އޮޔާދިޔަ މީހަކާއި ޑިންގީއެއް ސަލާމަތްކޮށްފި

ވިލިމާލެ އާއި ފޭދޫފިނޮޅާ ދޭތެރޭ ކަނޑުމަތިން އޮޔާދިޔަ މީހަކާއި ޑިންގީއެއް ފުލުހުން މިއަދު ސަލާމަތްކޮށްފި އެވެ.

ފުލުސް އޮފީހުން ބުނީ މިއަދު މެންދުރު 12 ޖަހާކަންހާއިރު، ފުލުހުންގެ ލޯންޗަކުން ސަލާމަތްކުރީ، ޑިންގީއަކާއި ކަނޑުމަތިން އޮޔާދިޔަ ބިދޭސީއެއް ކަމަށެވެ. އަދި އެ ޑިންގީގައި އެ ވަގުތު އެހެން ބިދޭސީއަކު ވެސް ހުރި ކަމަށް ފުލުހުން ބުންޏެވެ.

މި ދެ މީހުންނަކީ ވެސް އެ ސަރަހައްދުގައި އޮތް ބޯޓެއްގެ ދެ މީހުންނެވެ. ކަނޑުމަތިން ފުލުހުން ސަލާމަތް ކުރީ، ޑިންގީ އޮޔާދާން ފެށުމުން އެ ސަލާމަތް ކުރުމަށް މޫދަށް ފުންމާލި މީހެކެވެ. ޑިންގީ އޮޔާދާން ފެށީ އޭގެ އިންޖީނު ހުއްޓިގެން ކަމަށް ފުލުހުން ބުންޏެވެ.

ފުލުހުން ވަނީ އެ ދެ މީހުންނާ ޑިންގީ ވެސް، ބޯޓާ މިހާރު ހަވާލުކޮށްފަ އެވެ.