އިރާނުގެ ހަމަލާތަކާއެކު ރާއްޖެ އަށް އެތައް ފްލައިޓެއް ޑިލޭ ވެދާނެ!

ގަތަރާއި އިރާގުގައި ހުންނަ އެމެރިކާގެ އަސްކަރީ މަރުކަޒުތަކަށް އިރާނުން މިރޭ ދިން ހަމަލާތަކުގެ ސަބަބުން މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ބަންދުކުރުމުން ރާއްޖެ އަށް ދަތުރުކުރާ އެތައް ފްލައިޓެއް ޑިލޭ ވެދާނެ ކަމަށް ބެލެވިއްޖެ އެވެ.

މި ހަމަލާތަކާ ގުޅިގެން ގަތަރާއި ޔޫއޭއީ އާއި ބަހުރެއިން އަދި ކުވެއިތުގެ ވައިގެ ސަރަހައްދު މިރޭ ވަނީ ބަންދުކޮށްފަ އެވެ.

ގަތަރުގެ ވެރިރަށް ދޯހާގައި ހުންނަ ހަމަދު އިންޓަނޭޝަނަލް އެއާޕޯޓާއި ޔޫއޭއީގެ ދުބާއީ އިންޓަނޭޝަނަލް އެއާޕޯޓަކީ ރާއްޖެ އަށް ދަތުރުކުރާ މީހުން އެންމެ ގިނައިން ޓްރާންސިޓްވާ އެއް އެއާޕޯޓެވެ. އޭގެ ތެރޭގައި ގިނައީ ރާއްޖެ އަންނަ ޓޫރިސްޓުންނެވެ.

ވެލާނާ އިންޓަނޭޝަނަލް އެއާޕޯޓުގެ މިރޭގެ ފްލައިޓް ޝެޑިއުލް ދައްކާ ގޮތުން، މާދަމާ ހެނދުނު ފަށައިގެން މެންދުރު ފަހާ ޖެހެންދެން ދުބާއީ އިން މާލެ އަށް އެމިރޭޓޭސް އެއާލައިންގެ ހަތަރު ފްލައިޓް އޮތީ ތާވަލުކޮށްފަ އެވެ. އަބޫ ދާބީ އިން މާލެއަށް އެތިހާދު އެއާވޭސްގެ ދެ ފްލައިޓު ވެސް މާދަމާ ހެނދުނަށް ތާވަލުކޮށްފައިވެ އެވެ.

މާދަމާ ހެނދުނު ދޯހާ އިން މާލެ އަށް ގަތަރު އެއާވޭސްގެ ދެ ފްލައިޓް އޮތީ ތާވަލުކޮށްފަ އެވެ.

އެ ދެ ގައުމުގެ ވައިގެ ސަރަހައްދު ބަންދުކުރުމުން މި ހުރިހާ ފްލައިޓެއް ޑިލޭވުމުގެ ފުރުސަތު މިހާރު އެބައޮތެވެ.

މިރޭ 11:00 ގައި މާލެއިން ދުބާއީއަށް ފުރަން އޮތް އެމިރޭޓްސް އެއާލައިންގެ ފްލައިޓު ވެސް މިހާރު ވަނީ ޑިލޭވެފަ އެވެ. އަދި ފްލައި ޑުބާއީ އެއާލައިންގެ ފްލައިޓެއް ވެސް މިރޭ 11:00 ގައި ފުރަން ތާވަލުކޮށްފައިވެ އެވެ.

ފްލައިޓް ރާޓާ އެޕުން ދައްކާ ގޮތުން، ދޯހާ އާއި ދުބާއީ އަށް އެކި ގައުމުތަކުން ދަތުރުކުރާ އެތައް ފްލައިޓެއް މިހާރު ދަނީ ޑައިވާޓް ވެސް ކުރަމުންނެވެ.

ގަތަރުގައި ހުންނަ އެމެރިކާގެ އަސްކަރީ ވައިގެ މަރުކަޒަށާއި އިރާގުގައި ހުންނަ އެމެރިކާގެ އަސްކަރީ މަރުކަޒަކަށް އިރާނުން މިރޭ ވަނީ ހަމަލާދީފަ އެވެ.

މުޅި ދުނިޔޭގެ ވައިގެ ދަތުރުތަކަށް ވެސް ބުރޫ އަރައިފި

އީރާނަށް އެމެރިކާއިން ހަމަލާ ދިނުމާ އެކު ބްރިޓިޝް އެއާވޭސް އިން އިއްޔެ ވަނީ ލަންޑަންގެ ހީތުރޯއިން ދުބާއީ އާއި ދޯހާއަށް ދަތުރުކުރުން ހުއްޓާލައިފަ އެވެ. އެކަމަކު މިއަދު އަލުން ދަތުރުތައް ފަށަން ނިންމި ނަމަވެސް ބައެއް ފްލައިޓްތައް ވަނީ ކެންސަލް ވެފަ އެވެ.

އެއާ ފްރާންސުން ވަނީ ސައޫދީ އާއި ޔޫއޭއީ އަށް މާދަމާގެ ނިޔަށް ދަތުރުތައް ކެންސަލްކޮށްފަ އެވެ. އެ އެއާލައިނުން ވަނީ އިޒްރޭލާއި ލުބްނާނަށް ވެސް ދަތުރުތައް ކެންސަލްކޮށްފަ އެވެ.

ސްވިސް، އޮސްޓްރިއަން އަދި އައިޓީއޭ ވެސް އޮޕަރޭޓްކުރާ ޖަރުމަނުގެ ލުފްތަންސާއިން ވަނީ މި މަހުގެ 30ގެ ނިޔަލަށް މެދުއިރުމައްޗަށް ދަތުރުތައް މެދުކަނޑާލައިފަ އެވެ.

ޓާކިޝް އެއާލައިނުން އިރާގު، ޖޯޑަން އަދި ލުބްނާނަށް މި މަހުގެ 30 އާ ހަމައަށް އަދި އީރާނަށް އަންނަ މަހުގެ 30ގެ ނިޔަލަށް ދަތުރުތައް ހުއްޓާލާފައި ވާއިރު މިއަދު ވަނީ ސައުދީ، ބަހްރެއިން، ގަތަރު، ކުވައިތު، ޔޫއޭއީ އަދި އޮމާނަށް ފްލައިޓްތައް ކެންސަލްކޮށްފަ އެވެ.

ފިންއެއާއިން ވެސް ވަނީ ގަތަރުގެ ދޯހާއަށް ދަތުރުތައް ކެންސަލްކުރަން ނިންމިކަން އިއުލާނުކޮށްފަ އެވެ.

އޭޝިއާގެ އެއާލައިންތަކުގެ ތެރެއިން ސިންގަޕޯ އެއާލައިނުން ވަނީ އާދީއްތަ ދުވަހުން ފެށިގެން ބުދަ ދުވަހުގެ ނިޔަލަށް ކޮންމެ ދުވަހަކު ދެ ފްލައިޓްގެ މަގުން ޖުމްލަ އަށް ފްލައިޓް ދޯހާއަށް ކެންސަލްކޮށްފަ އެވެ.

މީގެ އިތުރުން ވެސް އެތައް އެއާލައިނަކުން މެދުއިރުމަތީގެ އެކި މަންޒިލްތަކަށް ވަނީ ދަތުރުތައް މެދުކަނޑާލައިފަ އެވެ.