މަޖުބޫރުކޮށްގެން ޕީޕީއެމަށް މެމްބަރުން ވައްދާ ކަމަށް ތުހުމަތުކުރައްވައި، މާފަންނު ހުޅަނގު ދާއިރާގެ އެމްޑީޕީ މެމްބަރު މުހައްމަދު ފަލާހު މިއަދު ރައްޔިތުންގެ މަޖިލީހަށް ގަރާރެއް ހުށަހަޅުއްވައިފި އެވެ.
މި ގަރާރުގައި ބުނެފައިވަނީ މިއީ ސަރުކާރުގެ މުވައްޒަފުންނަށް ޕީޕީއެމަށް ވަންނަން މަޖުބޫރުކޮށް، އެ ޕާޓީއަށް ސޮއިނުކޮށްފި ނަމަ ވަޒީފާއިން ވަކިކުރާނެ ކަމުގެ ބިރުދައްކާތީ އެކަން މަޖިލީހުން ހުއްޓުވުމަށް ބާރު އެޅުމުގެ ގޮތުން ހުށަހެޅި ގަރާރެއް ކަމަށެވެ.
އެއްވެސް މީހަކު ލައްވައި މަޖުބޫރުން މަސައްކަތް ކުރުވައިގެން ނުވާނެ ކަމަށާއި އިންސާނީ ޝަރަފާއި ހަމަހަމަކަމާއި މިނިވަންކަން އަދި ރާއްޖެ ބައިވެރިވެފައިވާ ބައިނަލްއަގުވާމީ މުއާހަދާތަކަށް އަމަލުކުރުން ގާނޫނު އަސާސީން ލާޒިމުކުރާކަން ގަރާރުގައި ފާހަގަކޮށްފައިވެ އެވެ.
ރާއްޖެއިން ޔުނިވާސަލް ޑިކްލެރޭޝަން އޮފް ހިއުމަން ރައިޓްސް އާއި އިންޓަނޭޝަނަލް ލޭބަ އޯގަނައިޒޭޝަން ގައި ބައިވެރިވެ އަދި އިންޓަނޭޝަނަލް ކޮވިނަންޓް އޮން ސިވިލް އެންޑް ޕޮލިޓިކަލް ރައިޓްސްގައި ރާއްޖޭން ބައިވެރިވެފައި ވަނީ ދިވެހި ރައްޔިތުންނަށް ހައްގުތައް ކަށަވަރުކޮށްދޭން ކަމަށް ވެސް ގަރާރުގައި ބުނެފައިވެ އެވެ.
"އެ ބާރު މި ހާލަތުގައި ބޭނުންކޮށްފައި އެ ވަނީ ގާނޫނުއަސާސީއާ ގާނޫނުތަކާ ހިލާފަށް ކަމުގައި ވާތީ، މި އަމަލު ކުށްވެރިކޮށް މި އިއްޒަތްތެރި މަޖިލީހުން މިކަން ހުއްޓުވުމަށް ބާރުއެޅުމަށް އިގްރާރުވަމެވެ،" މައްޗަންގޮޅި އުތުރު ދާއިރާގެ މެމްބަރު މާރިޔާ އަހުމަދު ދީދީ ތާއީދުކުރެއްވި ގަރާރުގައިވެ އެވެ.
ޕީޕީއެމަށް މެމްބަރުން ވައްދަނީ މަޖުބޫރުކޮށްގެން ކަމަށް ކުރީގެ ރައީސް އަދި އެ ޕާޓީގެ ރައީސް މައުމޫން އަބްދުލް ގައްޔޫމް ވެސް ވަނީ ވިދާޅުވެފަ އެވެ. އެކަމަކު އެވާހަކަތައް ރައީސް އަބްދުﷲ ޔާމީނަށް ތާއީދުކުރައްވާ ބޭފުޅުން ދޮގުކުރައްވަ އެވެ.