އަންނަ އަހަރުގެ "ބޮޑު ދަރަނި" ދައްކަން ދައްޗެއް ނުވާނެ: މާހިރުން

ބޮންޑު ވިއްކުމުގެ ތެރެއިން ކުރީގެ ސަރުކާރުތަކުން ދައުލަތަށް ނަގާފައިވާ ދަރަނިތަކަށް ރާއްޖެ އިން އަންނަ އަހަރު ދައްކަން ޖެހޭ 500 މިލިޔަން ޑޮލަރު ދެއްކުމަކީ މާލީ ހާލަތު މިހާރު ހުރި ގޮތުން ދަތިކަމަކަށް ނުވާނެ ކަމަށް އެ ދާއިރާގެ ބައެއް މާހިރުން އިއްޔެ ވިދާޅުވެއްޖެ އެވެ.

އިންސްޓްޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސް (ސީއޭ މޯލްޑިވްސް) އިން ބޭއްވި "މޯލްޑިވްސް އެކައުންޓެންޓްސް ފޯރަމް 2025" ގެ ބައެއްގެ ގޮތުގައި އިއްޔެ ބޭއްވި ޕެނަލް ޑިސްކަޝަނެއްގައި ކުރި ސުވާލަކަށް އަމިއްލަ ހައިސިއްޔަތުން ޖަވާބު ދެއްވަމުން ބޭންކް އޮފް މޯލްޑިވްސް (ބީއެމްއެލް) ގެ ސްޓްރެޓެޖިކް ކޮންސަލްޓެންޓް އަބްދުﷲ ހަސަން ވިދާޅުވީ އަންނަ އަހަރު ބޮންޑްތަަކަށް ދައްކަންޖެހޭ 500 މިލިއަން ޑޮލަރު ދެއްކޭނެ ގާބިލުކަން ރާއްޖޭގައި އެބަހުރި ކަމަށެެވެ.

އޭނާ ވިދާޅުވީ މަރުކަޒީ ބޭންކު އެމްއެމްއޭގެ ރިޒާވްގެ ގޮތުގައި މިހާރު ވެސް 800 މިލިއަން ޑޮލަރަށް ވުރެ ގިނަ ފައިސާ އެބަހުރި ކަމަށާއި ސޮވަރިން ޑިވެލޮޕްމެންޓް ފަންޑުގައި ޔަގީނުން ވެސް "ތިން ޑިޖިޓު" ގެ އަަދަދަކަށް ފައިސާ ހުރި ކަން ފިނޭންސް މިނިސްޓްރީގެ މައުލޫމާތުތަކުން އެނގޭ ކަަމަށެވެ.

ދެ ދުވަހުގެ ފޯރަމްގެ ތެރެއިން އިއްޔެ ފޯރަމްގެ އެންމެ ފަހުގެ ޕެނަލް ޑިސްކަޝަންގައި ކުރި ސުވާލުގައި އެހީ "އަންނަ އަހަރު މެޗުއާ ވާ ދަރަނިތައް ސަރުކާރަށް ދެއްކޭނެތޯ ނުވަތަ އަވަށްޓެރި ސްރީލަންކާ އަށް ކުރިމަތިިވި ފަދަ ކަމެއް ކުރިމަތިވެދާނެތޯ" އެވެ.

އެ ސުވާލުގެ ޖަވާބުގައި ބީއެމްއެލްގެ ސްޓްރެޓެޖިކް ކޮންސަލްޓެންޓް އަބްދުﷲ ވިދާޅުވި ގޮތުގައި، އަންނަ އަހަރު މެޗުއާ ވާ [ސުކޫކާއި ބޮންޑުގެ ތެރެއިން] 200 ނޫނީ 300 މިލިއަން ޑޮލަރު ރިފައިނޭންސް ކުރެވޭނެ ގޮތެއް ސަރުކާރުން ހޯދި ނަމަވެސް އެ އަހަރުގެ އޭޕްރީލް މަހު ދައްކަންޖެހޭ 500 މިލިއަން ޑޮލަރުގެ ސުކޫކު "ރިފައިނޭންސް ކުރެވޭނެ" އެވެ.

އަބްދުﷲ ވިދާޅުވީ އެ ދަރަނި ދައްކަން ފިނޭންސް މިނިސްޓްރީގެ ގިނަ ޕްލޭންތަކެއް ހުންނާނެ ކަަަމަށް ގަބޫލު ކުރައްވާ ކަމަށެވެ.

ހަަމަ އެ ސުވާލަށް ޖަވާބު ދެއްވަމުން މޯލްޑިވްސް އިސްލާމިކް ބޭންކު (އެމްއައިބީ) ގެ ޗީފް ފައިނޭސް އޮފިސަރު އަލީ ވާސިފް ވިދާޅުވީ އެ ކަމުގައި ބީއެމްއެލްގެ ސްޓްރެޓެޖިކް ކޮންސަލްޓެންޓް އަބްދުﷲގެ ހިޔާލާ އެއްގޮތް ކަމަށެވެ.

"[ދަރަނީގެ ތެރެއިން] މާކެޓް ސުކޫކަކީ 500 މިލިއަން ޑޮލަރު ދެއްތޯ؟ [ފިނޭންސް މިނިސްޓްރީގެ ވެބްސައިޓް ބައްލަވާލައިފިއްޔާ ފެނިވަޑައިގަންނަވާނެ ދަރަނީގެ އަނެއް ބައިގެ ތެރެއިން ބޮޑު ބަޔަކީ ބައިލެޓްރަލް ދަރަނިކަން. ބައިލެޓްރަލް އެރޭންޖްމަންޓްތަކަކީ ރީސްޓްރަކްޗާކުރަމުން، ރީ ޝެޑިއުލް ކުރަމުންދާ އެރޭންޖްމަންޓްތަކެއް،" އަމިއްލަ ހައިސިއްޔަތުން ވާހަކަ ދައްކަވަމުން ވާސިފް ވިދާޅުވި އެވެ.

ބައިލެޓްރަލް ދަރަނިތައް ބެނޭޖްކުރުމުގައި ރާއްޖެއަށް ފަސޭހަ ގޮތްތައް ހޯދޭނެ ކަމަށް ދެކެވަަޑައިގަންނަވާ ކަމަށާއި އެއީ ގައުމުތަކާ އެކު ރަނގަޅު ގުޅުމެއް އޮތުމުން ކަމަށް ވެސް ވާސިފް ވިދާޅުވި އެވެ.

"އެހެންވީމާ ރާއްޖޭގެ ބައިވެރިންގެ އެހީތެކަމާ އެކު އަޅުގަނޑުމެން ދާނީ ސަލާމަތުގެ އައްސޭރިއަކަށް ކަމަށް އަޅުގަނޑު ގަބޫލުކުރަނީ،" ވާސިފް ވިދާޅުވި އެވެ.

ދަރަނި އަދާކުރަން ރާއްޖޭން އަންނަ އަހަރު ދައްކަން ޖެހޭ 500 މިލިއަން ޑޮލަރު ދެއްކޭނެ ކަމުގެ އުއްމީދު. އާވެފައިވާ ކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު ވެސް ދާދި ދަހުން ވިދާޅުވި އެވެ.

ރައީސް ޑރ. މުހައްމަދު މުއިއްޒު އދ. އަތޮޅުގެ 10 ރަށަކަށް ކުރެއްވި ދަތުރުފުޅުގެ ތެރެއިން މަހިބަދޫގެ ރައްޔިތުންނާ ރައީސް ބައްދަލުކުރައްވަން ބޭއްވި ޖަލްސާގައި ތޯރިގު ވިދާޅުވީ އެ 500 މިލިއަން ޑޮލަރުގެ ދަރަނި ނުދެއްކި އަންނަ އަހަރު ސަރުކާރު "ޑިފޯލްޓަކަށް" ދާނެ ކަމަށް ކުރީގެ ދެ ރައީސުން ކަމަށްވާ އަބްދުﷲ ޔާމީނާއި އިބްރާހީމް މުހައްމަދު ސޯލިހު ވާހަކަފުޅު ދައްކަވާ ކަމަށާއި އެކަމަކު މި ސަރުކާރުން ގެންދަނީ އެ ދަރަނިތައް ދެއްކުމަށްޓަކައި "އަރިއަކަށް" ފައިސާ ޖައްސަމުން ކަމަށެވެ.

"އަދި ނުވިތާކަށް ކައިރި ގައުމުތަކުން، ހާއްސަކޮށް ރާއްޖެއާ އަވަށްޓެރި ބޮޑު ދެ ގައުމެއް، އޭގެ ތެރޭގައި އިންޑިއާ އާއި ޗައިނާ އިން ހާރިޖީ ގުޅުންތަކުގެ ތެރެއިން މަޝްވަރާ ކުރުމަށް ފަހު، އެ ގައުމުތަކަށް ދައްކަންޖެހޭ ދަރަނީގެ ތެރެއިން ބޮޑު ބައެއް މިއަދު މި ވަނީ އެހެން ދުވަސްވަރެއްގައި ދައްކާ ގޮތަށް ފަސްކުރެވިފައި،" އޭނާ ވިދާޅުވި އެވެ.

އިންޑިއާ އާއި ޗައިނާގެ އިސްވެރިންނާ ރައީސް މުއިއްޒު މަޝްވަރާ ކުރެއްވުމަށް ފަހު އެ ކަންކަން ފަހިވެފައިވާތީ، އަންނަ އަހަރު ދައްކަންޖެހޭ ދަރަނި ނުދެއްކޭނެ ކަމުގެ ޝައްކުތައް މިހާރު ފިލާފައިވާ ކަމަށް ވެސް ތޯރިގް ވިދާޅުވި އެވެ.