އިޒްރޭލާއި އެމެރިކާ އިން އީރާނަށް ދެމުން ގެންދާ ހަމަލާތަކާ ގުޅިގެން އީރާނުން ދޭ ރައްދު ހަމަލާތަކާ ހެދި ހުއްޓުމަކަށް އައިސްފައިވާ ޔުނައިޓެޑް އަރަބި އެމިރޭޓްސް (ޔޫއޭއީ) ގެ އެއާޕޯޓްތަކުން، ގަޑިއަކު 48 ފްލައިޓަށް ދަތުރުކުރެވޭ ގޮތަށް ރައްކާތެރި ވައިގެ މަގެއް ގާއިމުކޮށްފި އެވެ.
ދުބާއީ އިންޓަނޭޝަނަލް އެއާޕޯޓްސް (DXB) އަދި ދުބާއީ ވޯލްޑް ސެންޓްރަލް - އަލް މަހުތޫމް އިންޓަނޭޝަނަލް އެއާޕޯޓް (DWC) އިން ލިމިޓެޑް ގޮތެއްގައި އަލުން ފްލައިޓްތައް ފަށަން ނިންމާފައިވާކަން ރޭ ވަނީ އިއުލާނުކޮށްފަ އެވެ.
އެ މަސައްކަތް ފުޅާކޮށް، ގަލްފުގެ އެހެން ގައުމުތަކާ ގުޅިގެން، ރައްކާތެރިކަމާ އެކު، ފްލައިޓުތަކަށް ދަތުރުކުރެވޭނެ ވައިގެ މަގެއް ގާއިމުކޮށްފައިވާ ކަމަށް ޔޫއޭއީގެ ޓޫރިޒަމް މިނިސްޓަރު މިއަދު ނޫސްވެރިން ގާތު ވިދާޅުވި އެވެ.
މި ފިޔަވަޅު އެޅީ، ހަނގުރާމައިގެ ސަބަބުން ޔޫއޭއީގެ ޓޫރިޒަމަށާއި އިގްތިސާދަށް ކުރަމުންދާ ނޭދެވޭ އަސަރުތައް ކުޑަކުރުމަށް ކަމަށް އޭނާ ވިދާޅުވި އެވެ.
ފިޔަވަހިތަކަކަށް ބަހާލައިގެން ވައިގެ ދަތުރުތައް މިދިޔަ އާދީއްތަ ދުވަހު އަލުން ފެށި ފަހުން، މިއަދާ ހަމައަށް 60 ފްލައިޓެއްގައި 17،400 އަށް ވުރެ ގިނަ ފަސިންޖަރުން ދަތުރުކޮށްފައިވާ ކަމަށް އޭނާ ވިދާޅުވި އެވެ.
ދެވަނަ ފިޔަވަހީގެ ދަށުން، ޔޫއޭއީގެ އެއާލައިންތަކުގެ 80 ފްލައިޓެއްގައި 27،000 ފަސިންޖަރުން ފުރުމަށް ވަނީ ހަމަޖެހިފަ އެވެ.
އަވަށްޓެރި ގައުމުތަކާއި ގަލްފް ކޯޕަރޭޝަނާ ގުޅިގެން ގާއިމުކުރި އާ ވައިގެ މަގުން ދަތުރުތައް ކުރުމަށް ބައިނަލްއަގުވާމީ ވައިގެ އުދުހުންތަކާބެހޭ އިދާރާ، އައިކާއޯގެ ހުއްދަ ލިބިފައިވާ ކަމަށް ޔޫއޭއީގެ ޓޫރިޒަމް މިނިސްޓަރު ވިދާޅުވި އެވެ.
ނަމަވެސް، އެއާލައިންތަކުން އަންގަންދެން އެއާޕޯޓަށް ނުދިޔުމަށް ފަސިންޖަރުންނަށް ވަނީ އިލްތިމާސްކޮށްފަ އެވެ.
އަބޫ ދާބީ އެއާޕޯޓްސް އިން ވެސް ވަނީ އިއްޔެ ބައެއް ދަތުރުތައް އަލުން ފަށާފައިވާކަން އިއުލާނުކޮށްފަ އެވެ.
އެމިރޭޓްސް އާއި ފްލައިދުބާއީ އިން ވެސް ވަނީ ރޭ ބައެއް ދަތުރުތައް އަލުން ފަށާނެ ކަމަށް ބުނެފަ އެވެ.
މީގެ އިތުރުން، ހަމަލާތަކުގެ ސަބަބުން މެދުއިރުމައްޗަށް ދަތުރުތައް ހުއްޓާލާފައިވާ އިންޑިއާގެ ބައެއް އެއާލައިންތަކުން ބައެއް ދަތުރުތައް އަލުން ފަށަން ނިންމިކަން މިއަދު ވަނީ އިއުލާނުކޮށްފަ އެވެ.
އީރާނަށް ހަމަލާދީ އެ ގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އާއި އިސް އެތައް ބަޔަކު އަވަހާރަކޮށްލުމުގެ ބަދަލު ހިފުމުގެ ގޮތުން، އިޒްރޭލާއި އެމެރިކާގެ މަސްލަހަތު ހިމެނޭ ތަންތަނަށް ގެންދަނީ ހަމަލާ ދެމުންނެވެ. ގަލްފު ގައުމުތަކުގައި ހުރި އެމެރިކާގެ އަސްކަރީ ތަންތަނަށް ހަމަލާދޭނެ ކަމުގެ އިންޒާރާ އެކު ފެށި ހަމަލާތަކުގައި އެ ގައުމުތަކުގެ އާންމުން އުޅޭ ތަންތަނަށާއި މަަދަނީ އެއާޕޯޓްތަކަށް ވެސް ހަމަލާތައް އަމާޒުވެފައިވެ އެވެ.
އީރާނުން ރައްދު ހަމަލާތައް ހޮނިހިރު ދުވަހު ފެށި ފަހުން ދުބާއީ، އަބޫ ދާބީ، ކުވައިތު އަދި މަނާމާގެ އެއާޕޯޓްތަކަށް ހަމަލާތައް އަމާޒުވެފައިވެ އެވެ.
ޔޫއޭއީގެ ވެރިރަށް އަބޫ ދާބީން އެއާޕޯޓްގައި ހިނގި ހާދިސާއެއްގައި އެކަކު މަރުވެފައިވާ ކަމަށް ބުނެފަ އެވެ.