ކޮންމެ އަހަރެއްގެ ރޯދަމަހު ދިރާގުން ބާއްވާ "ގުޑި ފެސްޓް"ގެ ދެވަނަ ހަރަކާތް މިއަދު ހަވީރު ހުޅުމާލޭގައި އޮންނާނެ އެވެ.
މި ހަރަކާތް ކުރިއަށް ގެންދާނީ ހުޅުމާލެ 2 އަށް ވަންނަ ސަރަހައްދުގައި އޮންނަ ދިރާގު ބީޗުގައި މިއަދުގެ ހަވީރު 5 އިން 6 އަށް އެވެ.
އެ ހަރަކާތުގައި ހުރިހާ އުމުރެއްގެ ކުދިންނަށް ވެސް ބައިވެރިވެވޭނެ އެވެ. އަދި ގުޑި ފެސްޓުގެ ބައިވެރިންނަށް ދިރާގުން ގުޑި ހަދިޔާކުރާނެ އެވެ.
ރާއްޖޭގައި ކޮންމެ ރޯދަމަހެއްގެ ހަވީރު އޮންނަ ގުޑި އެރުވުމުގެ ސަގާފަތް ދިރުވުމުގެ ގޮތުން ދިރާގުން ކޮންމެ އަހަރަކު ވެސް ބާއްވާ ގުޑި ފެސްޓުގެ ފުރަތަމަ ހަރަކާތް މި އަހަރު ބޭއްވީ މިދިޔަ ހުކުރު ދުވަހު މާލެ އުސްފަސްގަނޑު ސަރަހައްދުގަ އެވެ. އެއީ، ގިނަ ބަޔަކު ބައިވެރިވެ، ހޫނު ތަރުހީބެއް ލިބުނު ހަރަކާތަކަށް ވި އެވެ.
“ގުޑި ފެސްޓް" އަކީ ރޯދަމަހު ރާއްޖޭގައި އޮންނަ ގުޑި އެރުވުމުގެ ޒަމާންވީ އާދަ ދިރުވުމުގެ ގޮތުން ދިރާގުން 2023 ވަނަ އަހަރު ފެށި ހަރަކާތެކެވެ. އެ ހަރަކާތުގެ ދަށުން އެ ކުންފުނިން ކޮންމެ އަހަރަކު ވެސް މާލޭގެ އިތުރުން އެކި ރަށްރަށުގައި "ގުޑި ފެސްޓް" ބާއްވަ އެވެ. މި އަހަރު ވެސް އެ ހަރަކާތް އެކި ރަށްރަށުގައި ބޭއްވުމަށް ވަނީ ހަމަޖެހިފަ އެވެ.
ދިރާގުން މި ރޯދަމަހަށް ހާއްސަކޮށް މިފަދަ ތަފާތު އެކި ހަރަކާތްތައް އަންނަނީ ހިންގަމުންނެވެ. އެގޮތުން ރޯދަމަހަށް ހާއްސަ އެކި އޮފާތަކާއި ސަދަގާތް ކުރުމަށް ބާރު އަޅައި، އެކަކު އަނެކަކަށް އެހީވުމުގެ ސަގާފަތް ދިރުވުމުގެ ގޮތުން ދިރާގު ޕޭ މެދުވެރިކޮށް އެކި ފަރާތްތަކަށް އެހީތެރިވެވޭނެ އެކި ހަރަކާތްތައް ވެސް ހިންގަ އެވެ.