:45

3 comments

އިންޑިއާގެ އިންތިހާބުތަކުގައި ވާދަވެރިކަން ބޮޑު "ބެޓުލް ގްރައުންޑް ސްޓޭޓް" އެއްގެ ގޮތުގައި އޮންނަ ވެސްޓް ބެންގާލްގެ ސަރަހައްދީ އިންތިހާބު ކާމިޔާބުކުރި ޓްރިނަމޫލް ކޮންގްރެސް (ޓީއެމްސީ) އާއި (އެ ސްޓޭޓްގައި އިދިކޮޅު) ބީޖޭޕީގެ ހަރަކާތްތެރިންގެ މެދުގައި ހިނގި ހަމަނުޖެހުންތަކުގައި އެތައް ބަޔަކު މަރުވެއްޖެެ އެވެ.

މެމްބަރުން މަރުވިކަމަށް ބުނެ ދެ ޕާޓީން ވެސް އަދަދުތަކެއް ދޭ އިރު އެއީ ހަގީގީ އަދަދުތަކެއް ކަން އަދި ކަށަަވަރު ނުކުރެވޭ ކަމަށް ބައިނަލްއަގުވާމީ މީޑިއާތަކުން ބުންޏެވެ. އެކަމަކު ދެ ޕާޓީން ބުނާ އަަދަދަށް މީހުން މަރުވި ނަމަ، މަރުވި މީހުންގެ އަދަދު 17 އަށް އަރަ އެވެ.

ބީޖޭޕީން ބުނީ ޓީއެމްސީގެ މެމްބަރުން އެ ޕާޓީގެ އޮފީސްތަކަށްް ގެއްލުންދީ، ބީޖޭޕީ މެމްބަރުންގެ ފިހާރަތައް ވެސް ލޫޓުވާފައިވާ ކަމަށެވެ. އެކަމަކު ޓީއެމްސީން އެކަން ދޮގުކުރުމަށް ފަހު ބުނީ ހަމަނުޖެހުންތަކުގައި އެ ޕާޓީގެ ހަތް މީހަކު މަރުވެފައިވާ ކަމަށެވެ. ބީޖޭޕީން ބުނީ ހަމަނުޖެހުންތަކުގައި މަރުވި މީހުންގެ ތެރޭގައި އެ ޕާޓީގެ ނުވަ މީހަކު ހިމެނޭ ކަމަށެވެ.

ވެސްޓް ބެންގާލްގައި މިފަދަ ހަމަނުޖެހުންތަކެއް ހިނގާފައި މިވަނީ އިންޑިއާގައި ކޮވިޑް-19 ވެސް ވަރަށް ބާރަށް ފެތުރެމުންދާ ވަގުތެއްގަ އެވެ. އިންތިހާބަށް ކެމްޕޭންކުރުމަށް ބޮޑެތި އެއްވުންތައް ބާއްވާފައިވާ ވެސްޓް ބެންގާލަކީ ކޮވިޑް ވެސް އެންމެ ބާރަށް ފެތުރޭ އެއް ސްޓޭޓެވެ.

ވެސްޓްބެންގާލްގެ އިންތިހާބުގައި ޗީފް މިނިސްޓަރުގެ ގޮނޑި ދިފާއުކުރެއްވި މަމާތާ ބަނާޖީ ވަނީ ހަމަނުޖެހުންތަކުގައި ބައިވެރިނުވެ، ކެތްތެރިކަން އިސްކުރުމަށް އޭނާގެ ޕާޓީގެ މެމްބަރުންނަށް އިލްތިމާސްކުރައްވައިފަ އެވެ. އޭނާ މަގާމުގެ ހުވާކުރައްވާނީ މިއަދުގެ ވަގުތެއްގަ އެވެ.

ވެސްޓް ބެންގާލަކީ އިންޑިއާގެ ސިޔާސީ ޕާޓީތަކުން އެެހެން ސްޓޭޓްތަކަށް ވުރެ ބޮޑަށް ހަރަކާތްތެރިވާ ސިޔާސީ ހަމަނުޖެހުންތައް ބޮޑު ސްޓޭޓެކެވެ. އެންމެ ފަހުގެ އިންތިހާބުގައި ޓީއެމްސީން ބީޖޭޕީ ބަލިކުރީ ވަރުގަދަ ކެމްޕޭނަކަށް ފަހު، ތަފާތު ބޮޑު ނަތީޖާއަކުންނެވެ.