ރައްޔިތުންގެ މަޖިލީހުގެ ތަޅުމުގައި ބާއްވާ ޖަލްސާތަކަށް މެމްބަރުން ވަޑައިގަތުމުގެ ހުއްދަ ދޭނީ އެޗްޕީއޭ އިން ކަނޑައަޅާފައިވާ ވަކި ކަންތައްތަކެއް މަޖިލީހުގެ އިދާރާ އިން ފުރިހަމަ ކުރުމުން ކަމަށް ފުލުހުން އެ އިދާރާ އަށް އަންގައިފި އެވެ.
މަޖިލީހުގެ ރައީސް މުހައްމަދު ނަޝީދަށް ފުލުހުން ފޮނުވި ސިޓީއެއްގައި ބުނީ، މަޖިލީހުގެ ތަޅުމުގައި މިއަދު ބާއްވާ ޖަލްސާ އަށް މެމްބަރުން ވަޑައިގަތުމުގެ ހުއްދައައް މަޖިލީހުގެ އިދާރާ އިން އެދުމުން، އެކަމުގައި އެޗްޕީއޭގެ ލަފައެއް ހޯދާފައިވާ ކަމަށެވެ. އެ ލަފާގައި ވަނީ ފުލުހުން ބުނިގޮތުގައި، މަޖިލީހުގެ އިދާރާގައި ވަކި ކަންތައްތަކެއް ފުރިހަމަވުމުން، ޖަލްސާ އަށް މެމްބަރުން ވަޑައިގަތުމުގެ ހުއްދަ ދިނުމަށެވެ.
އެސިސްޓެންޓް ކޮމިޝަނަރު އޮފް ޕޮލިސް އަބްދުﷲ ފައިރޫޝް ސޮއިކުރައްވާފައިވާ ސިޓީގައި އެދިވަޑައިގެންފައި ވަނީ އެޗްޕީއޭ އިން ބޭނުންވާ ކަންކަން މަޖިލީހުގެ އިދާރާ އިން ކަށަވަރު ކޮށްދިނުމަށެވެ.
އެޗްޕީއޭ އިން ކަނޑައަޅާފައިވާ އެއް ކަމަކީ މީހުން އެއްތަނަކަށް ޖަމާވެގެން، ކޮންމެހެން ބާއްވަންޖެހޭ ޖަލްސާއެއް މި ދުވަސްވަރު ނުބޭއްވުމަށެވެ. އެކަމަކު އެންމެ އެދެވިގެން ވަނީ މިހާތަނަަށް ވެސް އަމަލުކުރަމުން އައި ގޮތަށް ވާޗުއަލްކޮށް ޖަލްސާތައް ބޭއްވުން ކަމަށް އެޗްޕީއޭއާ ހަވާލާދީ ފުލުހުން މަޖިލީހުގެ އިދާރާ އަށް ފޮނުވި ސިޓީގައި ވެ އެވެ.
އެޗްޕީއޭ އިން އަންގާފައިވާ ގޮތުން މަޖިލީހުގެ ތަޅުމުގައި ޖަލްސާ ބޭއްވުމަށްޓަކައި ހަތް ކަމެއް ފުރިހަމަ ކުރަންޖެހެ އެވެ. އެއީ:
1- ޖަލްސާ ކުރާ މާލަމަށް ވަނުމުގެ ކުރިން، ޓެމްޕަރޭޗާ ބަލައި ހުން ނެތްކަން ކަށަވަރު ކުރުން.
2- ކޮވިޑް-19 ގެ އަލާމާތެއް ހުރި އެއްވެސް މީހަކު ޖަލްސާގައި ބައިވެރި ނުވުން.
3- މާލަމަށް ވަނުމުގަ އާއި ނުކުތުމުގައި، އެކަކު އަނެކަކާ ދެމެދު ތިން ފޫޓުގެ ދުރުމިނެއް ބެހެއްޓުން.
4- ޖަލްސާގައި ބައިވެރިވާ މީހުން ސައިބޯނި ލައިގެން އަތްދޮވެވޭނެ ގޮތް ނުވަތަ ހޭންޑް ސެނިޓައިޒާ ބެހެއްޓުން.
5- މާލަމުގައި ތިބޭއިރު ގިނަގިނައިން މީހުން އަތްލާނެ ތަކެއްޗާއި ތަންތަން (މޭޒުމަތި، ތަޅު، ކީބޯޑު، މައުސް ފަދަ ތަކެތި) ސާފުކޮށް ޑިސްއިންފެކްޓް ކުރުން.
6- ކޮވިޑް-19 އިން ރައްކާތެރިވުމުގެ އާންމު އިރުޝާދުތަކާ އެއްގޮތަށް (ކެއްސައި، ކިނބިހި އަޅާއިރު، ޓިޝޫ ނުވަތަ އަތުގެ އުޅަނބޮށީގެ އެތެރެފުށް ބޭނުންކުރުން) އަމަލު ބެހެއްޓުން.
7- މީހުން އެއްތަނަކަށް އެއްވެގެން ކޮންމެހެން ބާއްވަންޖެހޭ ޖަލްސާއެއް ނޫނީ މި ދުވަސްވަރު ނުބޭއްވުން. އެންމެ އެދެވިގެން ވަނީ ވާޗުއަލްކޮށް ޖަލްސާ ބޭއްވުން.
ރައްޔިތުންގެ މަޖިލީހުގެ އެމްޑީޕީގެ ބައެއް މެމްބަރުން "މިހާރު" އަށް ވިދާޅުވީ، ތަޅުމުގައި ބާއްވާ ޖަލްސާ އަށް ވަޑައިގަތުމުގެ ހުއްދަ ފުލުހުންގެ ޕޯޓަލް މެދުވެރިކޮށް ވަކިވަކި މެމްބަރުންނަށް ދީފައިވާ ކަމަށެވެ.
ކޮވިޑް-19 އާ ގުޅިގެން މާލެ ސަރަހައްދު ލޮކްޑައުން ކޮށްފައިވާއިރު، އެއްވެސް މީހަކަށް ގެއިން ބޭރަށް ނުކުމެވޭނީ އެޗްޕީއޭ އިން ކަނޑައަޅާފައިވާ ގޮތުން ޒަރޫރީ ކަމެއްގައި އެކަންޏެވެ. އެ ވެސް ފުލުހުންގެ ޚާއްސަ ހުއްދަ އޮންނަ މީހުންނަށް ލިބޭ ފުރުސަތެކެވެ.
މާލެ އާއި ވިލިމާލެ އާއި ހުޅުމާލޭގެ ލޮކްޑައުންއާ މެދު އަންނަ ބުރާސްފަތި ދުވަހުގެ ކުރިން ގޮތެއް ނިންމާނެ ކަމަށް ސަރުކާރުން ބުނެފައި ވަނިކޮށް، ސަރުކާރުގެ ކަމާ ގުޅޭ އިދާރާތަކުގެ ބަސް އަހައިގެން އެންމެން ގޭގައި ތިއްބައި މަޖިލީހުގެ ތަޅުމުގައި ޖަލްސާ ބާއްވަން މަޖިލީހުގެ ރައީސް ނަޝީދު ނިންމެވުމުން އެތައް ބަޔަކު ދަނީ އެ މަނިކުފާނަށް ފާޑުކިޔަމުންނެވެ.
ކޮވިޑް-19 އިން ރައްކާތެރިވުމަށްޓަކައި މާޗް 12 ގައި ސިއްހީ ނުރައްކަލުގެ ކުއްލި ހާލަތު އިއުލާން ކުރުމާ ގުޅިގެން ސަރުކާރުގެ އޮފީސްތަކާއި ސްކޫލްތަކާއި ކޮލެޖު/ޔުނިވަސިޓީތަކާއި ކެފޭ/ރެސްޓޯރަންޓުތައް ވަނީ ބަންދުކޮށްފަ އެވެ. މާލެ އިން އެ ބަލީގެ މީހަކު މިދިޔަ މަހުގެ 15 ގައި ފެނުމުން އެ ދުވަހުން ފެށިގެން މާލެ ސަރަހައްދު ލޮކްޑައުން ކުރި އެވެ.
ކުއްލި ގޮތަކަށް މަޖިލީހުގެ ތަޅުމުގައި ޖަލްސާތައް ބާއްވަން ނަޝީދު ބޭނުންފުޅުވީ، ކައުންސިލްތަކުގެ ދައުރު ދަންމާލަން، ގާނޫނުއަސާސީއަށް ސަރުކާރުން ހުށައެޅި އިސްލާހުގެ މަސައްކަތާ ދިމާކޮށެވެ. މަޖިލީހުގެ މެމްބަރުންގެ ވަޓްސްއެޕް ގުރޫޕްގައި އެ މަނިކުފާނު ވިދާޅުވީ މާލަމުގައި މެމްބަރުން ހާޒިރުވެ ތިއްބަވައިގެން ނޫން ގޮތަކަށް ގާނޫނުއަސާސީ އަށް ބަދަލެއް ގެނައުން ރަނގަޅު ނޫން ކަމަށެވެ. ކުރިން ވެސް ނަޝީދު އެގޮތަށް ވާހަކަފުޅު ދެއްކެވި އެވެ.
ގާނޫނު އަސާސީއަށް ސަރުކާރުން ހުށައެޅި އިސްލާހު އެޖެންޑާ މިކުރީ، މުޅިން އެހެން އުޒުރުތަކެއް ދައްކަވައިގެން އެ ބިލް އެތައް ދުވަހަކު ބޭއްވުމަށް ފަހު އެވެ. އެމްޑީޕީގެ ސުޕަ މެޖޯރިޓީ އޮތް މަޖިލިހުގައި ބަހުސް ކުރިއަށް ގެންދިޔައީ، ގާނޫނަކުން ކައުންސިލަރުންގެ ދައުރު ދަންމާލާ ގޮތަށެވެ. އެކަމަކު އެއީ ގާނޫނު އަސާސީއާ ހިލާފު ކަމެއް ކަމަށް، ގާނޫނީ ތަޖުރިބާކާރުން ގެންދަނީ ބުނަމުންނެވެ.
އެންމެ ފަހުން ގާނޫނުގެ ބިލް ބާއްވާފައި، ގާނޫނު އަސާސީއަށް އިސްލާހު ގެންނަ ބިލް މިހާރު އެ އޮތީ ކުރިއަށް ނެރެފަ އެވެ. ޖޫން 1 ގެ ކުރިން އެ ބަދަލު ގެންނަން ޖެހެ އެވެ. އެހެންކަމުން މަޖިލިހުގެ ޖަލްސާތައް، އީދު ބަންދުގައި ވެސް ކުރިއަށް ގެންދަން މަޖިލިހުގެ ނިންމި އެވެ.
