ކުރީގެ ރައީސް މުހައްމަދު ނަޝީދުގެ މައްޗަަށް އިއްވި 13 އަހަރުގެ ޖަލު ހުކުމަކީ ކޯޓުގެ ފަނޑިޔާރަކު ލިއުއްވި ހުކުމެއް ނޫން ކަމަށާއި އެ ހުކުމް އެމަނިކުފާނުގެ މައްޗަށް އިއްވީ ސަރުކާރުގެ ރޭވުމާއި ނުފޫޒުން ކަން ސާބިތުކޮށްދެއްވަން ތައްޔާރަށް ހުންނެވި ކަމަށް ކުރީގެ ނައިބު ރައީސް އަހްމަދު އަދީބު ވިދާޅުވުމާ އެކު، ސުޕްރީމް ކޯޓުން އެ މައްސަލަ އަލުން ބަލަން ޖެހޭ ކަމަށް ނަޝީދުގެ ގާނޫނީ ވަކީލުން މިއަދު ވިދާޅުވެއްޖެ އެވެ.
ނަޝީދުގެ ވަކީލުން ބޭއްވި ޕްރެސް ކޮންފަރެންސެއްގައި ހިސާން ހުސެއިން ވިދާޅުވީ ކްރިމިނަލް ކޯޓުން ނަޝީދަށް އިއްވި ދިގު މުއްދަތުގެ ހުކުމް ހައި ކޯޓާއި ސުޕްރީމް ކޯޓުން ދަމަހައްޓާފައިވީ ނަމަވެސް އެ ހުކުމާ ގުޅޭ އާ ހެއްކެއް ފެންމަތިވުމުން މައްސަލަ އަލުން ބަލަން ޖެހޭ ކަމަށެވެ. އެއީ މިހާތަނަށް ވެސް ރާއްޖޭގައި އަމަލުކުރަމުން އަންނަ އުސޫލު ކަން ވަކީލުން ފާހަގަކުރެއްވި އެވެ.
"އަދީބަކީ ކުރިން ޓޫރިޒަމް މިނިސްޓަރު ކަން ކުރައްވައި ސަރުކާރުގައި އުޅުއްވިއިރު އެންމެ ބާރުގަދަ، ނުފޫޒު ގަދަ ބޭފުޅާގެ ގޮތުގައި ރައްޔިތުންނަށް ފެނިގެން ގޮސްފައިވާ ބޭފުޅެއް. އެފަދަ މަގާމެއްގައި އޭރު ހުންނަވާފައި، މި މައުލޫމާތު މިހާރު އާއްމުކުރައްވައި ހެކި ބަސް ދެއްވަން ތައްޔާރަށް ހުންނެވި ކަމަށް ވިދާޅުވުމުން ޝަރީއަތުގެ ވެސް ޒިންމާއެއް އެބައޮވޭ މި މައްސަލަ އަލުން މުރާޖައާ ކުރެއްވުމުގެ،" ހިސާން ވިދާޅުވި އެވެ.
"އެހެންވެ އަޅުގަނޑުމެން މި އެދެނީ ދިވެހިރާއްޖޭގެ ސުޕްރީމް ކޯޓުގައި މި މައްސަލާގައި ހާމަވި މައުލޫމާތާ އެކު މައްސަލަ އަލުން މުރާޖައާ ކޮށްދެއްވުމަށް."
އަދީބުގެ ސިޓީއާ ގުޅިގެން ވަކީލުން ފާހަގަކުރެއްވި މުހިއްމު ކަންކަން:
- ނަޝީދުގެ ޝަރީއަތްކޮށް، ހުކުމް އިއްވާފައި ވަނީ ކުށަކާ ލައިގެން ނޫން ކަމާއި އެއީ ސައްހަ ހުކުމެއް ނޫން ކަން އަދީބުގެ ސިޓީން ވަނީ ސާފުވެފައި.
- ނަޝީދަށް ހުކުމް އިއްވީ ކުރީގެ ޑިފެންސް މިނިސްޓަރު މުހައްމަދު ނާޒިމަށް އިއްވި ހުކުމުގެ ދިފާއުގައި ނަޝީދު މަސައްކަތް ކުރައްވަފާނެތީ.
- ހުކުމް ލިއުއްވީ ނަޝީދުގެ ޝަރީއަތް ހިންގި ފަނޑިޔާރުންނެއް ނޫން، ފުރަތަމަ ނިންމީ 10 އަހަރަށް ހުކުމް އިއްވައި ތަންފީޒުކުރުން ތިން އަހަރަށް ފަސް ކުރަން.
- ފަނޑިޔާރުން މައްޗަށް ބޮޑެތި ނުފޫޒު ފޯރުވައި އެހެން ބަޔަކު ލިޔާ ހުކުމް އިއްވާ ހިސާބަށް ކަންކަން ގޮސްފައިވާތީ ކަންބޮޑުވޭ.
- ފަޓާސް ބަރިއެއްހެން ޝަރީއަތް ނިންމާލި ސަބަބު އަދީބުގެ ސިޓީން ވަރަށް ސާފު. ބޭއިންސާފުން އިއްވާފައިވާ ހުކުމަކީ ބާތިލް އެއްޗެއް ކަމަށް ހެދުމަށް ކުރަން ޖެހޭ ކަންކަން ސުޕްރީމް ކޯޓުން ކުރަން ޖެހޭ.
ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލާގައި ނަޝީދަށް ޓެރަރިޒަމްގެ ހުކުމެއް އިއްވީ އެމަނިކުފާނުގެ މައްޗަށް ކުރިން ކުރި ގާނޫނާ ޚިލާފަށް މީހަކު ހިފައި ހައްޔަރުކުރުމުގެ ދައުވާ އަނބުރާ ގެންގޮސްފައި ކަން ވަކީލް އަދި އެމްޑީޕީގެ ޗެއާޕާސަން ހަސަން ލަތީފް ފާހަގަ ކުރެއްވި އެވެ. އެ ދައުވާ އަނބުރާ ގެންގޮސް ފަހުން ޓެރަރިޒަމްގެ ދައުވާ ޕްރޮސިކިއުޓަ ޖެނެރަލް ކުރެއްވީ ސަރުކާރުން ބޭނުންވާ މަގްސަދު ހާސިލްކޮށްދެއްވަން ކަމަށް ވެސް ހަސަން ވިދާޅުވި އެވެ.
"ރައީސް ނަޝީދަށް ދައުވާ ކުރުމާއި ހުކުމް އިއްވުމުގައި ސަރުކާރުން ބޮޑު ދައުރެއް އަދާކުރިކަން އަދީބުގެ ސިޓީން އަޅުގަނޑުމެންނަށް ފާހަގަކުރެވޭ. އެމަނިކުފާނުގެ ޝަރީއަތް ގެންދިޔަ ގޮތާއި ހުކުމް އިއްވި ގޮތަށް ބަލާއިރު ވެސް އަދީބުގެ ސިޓީގައިވާ ކަންކަމުން، އެ ހުކުމަކީ ބޭއިންސާފު ހުކުމެއް ކަމަށް ކަނޑައެޅިގެން ވަރަށް ސާފު،" އޭނާ ވިދާޅުވި އެވެ.
ނަޝީދަށް އިއްވުމަށް ފުރަތަމަ ލިއުނު ހުކުމުގައި އޮތީ އެމަނިކުފާނަށް 10 އަހަރުގެ ހުކުމެއް އިއްވައި ހުކުމް ތަންފީޒުކުރުން ތިން އަހަރަށް ފަސްކުރަން ޖެހޭ ގޮތަށް ކަމަށް އަދީބުގެ ސިޓީއާ ހަވާލާ ދެއްވައި ހަސަން ވިދާޅުވި އެވެ. މިއީ، ސިޔާސީ ބޭނުމެއް ހާސިލްކުރަން ސަރުކާރުން ތައްޔާރުކރި ހުކުމެއް ކަމަށާއި އެ ހުކުމް ލިއެފައި ވަނީ ފަނޑިޔާރަކު ނޫން ކަމަށް ވެސް އަދީބު ވިދާޅުވެފައިވާ ކަން ހަސަން ފާހަގަކުރެއްވި އެވެ.
ކުށެއް ސާބިތުވެ ޖަލު ހުކުމެއް ތަންފީޒުކުރަމުންދާ މީހަކު ދޭ ހެކިބަސް ކޯޓުގައި ގަބޫލުކުރެވޭނެތޯ ނޫސްވެރިން ސުވާލު ދެންނެވުމުން ވަކީލް އިބްރާހިމް ރިއްފަތު ވިދާޅުވީ ނަޝީދު މައްސަލާގައި އަދީބު ހެކި ބަސް ދެއްވުމުގެ އެއްވެސް ހުރަހެއް ނެތް ކަމަށެވެ. މީގެ ކުރިން ވެސް ޖަލުގައި ހުކުމް ތަންފީޒުކުރާ މީހުންގެ ހެކި ބަސް ޝަރީއަތްތަކުގައ ނަގާފައިވާ ކަމަށް އޭނާ ވިދާޅުވި އެވެ.
"އަދީބުގެ ސިޓީން އާ ހެކިތަކެއް، އާ މައުލޫމާތުތަކެއް އެބަ ހާމަވޭ. އެމަނިކުފާނު ޝަރީއަތަށް ހާޒިރުކޮށް ހެކިބަސް ނަގައިފި ނަމަ ކުރިން ހާމަނުވާ އާ ކަންތައްތަކެއް ޝަރީއަތަށް ސާފުވެގެންދާނެ. ހެއްކެއްގެ ގޮތުގައި ކުރީގެ ނައިބު ރައީސް ސުޕްރީމް ކޯޓަށް ހާޒިރުކޮށް ރައީސް ނަޝީދުގެ މައްސަލާގައި ކަންކަން ހިނގާފައިވާ ގޮތް ނުބަލައިފި ނަމަ ރައީސް ނަޝީދާ މެދު ތަފާތު ކުރެވެނީ. ގާނޫނުއަސާސީގެ 17 ވަނަ މާއްދާގައި އޮވޭ އެއްވެސް މީހަކާ މެދު ތަފާތުކުރުން ގެންގުޅެގެން ނުވާނެ ކަމަށް،" ރިއްފަތު ވިދާޅުވި އެވެ.
އެއްވެސް ރައްޔިތަކަށް އިންސާފު ނުލިބިދާ ކަމަށް ވާނަމަ، އެއީ ރައީސުލްޖުމްހޫރިއްޔާ ވެސް އެކަމެއް ބަލައި އިންސާފު ހޯދައިދޭން ޖެހޭ ކަން ގާނޫނުއަސާސީގައި ބަޔާންކޮށްފައި އޮންނަ ކަން ވެސް ވަލީކުން ފާހަގަކުރެއްވި އެވެ.