މި އަހަރު އޮންނަ ރިޔާސީ އިންތިހާބުގެ ކެމްޕެއިންގައި ކުރިމަތިވެވަޑައިގަންނަވާ ކަމަކުން ފަސް ޖެހިވަޑައިނުގަންނަވާނެ ކަމަށް ގުޅިފައިވާ އިދިކޮޅު ޕާޓީތަކުގެ ކެންޑިޑޭޓު، އަދި އެމްޑީޕީ ޕާލަމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް (އިބޫ) މިއަދު ވިދާޅުވެއްޖެ އެވެ.
ހުޅުމާލޭގެ ދިރިއުޅޭ ރައްޔިތުންނާ ބައްދަލު ކުރެއްވުމަށް އެ ރަށަށް މިއަދު ވަޑައިގަތުމުން، ބަޔަކު ވަނީ އިބޫ އަށް ހަމަލަ ދިނުމަށް މަސައްކަތްކޮށްފަ އެވެ. އެކަމަކު، އިބޫ އަށް ހަމަލަ ދިނުމުގެ ކުރިން ކައިރީގައި ތިބި ސެކިއުރިޓީންނާއި އެމްޑީޕީގެ އެކްޓިވިސްޓުން ވަނީ އެކަން ހުއްޓުވައިފަ އެވެ.
އެނގިފައިވާ ގޮތުގައި، އިބޫ ހަމަލަ ދިނުމަށް އެންމެ ފުރަތަމަ މަސައްކަތް ކުރީ ހުޅުމާލެ ސެންޓްރަލް ޕާކް ކައިރިންނެވެ. އޭގެ ފަހުން، ޗައިނާ ފްލެޓުތައް ކައިރިން ވެސް އިބޫ އަށް ހަމަލަ ދޭން މަސައްކަތް ކުރި އެވެ. ހަމަނުޖެހުން ހުއްޓުވަން އެއްވެސް ފުލުހަކު ހަރަކާތްތެރިވެފައެއް ނުވެ އެވެ. މި ދެ ފަހަރު ވެސް އިބޫ އަށް ހަމަލަ ދޭން އުޅުނީ ސައިކަލެއްގައި ދިޔަ ދެ މީހުން ކަމަށް އެމްޑީޕީން ބުންޏެވެ.
ހުޅުމާލޭގައި ހުންނަވައި، ނޫސްވެރިންނަށް މައުލޫމާތު ދެއްވަމުން އިބޫ ވިދާޅުވީ އިދިކޮޅު ޕާޓީތަކުން ގުޅިގެން ނިކުމެ ތިބީ ރާއްޖެ އިން އަނިޔާވެރިކަމާއި ކޮރަޕްޝަން ނައްތާލައި ރާއްޖެއަށް އިންސާފާއި ހަމަހަމަކަން ހޯދައި ދިނުމަށް ކަމަށާއި އެކަން ކާމިޔާބު ކުރާނެ ކަމަށެވެ.
"އަޅުގަނޑުމެން ފެށި މަސައްކަތާއެކު ކުރިއަށް ދާން މިތިބީ ތައްޔާރަށް. އެހެން ކުރިމަތިވާ ކަމަކުން، ފަސް ޖެހުމެއް ނެތް. ކުރިއަށް ދާނީ،" އިބޫ ވިދާޅުވި އެވެ.
އިބޫ ވިދާޅުވި ގޮތުގައި ހުޅުމާލެ އިން މިއަދު ފެނުނު މަންޒަރަކީ ރައީސް އަބްދުﷲ ޔާމީން އިންތިހާބުން ބަލިވެފައި އޮތް ތަނެވެ. އަދި އެފަދަ ހަމަނުޖެހުންތައް ހިންގަނީ އިންތިހާބެއްގައި ވޯޓުލައިގެން ކާމިޔާބު ނުކުރެއްވޭނެކަން އެނގިވަޑައިގަންނަވާތީ ކަމަށް ވެސް އޭނާ ވިދާޅުވި އެވެ.