ހެޕީ މާކެޓުން ދިނީ އުފާވެރި ޚަބަރެއް، ތައުރީފު އޮހެނީ

ކޮވިޑް-19 ގެ އަލާމާތްތައް ފެނިގެން ބައެއް މީހުން ކަރަންޓީނުކޮށް، ދެ ރިސޯޓަކާއި މީހުން އުޅޭ ރަށެއް ވަގުތީ ގޮތުން ބަންދުކުރުމުން ރާއްޖޭގެ ބައެއް މީހުން ތިބީ ކޮންމެވެސް ވަރެއްގެ ހާސްކަންމަތީގަ އެވެ. އެންމެ ބޮޑު ކަންބޮޑުވުމަކީ ކާބޯތަކެތީގެ ބާވަތްތައް ލިބުން ދަތިވެ، ތަކެތީގެ އަގު އުފުލިދާނެތީ އެވެ. ކުރިއަށް އޮތީ ރޯދަ މަހެވެ. އެހެންވެ. އެތައް ގައުމަކަށް ފެތުރެމުންދާ ކޮވިޑް-19 އާ ގުޅިގެން މާދަމާ ވެސް ވާނެ ގޮތަކާ އަހަރެމެން މިހާރު ތިބި ސުވާލު އުފެއްދުމުގަ އެވެ.

އެކަމަކު، މި ހާސްކަމަށް ލުޔެއް ލިބޭ ފަދަ ޚަބަރެއް ހެޕީ މާކެޓުން މިިއަދު ދީފި އެވެ. އެއީ، އެ ކުންފުނިން ގެންނަ ހުރިހާ ބާވަތެއްގެ މުދާ ވެސް ތާވަލާ އެއްގޮތަށް ލިބޭނެ ކަމުގެ ޔަގީން ކަމާއި އެ ތަކެތީގެ އަގު ވެސް ބޮޑުނުކޮށް، ހިފެހެއްޓޭނެ ކަމެވެ.

ހެޕީ މާކެޓުގެ ފޭސްބުކް ޕޭޖްގައި ބުނެފައިވާ ގޮތުން، ކޮރޯނާވައިރަހުގެ ސަބަބުން ސަޕްލައި ޗެއިނަށް ހީނަރުކަން އަތުވެދާނެ ވާހަކަ އާއި ރޯދަ މަހާ އެކު، ޑިމާންޑަށް އަންނަ ބަދަލުގެ ނަތީޖާއެއްގެ ގޮތުން ތަކެތީގެ އަގު އުފުލިދާނެ ކަމަށް ވާހަކަ ދެއްކެވެ އެވެ. ހެޕީ މާކެޓުން އެތެރެކުރާ ބާވަތްތައް އަގުބޮޑު ނުވާނެ ކަމުގެ ޔަގީންކަން ދިނީ އެހެންވެ އެވެ.

"މި ކުންފުނިން އެތެރެކޮށް، ވިއްކާ ހުރިހާ ބާވަތެއްގެ ކާބޯތަކެތި ވެސް ރާއްޖެ އެތެރެކުރަން ރޭވިފައިވާ ޓައިމްލައިނާ އެއްގޮތަށް ލިބޭނެ ކަމުގެ ޔަގީންކަން މި ވަގުތަށް ލިބިފައިވާ ވާހަކަ ދަންނަވަމެވެ. ހަމަ އެއާ އެކު، ހުރިހާ ބާވަތެއްގެ އަގު ރަމަޟާން މަސް ނިމެންދެން ވެސް ބޮޑުނުކޮށް ހިފަހައްޓާނެ ވާހަކަ ދަންނަވަމެވެ،" ހެޕީ މާކެޓްގެ ފޭސްބުކް ޕޯސްޓުގައި ވެ އެވެ.

އަންނަ މަހު ފަށާ މި އަހަރުގެ ރޯދަ މަހު ޑިމާންޑް އިތުރަށް ބޮޑުވާ ބައެއް ބާވަތްތަކުގެ އަގު އުފުލިޔަ ނުދީ، ހިފަހައްޓާނެ ކަމުގެ ޔަގީންކަން ވެސް އެ ކުންފުނިން ދިނެވެ. އެ ގޮތުން، އަގުހެޔޮކުރި ބާވަތްތަކަކީ ކުކުޅާއި ކުކުޅުގެ ބައިތަކާއި ކުކުޅު ބިހެވެ.

ހެޕީ މާކެޓުން ދިން އެންމެ އުފާވެރި އަނެއް ޚަބަރަކީ ފިނިކުރި ކުކުޅުގެ އަގު މިހާރު ވެސް ހެޔޮކުރެވެން އޮތް ބޮޑަކަށް ދަށްކޮށްފައިވާ ކަމެވެ. އަދި ރޯދަ މަހު ވެސް ހަމަ އެ އަގުގައި ހިފަހައްޓާނެ ކަމުގެ ޔަގީން ކަމެވެ.

ހެޕީ މާކެޓުގެ ފޭސްބުކް ޕޯސްޓް ނިންމައިލާފައި ވަނީ ކޮރޯނާވައިރަސް ފެތުރޭތީ ދިން އިރުޝާދަކުންނެވެ.

"މި ވަގުތު ގައުމަށް ދިމާވެފައިވާ މި ހާލަތުގައި ކެތްތެރިކަން އިސްކޮށް، ދައުލަތުގެ ކަމާ ބެހޭ ފަރާތްތަކުން ދެއްވާ އިރުޝާދުތަކާ އެއްގޮތަށް އެންމެހާ ރައްޔިތުން ވެސް އަމަލު ކުރެއްވުމަކީ މި ކުންފުނީގެ އެންމެ ބޮޑު އެދުމެވެ."

ހެޕީ މާކެޓްގެ ފޭސްބުކް ޕޯސްޓް 800 އަށް ވުރެ ގިނަ މީހުން މިހާތަނަށް ޝެއާކޮށް، ހަމަ އެހާ ގިނަ މީހުން ރިއެކްޓްކޮށް، ކޮމެންޓް ކޮށްފައި ވެ އެވެ. އެ ހުރިހާ އެންމެން ކަހަލަ ގޮތަކަށް ވަނީ އެ ކުންފުނީގެ ވެރިންނަށް ތައުރީފުކޮށްފަ އެވެ.

"ވިޔަފާރީގައި ބަަރަކާތް ލައްވައި، އިތުރު ކުރިއެރުން ލިބި އޭގެ މަންފާ އެންމެ ފުރިހަމަ ގޮތުގައި ރައްޔިތުންނަށް ލިބުމުގެ މަގު އިތުރަށް ފަހިކޮށްދެއްވާށި، އާމީން،" ކޮމެންޓް ކުރި އެކަކު ލިޔެފައި ވެ އެވެ.