ބަޣާވާތް ހިންގިއިރު ވެސް ފޯރީގައި "ނަށަނީ"

މި މަހުގެ އެއް ވަނަ ދުވަހު މިއަންމާގެ އަސްކަރިއްޔާ އިން ބަޣާވާތްކޮށް ވެރިކަން ވައްޓާލުމުން މުޅި ގައުމުގައި ހާސްކަން އެންމެ ބޮޑުވި ވަގުތު މަގުމަތީގައި އުޅުނު އަންހެނަކު ފޯރީގައި ކަސްރަތުކުރާ މަންޒަރު ފެންނަ ވީޑިއޯއަކަށް ގިނަ ބައެއްގެ ސަމާލުކަން ހުއްޓިއްޖެ އެވެ.

މި ވީޑިއޯ އިން ފެންނަނީ އަސްކަރިއްޔާ އިން ގެނައި ބަޣާވާތުގެ ތެރޭގައި މަގުމަތީގައި އަސްކަރީ އުޅަނދުތައް ހަލަބޮލިކޮށް ހަރަކާތްތެރިވަމުން ދިޔަ ނަމަވެސް ކަމެއްވެގެން އުޅޭކަން ރޭކާ ވެސް ނުލައި އެރޮބިކްސް ކަސްރަތުކުރަން ހުއްޓާ އެވެ. މި ވީޑިއޯގައި ފެންނަ މީހާ އަކީ އެރޮބިކްސް އިންސްޓްރަކްޓަރެއްގެ ގޮތުގައި މަސައްކަތްކުރާ ހިންގް ނިން ވާއީ އެވެ.

އޭނާ އަކީ ކުރިން ވެސް ކަސްރަތަށް މަގުމައްޗަށް ނުކުންނަ މީހެކެވެ. ހޯމަ ދުވަހު ވެސް މަގުމައްޗަށް ނުކުތީ ކަސްރަތުކުރާށެވެ. މާސްކެއް އަޅައިގެން ވެރި ރަށުގައި ހުންނަ ގާނޫނު ހަދާ މަޖިލީހުގެ އިމާރާތް ހުންނަ ހިސާބުގަނޑުގައި އޭނާ ސަމާލުވެ ހުރީ މިއުޒިކެއް ޖަހައިގެން ކަސްރަތަކަށެވެ.

ހިންގްގެ ގައުމުގައި ބޮޑު ކަމެއް ހިނގިކަން އެނގުނީ ކަސްރަތު ވީޑިއޯ ފޭސްބުކަށް ލުމުން، ފަހަތުން ފެންނަން ހުރި މަންޒަރުތަކުގެ ވާހަކަ މީހުން ދައްކަން ފެށުމުންނެވެ. ކުރިން ބައެއް މީހުން ހީކުރީ އެއީ އެޑިޓްކޮށްފައި އިން ވީޑިއޯއެއް ކަމަށެވެ. ސަބަބަކީ ބެކްގްރައުންޑް ފެންނަ މަންޒަރުތަކާއި ވީޑިއޯ އިން އިވޭ މިއުޒިކާ ވެސް ވަރަށް "ސިންކްވެފައި" އޮތުމެވެ. ފޭސްބުކަށް ހިންގް ވެސް ވީޑިއޯ ލީ ކެޕްޝަނަކަށް ބެކްގްރައުންޑުން ފެންނަ މަންޒަރާ މިއުޒިކް ގުޅޭ ކަމަށް ލިޔެފަ އެވެ.

މި ވީޑިއޯ ސައްހަކަން ކަށަވަރުކުރަން ވަރަށް ގިނަ މީޑިއާތަކުން ހިންގް އަށް ސޯޝަލް މީޑިއާ މެދުވެރިކޮށް މެސެޖްތައް ވެސް ލިބެން ފެށި އެވެ. އަދި އެ ވީޑިއޯ އަކީ އޭނާ ކަސްރަތުކުރަނިކޮށް ނަގާފައިވާ ވީޑިއޯއެއްކަށް ކަށަވަރުކޮށް ދިނެވެ. އެއާ އެކު މި ވީޑިއޯ ޓްވިޓާގައި ވެސް ވަރަށް ބޮޑަށް ދައުރުވާން ފެށި އެވެ.

ގައުމުގައި ބަޣާވާތެއް ހިނގިކަން ހިންގް އަށް އެނގުމުން އޭނާ ބުނެފައި ވަނީ އެ ވީޑިއޯ އަކީ މިހާރު "ވަރަށް ހާއްސަ އެއްޗެއް" ކަމަށެވެ.

ބީބީސީ އަށް ހިންގް ބުނި ގޮތުގައި ހޯމަ ދުވަހު އޭނާ ކަސްރަތުކުރަން ހުރި ތަނަކީ ފާއިތުވި 11 މަސް ދުވަހު ވެސް ކަސްރަތަށް ނުކުމެ އުޅޭ ތަނެވެ. އަދި އެ ދުވަހުގެ އެ ވީޑިއޯ އަކީ ފިޓްނެސް ޑާންސް މުބާރާތަކަށް ހިންގް ދައްކައިލި ހުނަރުތަކެވެ.

"އެ ވީޑިއޯ ނެގި ދުވަހު ދުއްވާ އެއްޗެހި މަގުމަތީގައި ތަންކޮޅެއް ގިނަކަން އަހަންނަށް ވެސް ފާހަގަކުރެވުނު. އެކަމަކު ދެން އެ ސަރަހައްދުވީމަ ހަމަ ރަސްމީ ކަމެކޭ ހީކޮށްލާފައި ހުރީ،" އޭނާ ބުންޏެވެ.

މި ވީޑިއޯ ގުޅިގެން ބައެއް މީހުން ހިންގް އަށް ފާޑު ވެސް ކިޔާފައިވެ އެވެ. ބަޣާވާތަށް ތާއީދުކުރި ބައެއް މީހުން ބުނެފައި ވަނީ އެ ވީޑިއޯ އަކީ އަސްކަރިއްޔާ އަށް މަލާމާތްކޮށް، ޖޯކު ޖެހުމުގެ އަމަލެއް ކަމަށެވެ.

"އެކަމަކު އެއީ އަހަރެން އެއްވެސް ބަޔަކަށް މަލާމާތްކުރަން ކުރި ކަމެއް ނޫން. އިއްތިފާގަކުން މިގޮތަށް ދިމާވެފައި މި ވަނީ،" އޭނާ ބުންޏެވެ.

މިއަންމާގެ ސިފައިން ގެނައި އަސްކަރީ ބަޣާވާތެއްގައި އެ ގައުމުގެ ލީޑަރު އަން ސަން ސޫކީ އާއި އެހެން ސިޔާސީ އިސް ފަރާތްތައް ވަނީ ހައްޔަރުކޮށްފަ އެވެ.