ތެލެގޫ ބަތަލާ ސަމަންތާ އަށް އިނގިރޭސި ޑައިރެކްޓަރެއްގެ ފިލްމެއް

އިންޑިއާގެ މަޝްހޫރު ތެލެގޫ/ތަމަޅަ ބަތަލާ ސަމަންތާ ރޫތު ޕްރަބޫ އަށް އިނގިރޭސިވިލާތުގެ މަޝްހޫރު ޑައިރެކްޓަރަކާ އެކީ މަސައްކަތް ކުރުމުގެ ފުރުސަތު ލިބިއްޖެ އެވެ.

ވެރައިޓީން ބުނި ގޮތުގައި މި ފިލްމަކީ އޭނާ ކުޅުނު 2019 ގެ ތެލެގޫ ފިލްމު "އޯ! ބޭބީ" ގެ ޕްރޮޑިއުސަރު ސުނީތާ ޓާޓީ ވެސް ހިއްސާވާ "އެރޭންޖްމަންޓްސް އޮފް ލަވް" އެވެ. ސުނީތާގެ ފިލްމު ކުންފުނި އިންޑިއަން އައުޓްފިޓް ގްރޫ ފިލްމްސް ހަދަން ނިންމާފައިވާ މި ފިލްމަކީ އިންޑިއާގެ ލިޔުންތެރިޔާ ތިމޭރީ އެން މުރާރީ 2004 ގައި ހަމަ އެ ނަމުގައި ގެނެސްދިން ވާހަކަ އަށް ބިނާކޮށް ހަދާ އެއްޗެކެވެ.

"އެރޭންޖްމަންޓްސް އޮފް ލަވް" ގެ ޑައިރެކްޝަން ހަވާލުކުރި ފިލިޕް ޖޯން އަކީ ބަޓްފާ އެވޯޑް ހޯދާފައިވާ ޑައިރެކްޓަރެކެވެ. އޭނާ ގެނެސްދީފައިވާ އުފެއްދުންތަކުގެ ތެރޭގައި "ޑައުންޓައުން އެބީ" އާއި "ދަ ގުޑް ކާމާ ހޮސްޕިޓަލް" ހިމެނެ އެވެ.

އެމެޒޯން ޕްރައިމް ވީޑިއޯ އިން މި އަހަރު ގެނެސްދިން ބޮލީވުޑްގެ އެކްޓަރު މަނޯޖް ބަޖްޕާއީގެ ސީރީޒް "ފެލިމީ މޭން" ސީޒަން ދޭއްގެ ރޯލެއް ކުޅުނު ސަމަންތާ އަކީ ދާދި ފަހުން ކައިވެނި ރޫޅުނު ބަތަލާއެކެވެ. އޭނާގެ ކުރިީގެ ފިރިމީހާ އަކީ އަންނަ އަހަރު ރިލީޒްކުރާ އާމިރު ޚާންގެ "ލާލް ސިންގް ޗައްޑާ" ގެ ރޯލެއް ކުޅެފައިވާ ތަލެގޫ އެކްޓަރު ނާގަ ޗައިތަނިއާ އެވެ. އެއީ މަޝްހޫރު އެކްޓަރު ނާގުރްޖުނާ އަކިނޭނީގެ ދަރިއެކެވެ.

އިނގިރޭސި ޑައިރެކްޓަރެއްގެ ފިލްމަކުން ސަމަންތާ އަށް ފުރުސަތު ލިބުނު އިރު، ތަމަޅަ ޑައިރެކްޓަރު އެޓްލީ، ޝާހްރުކާ ޚާނާ އެކު ހަދަން ފަށާފައި އޮތް ފިލްމު "ލަޔަން" ގެ ބަތަލާގެ ރޯލު ސަމަންތާ އަށް ހުށަހެޅިކަމުގެ އަޑުތަކެއް ވެސް ދާދި ފަހުން އެރި އެވެ. އެއީ އެ ފިލްމުގެ ބަތަލާއަކަށް ނެގި ނަޔަންތަރާ ފިލްމު ދޫކޮށްލި ކަމަށް ބުނެ އެރި އަޑުތަކާ އެކީގަ އެވެ. ނަމަވެސް "ލަޔަން" އިން ނަޔަންތަރާ ވަކިނުވާ ކަމަށް ރިޕޯޓްތައް މިހާރު ބުނެ އެވެ.

ކާމިޔާބު އެތައް ފިލްމެއް ކުޅެފައިވެ ސަމަންތާ، 34، ގެ އެންމެ ފަހުގެ ފިލްމަކީ މިދިޔަ އަހަރުގެ "ޖާނޫ" އެވެ. އޭނަގެ ކުރިއަށް ހުރި ފިލްމުތަކުގެ ތެރޭގައި "ކާތޫ ވާކުލަ ރެންޑޫ ކާދަލް"، "ޕުޝްޕާ: ދަ ރައިޒް ޕާޓް 1" އަދި "ޝާކުންތަލަމް" ހިމެނެ އެވެ.

"އެރޭންޖްމަންޓްސް އޮފް ލަވް" ގެ ޝޫޓިން ފަށާނީ އަންނަ އަހަރުގެ އޮގަސްޓް މަހުގެ ތެރޭގަ އެވެ. މީގެ އިތުރު ކާސްޓުންނަކީ ކޮބައި ކަމެއް އަދި ނޭނގެ އެވެ.